ААЛАМ АПТА ИЧИНДЕ

Казакстан

КАЗАКТАРДА "КЫРГЫЗ" ОЙГОНДУБУ?
16-декабрда Казакстандын эгемендүүлүгүнүн 20 жылдыгы белгиленип, ошол эле учурда Жаңаөзен шаарында салтанат кандуу тополоңго айланды. Мангистау облусуна караштуу бул шаардын аянтында жарым жылдан бери маянаны көтөрүү талабы менен нефтичилер митингге чыгып келишкен. Бирок алардын талабы аткарылбай келген. Майрамга туш келген митинг баш аламандыкка айланып, нааразы болуп чыккандар имараттарды өрттөөгө киришкен. Укук коргоочулар аларга каршы ок чыгарып, расмий маалыматка ылайык, 15 адам каза таап, 86 адам жаракат алган. Андан тышкары 46 имарат өрттөнүп, дүкөн менен банктар тонолгон.
Бийлик кескин чараларды көрүүгө киришип, Жаңаөзенде кагылыш башталары менен интернет жана телефон байланыштары үзүлдү. Мектеп окуучуларын кышкы эс алуунун убактысы келе электе эле таратып жиберүүгө аргасыз болушту. Жаңаөзен шаарында 17-декабрдан 5-январга дейре өзгөчө кырдаал киргизилди. Коменданттык саат түнкү 11ден таңкы 7ге чейин коюлуп, чектөөнү бузган 70ке жакын адам камакка алынды.

Орусия

КРЕМЛДИ 100 ЖЫЛДЫК БАЛАТЫ КООЗДОЙТ
Жаңы жылдын жарчысы балаты эмеспи. Орусия да майрамга камынып, Кремль аянтына 100 жыл жашаган балатыны Москванын жанындагы токойдон кыйып келишти. 1 кылым жашаган балатынын бою 34,5 метрге жетет. Жалпы салмагы 5 тоннаны түзөт. Өзөгүнүн жоондугу 1 метрдей болгон балатыны 10 мүнөттө кыйып бүтүшкөн.
Президенттин иш башкармалыгынын басма сөз катчысы Виктор Хреков: “Өлкөнүн негизги балатысын тандоону жайында эле баштап, акыры 5 балатыга токтолгонбуз. Анын ичинен эң коозун алдык”,- дейт. Жаңы жылдык балаты салтка айланган ак, көк жана кызыл өңдөгү оюнчуктар менен кооздолмокчу.

Англия

ГИТЛЕРДИ ТУУРАЙМ ДЕГЕН ДЕПУТАТ
Англия парламентинин Консервативдик партиясынын депутаты Эйдан Берли сүрөттүн айынан Транспорт министрлигиндеги кызматынан жана мандатынан кол жууду. “Daily mail” аттуу жергиликтүү гезитте жарыяланган депутаттын улутчул форма кийген адам менен түшкөн сүрөтү коомчулукта уу-дуу кепти жаратты.
Франциядагы кышкы лыжа тебүү борборунда өткөн көңүл ачуу кечесинен алынган сүрөт Берлини Гитлер сымал “улутчул” деген атка кондурду. Ал саясий карьерасын сактап калууга жан далбастап, бир апта бою еврей гезиттерине актануу катын чыгарды. Бирок гезит ошол көңүл ачуу кечесинин катышуучулары депутаттын сунушу менен улутчул форма кийишкенин, убактылуу пайдаланууга алынган формалардын акысын Берли төлөгөнүн жазды. Мына ушундай былыктар ортого чыгары менен өлкөнүн өкмөт башчысы Дэвид Кэмерон “саясий ишмерге татыктуу эмес жүрүм-турум” деп баалап, депутатты иштен алуу чечимин чыгарды. Биздикилер да “саясий ишмерге татыктуу эмес жүрүм-туруму” үчүн кызматтан алынышса, бир тобуна сабак болор эле.

Түндүк Корея

КИМ ЧЕН ИР КАЗА ТАПТЫ
Түндүк Кореяны 17 жыл бийлеген лидер Ким Чен Ир 17-декабрда дүйнөдөн кайтты. Расмий маалыматтарда 69 жаштагы башчы эл үчүн кызмат кылып, кара күч жана акыл-эсине оор келгендиктен дүйнө салганы белгиленет. Бирок ал 2008-жылы эле инсультка кабылып, ошонун кесепетинен поездде жүрөгү токтоп каза тапканы аныкталды.
Лидерди жерге берүү иш-чарасы Пхеньян шаарында 28-декабрда өтмөкчү. Ал эми Ким Чен Ирдин атасынан калган башкаруу кызматы үчүнчү уулу Ким Чен Ынга өтүп, ал расмий түрдө “улуу мураскер” деп табылды.

Италия

ӨКМӨТ БАШЧЫГА ЖӨНӨТҮЛГӨН ОК
Италиянын жаңы премьер-министри Марио Монтинин бийликке келгенине бир айдан ашып-ашпай эле ок салынган кат алды. Октон сырткары коркутуу менен коштолгон катта бюджетти үнөмдөө боюнча планды кайра карап чыгуу талабы коюлган. “Биз чабуул жасайбыз, ал жашоо үчүн эмес, өлүм үчүн жасалган согуш болот. Силер пландарыңар үчүн өз каныңар менен жооп бересиңер. Тынч уктабай каласыңар. Бизде ок көп”,- деп жазылган катта.
Бул катты “Куралчан пролетариаттардын кыймылы” деген эктремисттик топ уюштурганын мойнуна алды. Ошондой эле бир апта мурун Италиянын мамлекеттик компаниясынын директоруна бомба салынган кат келген. Ачары менен жарылган бомбадан директор колунан жаракат алып, көзү азиз болуп кала жаздаган.
Эске салсак, жаңы өкмөт башчы Марио Монти бюджеттеги таңсыктыкты 30 миллиард еврого кыскартуу үчүн пенсияга чыгуу курагын 66 жашка көтөрөрүн айткан.

Индия

167 АДАМ САМОГОН ИЧИП ӨЛДҮ
Индиянын Батыш Бенгалия штатында адамдар массалык түрдө самогондон ууланып, набыт болгондордун саны 167ге жетти. Дагы 300гө жакыны ооруканаларда дарыланууда. "Сапатсыз алкоголду чыгаруу жана таратууга шектүү" деп жергиликтүү кримавторитет айыпталууда. Ошол эле учурда "уулантууга тиешеси бар" деп 12 адам кармалган. Жабыркагандардын көпчүлүгү Бангладеш өлкөсү менен чектеш жайгашкан айылдардын тургундары. Алардын көбү жалданып иштегендиктен, сапаттуу арак сатып алууга мүмкүнчүлүктөрү жок. Жергиликтүү бийлик органдарынын маалыматына караганда, жабыр тарткандардын 20 чактысынын канынан метанол табылган.

Турдугүл Каримова
koom@super.kg