Чыңгыз Мырзаев: «НАДИРА МЕНИН УРУКСАТЫМ МЕНЕН «СУПЕР СУЛУУ» СЫНАГЫНА КАТЫШКАН»

Ырчы, алпаруучу, ди-джей, таланттуу жигит Чыңгыз Мырзаев “качан үйлөнөсүң?” деген суроодон биротоло кутулду. Анткени ал 25-март күнү элге той берип, Надирабегим аттуу сулууга үйлөндү. "Супер сулуу" сынагынын катышуучуларынын базары жүрүп жаткан кез. Дегенибиз, Надирабегим "Супер сулуу-2011" сынагынын финалчысы. Эскерте кетсек, өткөн аптада аталган сынактын жеңүүчүсү Айсулуу турмушка чыккан.

– Кандайсың, Чыңгыз, алгач куттуктап алалы, куш боо бек болсун!
– Чоң рахмат.

– “Үйлөнсөң боло” деген сөздөн акыры кутулган экенсиң да...
– Ооба, үйлөндүк. Кудайга шүгүр, ата-энем, ага-инилерим, тууган-уругум, досторум кубанып жатышат. Атам тамашалап мени карап “чын элеби?” деп коёт. “Бетиңизди чымчысаңыз, ооруп жатса, анда түш эмес, чын эле” деп күлдүм. Албетте, өзүмдүн да кубанычым койнума батпай турган кез.

– Алган жарың биздин кыз экен...
– Келинчегимдин аты Надирабегим, 1993-жылы Чүй өрөөнүндө туулуп-өскөн кыз. Үй-бүлөдө кыздардын улуусу, бир агасы, бир иниси жана эки сиңдиси бар. Учурда Кыргыз-Орус Славян университетинде тиш доктурлукка окуп жатат. Өзүнө тыкан, аракетчил кыз. “Жаш кыял” бий ансамблинде кичине кезинен бери бийлейт. Ооба, "Супер сулуу" сынагына катышкан.

– Надира “Супер сулуу-2011” сынагына катышып, финалга чыккан. Ошол концертти өзүң алпаргансың. Сыр берген жок элең...
– Ооба, сынактын алдынан Надира менден уруксат сураган. “Катышсамбы?” деп калыптыр, "өзүң кааласаң, ата-энең макул болсо, катыша бер" дегем. Мен деле жаш кезден андай маданий-массалык иш-чараларга көп аралашып жүрчүмүн.

– Сахнада алып баруучу болуп турганда ичиңден Надирага тартып турган экенсиң да?..
– Эми ал нерсе биздин мамилеге оң же терс таасирин берген деле жок. Бирок андай сынакка катышып жаткан соң жеңүү бар, жеңилүү бар. Жеңгенди да, жеңилгенди да билүү керек деп ойлойм.

– Кепти келинчегиң менен качан, кандайча таанышып калдың, ошол жөнүндө уласак...
– Надираны көптөн бери эле тааныйм. Мындан үч жыл мурун анын ата-энеси той берип, мен тамада болгом. Ошондо таанышып калганбыз.

– А кыз-жигит болуп канча убакыт сүйлөштүңөр?
– Эки жылдан ашып калды десем болот. Биз жаңыдан сүйлөшүп баштаган кезде ал мектепти аяктап жаткан болчу. Аны тамашалап “мен сени 25-майда эле алып кетип калам” деп калчумун. Ошондо өйдөдөн назар түшсө керек. Буйрук ушул күндөргө туш келиптир. Жамандыр-жакшыдыр кызыктуу күндөрдү баштан кечирдик. Кээде тоого барып эс алып кайтсак, кээде жетелешип муз тепкени барып дегендей. Мен өзүм анча деле романтик эмесмин. Андан да кызыктуу күндөр али алдыда экенине ишенем.

– "Үйлөнөлү" деген сунушту киргизиш деле оңой болбосо керек?
– Бул сунушту мен марттын биринде, жаздын биринчи күнүндө киргиздим. Жер тегиз аппак кар болчу, таттуу жеп отурганбыз. “Менин да убагым келди, сен деле бойго жеттиң. Турмуш деген оңой нерсе эмес. Ата-энең менен акылдаш, жакшылап ойлонуп чечим чыгар” дедим. Надира макулдугун берери менен эртеси, 2-мартта экөөбүз барып нике шакектерин сатып алдык. Анда анын ата-энеси Кытайдын Пекин шаарына кеткен экен, алар алтысында келишти. Келери менен ата-энелерибиз сүйлөшүп, макулдашышты. Алардын чечими менен 24-мартта Надира тараптан кыз узатуу тою, 25-март биз тараптан келин алуу тою болот деп чечим чыкты. Ошону менен эле тойдун камы менен чуркап калдык. Менин ата-журтум, баары алыста болгондуктан, бардык камды өзүм көргөнгө туура келди. Күн сайын Надира экөөбүз көйнөк тиктирмей, базарга бармай, чакыруу таратмай деген түйшүктөр менен чуркап жүрдүк.

– Той кандай өттү?
– Айылдагы туугандарым көчкүнүн айынан жолдордун жабылып калганына байланыштуу бир топ түйшүк менен араң жетип келгендери болбосо, той абдан жакшы өттү. Кайсы гана той болбосун өзүм чуркап жүрүп көнүп калган экенмин, төрдө отурган эң кыйын экендигин түшүндүм. Сырттан карап отуруп, улам бир кемчиликти көрө берет экенсиң. Ичиңден “муну минтип эле койсо болмок” деп тынчың кетип отурганың менен, элге кашка тишиңди көрсөтүп күлүп турушуң керек дегендей. Тууган-урук, кайын журт, жакын санаалаштар, достор, баары келишти. Акындар, ырчы, бийчилер да куттукташты. Айтор, көңүлдөгүдөй болду. Келгендин баары жакшы баталарын берип кайтышты. Эми ошол баталар ишке ашып, эң эле жаман дегенде өзүбүздүн ата-энелерибиздей ата-эне болуп, жакшы түгөйлөрдөн болсок деген үмүт, тилектер менен турмуш жолго аттандык.

– “Бир кемеге түшкөндүн жаны бир” демекчи, турмуштук сапарыңар кандай башталды.
– Той-топурдун шарынан мына бүгүн эле бир аз арылгандай болдук. Бүгүн ишке чыктым, Надира да сабагына кетти. Баягы Чыңгызхандын сөзү бар эмеспи: “Баштадыңбы коркпо, корксоң баштаба”,- деген. Анын сыңары баш кошкондон кийин мындан ары бири-бирибизге жөлөк-таяк болуп жашашыбыз керек. Экөөбүз тең идеалдуу адамдар эмеспиз, менде да өзүмө тиешелүү мүнөз бар, анда да бар дегендей. Бирок Надира мага караганда оор басырыктуу. Бир нерсени айтып жатсаң, кээде таптакыр унчукпай коймою бар. Кайра өзүм эле кызыктай болуп калам. Ошонусу жагат. Ар бир сөзүңө сөз кайрып турса жаман да. Мурда сөзгө сөз кайрып турган кээ бир жеңелерди, кыздарды, эжелерди көрүп “ушундай колуктудан Кудай сакта” деп калчу элем. Анын бетин ары кылсын эми.

– Үйлөнгөндөн кийин мурда билбеген сапаттар ачылып жатса керек?
– Азырынча Кудайга шүгүр, “бир жакшыга бир жаман” деп коёт эмеспи. Мурда эле тиленчүмүн, ошол жаманы мен болсом экен деп. Ошондой эле болсун. Анан да менин байкаганым, Надира мага караганда аябай сергек экен. Мен кыйналып, саат алтыда тура албай жаткан болсом, ал саат беште эле туруп алган болот.

– Келиндик кызмат кылыппы?
– Менин ата-энем деле “келинсиң, келиндик кызматыңды кыл” деген адамдардан эмес. Апам “шыпырылбай турган эшик барбы, бүтпөй турган жумуш барбы? Бул үйдүн экинчи кожойкеси сен болосуң” деп коёт. Экөө кызындай эле мамиле кылып жатышат. Надира биздин үйдө келин эле эмес, ата-энемдин 4-кызы болуп калды. Атам менен апам деле аны кызым дешип алкап-жалкап, айланып-кагылып эле отурушат. Карындаштарым болсо, сүйүнүшүп, жеңелеп жанында жүрүшөт. Кыскасы, баарыбыздын үмүтүбүздү актаган, ыймандуу, жакшы бүлө болот деп ишенем.

– Кызыктуу маек үчүн чоң рахмат. Алганың менен бактылуу болуп, жетелешкен бойдон кадырман карылыкка жеткиле.
– Чоң рахмат, айтканыңар келсин.

Чолпон Сүйүнбаева
star@super.kg