Кундуз Канатбек кызы:«КҮЙӨРМАНДАР КОРКУТКАНГА ЧЕЙИН БАРЫШАТ»

– Кундуз, сен курдуу кыздарга кеңеш берип кетсең. Дайыма сулуу болуп жүрүүнүн өзгөчө рецеби барбы?
– Ар бир айым өз алдынча сулуу. Болгону, ошол сулуулукка кам көрө билүү керек. Мисалы, кээ бир айымдар тырмагын унутуп коюшат. Ал эми кам көрүлгөн тырмак айымга бир топ эле сулуулук кошот. Кымбат баалуу косметика каражаттарын сатып алуунун ордуна табигый жер-жемиштерден жасалган маскаларды колдонуу бир топ эле натыйжасын берет. Мен жумасына бир жолу бетиме жана чачыма сөзсүз түрдө маска жасайм.

– Жагып калган жигиттин көңүлүн кантип өзүңө бурасың? Сырларынан айта кетсең...
– Бир мырзаны жактырып калдың дейли. Бирок ал сага назарын салбай жатса...
Биринчи кадам: Өзүңө көңүл бур. Өтө модалуу кийинүү менен эле мырзага чалма сала албайсың. Жарашыктуу жана келбетиңдин сулуу жерин ого бетер баса белгилей турчу кийимди танда. Жигиттердин көпчүлүгү шым кийип шымаланган кыздарга караганда көйнөк кийген бийкечтерге көбүрөөк назар салышат. Ошол эле учурда өтө ачык эмес. Кыска, ачык кийинип алсаң да ою жаман жакка кетиши мүмкүн. Анан да орой сүйлөбөй, назик болууга аракет кылуу керек.
Экинчи кадам: Жагымдуу жылмаюу жана бардыгын түшүндүрүп туруучу көз караш – айымдардын мырзаларды тартуучу бирден-бир куралы. Сага көңүл бурбай жаткан адамга жылмайып кой. “Адамдын жан дүйнөсүнүн күзгүсү – көз” дегендей, сен жактырган мырзага көз караш менен баарын түшүндүрүүгө аракет кыл.
– Тажаткан фанаттарыңа кыйкырып, жаман сөз айтып салган учурларың болобу?
– Кээ бири чын эле аябай тажатышат. “Мынча мүнөтүңүздү бөлүп коюңузчу” дегенинен сүйлөшүп койсоң, балээге калдың, “жаным” деп алышат. Кээ бирөөлөр болот, “чалба” десем, “анда ала качып кетем” деп коркутушат. 23-февралдагы бир концертте күйөрманым “майрамың менен!” деп гүл берип жатпайбы. Элдин алдында кызарып, аябай жаман болгом.
– Учурда жигитиң барбы?
– Көз кырымды салып жүргөн бирөө бар. Ал менин бардык талаптарыма жооп берет. Бирок азырынча кыз-жигит эмеспиз.
– Үйдөгүлөр деле турмушка чык деп жатышса керек?
– Үйдүн кенжеси болгондуктан, чоңойсом деле апама кичинекей көрүнсөм керек. Апам “сен турмушка чыксаң, кошо барып алам го” дечү. Азыр “бактыңды табышың керек” деп көп айтчу болду. Мен да турмушка чыгуу тууралуу ойлоно баштадым.
Кундуздун төмөндөгү Талант аттуу фанаты Каракол шаарында жашайт. Ырчынын айтымы боюнча, аябай берилген күйөрмандарынын бири. Биз бул жигитке байланышканыбызда түнү бою жол жүрүп Бишкекке келип калды. Көрсө, жигит учурдан пайдаланып, Кундуздун келе жаткан туулган күнүнө гүлдесте берүүнү чечиптир.

– Талант, канча жылдан бери Кундуздун фанатысың?
– Сахнаны аттаганынан бери.
– Кундуздун айтымына караганда, сен күнү куру калбай телефон чалып, ыр жазып, СМС жиберип турат экенсиң...
– Өзүм акын эмесмин, бирок сүйүү жаздырып жатат. Телефон чалып тажаткан күндөрүм да болду. “Кундуздун жүрөгү бош эмес” деген ой келсе да, жетиш керек деп жүрөм. Жакында эле бир досум менен таарынышып кеттим. Ал Нелянын, мен Кундуздун таламын талаштык. Гезит беттерине Кундуз жөнүндө жаман макалалар чыгып калса да кадимкидей жинденем.
– Эгер Кундуз “мен үчүн жардан алыс секир” десе, секирет белең?
– Эгер Кундуз менин аркамдан секирсе, анда секирем. Бул жакка жалгыз өзүн таштап кетким келбейт.
– Жашың отуздун оозунда экен. Кундуз үчүн үйлөнбөй жүрөсүңбү?
– Мм, үмүттүн шамы өчпөйт да.
таланттын Кундузга жазган СМСтеринен

Туулган күнүң сенин жазда экен,
Тилегимди айтам азга мен.
“Эл ырчысы” деген наам албай,
Эч билинбей, Кундуз, калба сен.
Туулган күнүң сенин жазында,
Куттуктаймын достор сабында.
“Кандай белек берсем экен?” деп,
Мен жүрөмүн сенин камыңда.
Жакшы ырдайсың, аны билемин,
Жолуң шыдыр болсун, тилегим.
Концерт берсең эгер чоң залда,
Гүл көтөрүп сөзсүз келемин.
Оюң чыксын дайым оңунан,
Миллион тап кыргыз сомунан.
Кызыл гүлдү туулган күнүңдө,
Берейин өөп, өз колумдан.
Телефондо сенин ырың бар,
Укпай калсам болом зар,
Эгер сүйсөң, болом сага пар.
Кундуз, бүгүн кантип унчукпайм?
Туулган күнүң менен куттуктайм!

АШЫКТЫК КАТЫ
– Саламатсыңбы, Кундуз! “Карындашым, карагаттай карегиңден айланайын, кундуздай чачтарыңа байланганмын” деп катымды баштагым келди. Кундуз, сен алгач сахнага чыккан күндөн баштап жаным жай таппай келет. Сени көргөн сайын дене-боюмду жалын каптап, алоолонуп жана берем. Кээде кыялга батып кеткенде дүкүлдөп көкүрөктү жарып чыкчудай болгон жүрөгүмө бекем кысып, роза гүлүнүн желекчесиндей үлбүрөгөн эриндериңен өөп да алам.
Эх, мен 20 жаштан оогон кезде кайда элең? Эгерде ошол кезде сени жолуктурсам, сага жетүүгө бүт чамамды жумшамакмын. Чынын айтайын, азыр мен эр ортону элүүдөн ооп калдым. Бирок жүрөк кургур жашыма, үй-бүлөлүү экениме баш бербейт.
Учурда үч уул, бир кыздын атасымын. Улуу балам 19га чыгып калды. Ал да сени жакшы көрөт. Кээде үй-бүлөбүз менен чогуу телевизордон сени көрүп калсак, балам телмирип карап калат. Андан өтүп мен. Ошол жерден аябай жаман болом. Кадимкидей баламдан сени кызганам. Ушул учурда “Кундузумду канча эркек карап турат болду экен?” деп тим эле ичимден түтөп, бышып кетем. Кээде келечектеги жолдошуңду элестетип алып андан да жаман болом. Билбейм, картайганда мени Кудай урду, ашык кылып сага. Ооба, мен бул сүйүүмдү сага барып айта албайм. Бирок ак кагаздын бетине чиймелеп, кичине болсо да жеңилдене түштүм.
Мырзалы, Талас шаары

Бахияна Сатылганова
star@super.kg

 Кыстарылган видео