Ширин Муктарбекова: «ҮЙ-БҮЛӨМ ҮЧҮН ТЕЛЕДЕН КЕТИШИМ МҮМКҮН»

Ош шаарындагы ОшТВ телеканалы 2010-жылга чейин өзбек тилинде чыгып келген. Азыркы учурда Сюита Соурбаеванын жетекчилиги менен кыргыз тилдүү абройлуу телеканалга айланды. ОшТВнын “Таң шооласы”, “Өнөр” программаларынын телеалпаруучусу Ширин Муктарбекова менен маектештик.

ШИРИН КЫЗ ТУУРАЛУУ

Аты-жөнү – Муктарбекова Ширин Муктарбековна
Туулган жылы – 1990-жыл, 4-апрель
Туулган жери – Жалал-Абад облусу, Аксы району
Фобиясы – Түн
Хоббиси – Сууда сүзүү
Салмагы – 48 килограмм
Көп колдонгон сөзү – “Ошондой эле”, “айтайын дегеним”
Учурда «Таң шооласы», «Өнөр» программаларынын ре­дактору жана алып баруучусу

– Ширин, алгач эле маегибиз туулган айылыңдан башталсын...
– Мен айтылуу Аксы районунун абасы таза, суусу тунук Падыша-Ата айылында туулгам. Ал жерди жаратылышы аябай кооз, ка­сиеттүү жерлердин борбору десем жаңылышпайм.

– Бала кезиңден эле теле жыл­дызы болууну самачу белең?
– Ооба, күзгүнүн алдында туруп алып, өзүмчө эле диктор боло берчүмүн. Окуучу кезде кечелер менсиз өтчү эмес. Мектептин прези­денти болгондуктан, маданий иш-ча­раларды да өзүм уюштурчумун. Эрте кетип, кеч келсем, атам “жатып эле калбапсың мектебиңде” дечү.

– Журналистика тармагына кандайча келип калдың?
– ОшМУнун бизнес жана менеджмент факультетинде окуйм. Бул тармакка кастингге катышып келип калдым. Кастингден өтүп кеткеним менен, журналисттик билимим жок, эки сөздүн башын бириктире албай эле кыйнала берчүмүн. Азыр эми үйрөнүп калдым.

– Кандай комплименттерди көбүрөөк угасың?
– Теледен биринчи эле жүз кө­рүн­гөндүктөн, бет түзүлүшүмө комплиментти көп угам.

– Теледе жүз негизгиси эмеспи, келбетиңе кандай кам көрөсүң?
– Кечке күзгүнүн алдында отуруп, түркүн маскаларды жасаганга деле убактым болбойт. Табият берген сулуулук менен жашайм. Көп учурда алып баруучулардын беттери гримден бузулат. Биз көчөдө эле эмес, эфирге чыкканда деле көп боёнбойбуз.

– Акчаны көбүнчө эмнеге ко­ротосуң?
– Кесибим экономист болгондуктан, акчаны үнөмдөөнүн теориясын жакшы билем. Бирок аны практикада колдонуудан аксайм. Аялзаты болгондон кийин дүкөн бизге курбу болуп калат экен да. Жалтырап көзгө жакшы көрүнгөн нерсени ала бермей жагым бар.

– Жигиттерди көргөндө эмнесине биринчи көңүл бурасың?
– Жигит болгондон кийин жигиттик сапат­ка ээ болушу керек. Башка кыздар сыяктуу эле жигиттик мүнөзүнө көз чаптырам. Албетте, сүй­лөгөнүнөн көп нерсени байкаса болот.

– Бир жигит жагып калса, анын көңүлүн буруш үчүн кандай аракеттерди жасаар элең?
– Болгон аракетти дебейимби, тамаша. Кыздык намысты биринчи орунга коюп, жакса да биринчи өзү сөз баштамайынча мен эч кандай аракет жасабайм.

– Жактырган адамың “же телени танда, же мени танда” десе, эмне кылмаксың?
– Акча менен байлыктай эле жумуш да бир күнү кетет. Мен үчүн үй-бүлө биринчи орунда турат. Эгер мен жактырган адам кадырыма жете алса, анда албетте, анын сөзү менен болом. Үй-бүлөм үчүн теледен кетишим мүмкүн.

– Кандай белек алууну жакшы көрөсүң?
– Кандай экенин мааниге албаганда белектин өзү чоң кубаныч. Чын жүрөктөн берилген болсо, абайлап сактайм. Бирок кучак толо роза гүлүн жакшы көрөм.

– Жүрөгүңдүн ээси барбы?
– Жок, кыялымда элестеткен мырзага жолуга элекмин.

– Маегиңе рахмат, ийгилик!

Уулбү Каныбекова
Osh@super.kg