Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

2005-ЖЫЛ, 23-МАРТ. М.СУТАЛИНОВ: «К.Бакиевдин күнөөсү далилденсе, ага кылмыш иши козголот»

№334 27-март-2-апрель, 2009-ж.


Мындан төрт жыл мурда, 2005-жылдын 24-мартында болгон окуялар бир эле Кыргызстан эмес, жалпы Борбор Азия мамлекеттеринин, дүйнө коомчулугунун көңүлүн өзүнө бурган.
2005-жылдын 23-мартында бир күндөн кийин бийликтин алмашарын эч ким так билбесе дагы, кырдаалдын адаттан тыш курчуп турганы жалпыга маалым болчу. Оппозициянын 24-мартта Ала-Тоо аянтында өткөрмөкчү болуп турган митингин айтпаганда дагы Ош, Жалал-Абад, Таласта митингдер күн сайын өтүп жаткан. 27-февралда болгон парламенттик шайлоодон кийин анын жыйынтыктарына нааразычылык күчөп, жалпы республика пикет, митингдердин талаасына айланып бараткан. Түптө, Кочкордо башталган көчө жүрүштөрү өлкөнү каптаган...

Бир күн ичинде...

23-мартта Бишкекте «Интербилим» бейөкмөт уюмунун демилгеси менен «Биз чындыкты билгибиз келет» аттуу митинг өттү. Анын башкы максаты – бишкектиктерге өлкөдө болуп жаткан окуялар тууралуу чыныгы маалыматты берүү эле. Уюмдун жетекчиси Асия Сасыкбаева: «Бийлик элге бир жактуу маалымат таратып, эл дале болсо өлкөдө эмне болуп жатканын жакшы билбей жатат»,- деп чыкты.

Жаштар тобу...

Уркуя Салиеванын эстелигинин жанына негизинен «Кел-Кел» жана «Бирге» жаштар уюмдарынын 100гө жакын мүчөлөрү, бир катар бейөкмөт, коомдук уюмдардын өкүлдөрү чыгышты. Алар Ош жана Жалал-Абаддагы пикетчилердин талаптарын колдоорун билдиришти. Акция адеп жаңы башталганда эле 200гө жакын милиция кызматкерлери пикетчилерди автобуска жүктөп, Биринчи Май райондук ички иштер бөлүмүнө алып барышты. Окуя тууралуу «Кел-Кел» жаштар уюмунун жетекчиси Алишер Мамасалиев «Азаттыкка» ошол 23-мартта мындай деген эле: “Акция маалында «Кел-Келдин» 7 мүчөсү кармалды. Калгандары бейөкмөт уюмдардын өкүлдөрү, студенттер. Эл жөн гана Жалал-Абадда, Ошто эмне болуп жатканын билиш үчүн чыккан. Себеби КТР жана мамлекеттик гезиттер бир жактуу гана маалымат беришип, калпты таратып жатышат”.

28 адамды акыйкатчы бошоткон

Милиция тарабынан кармалгандардын арасында Кыргызстан элдик кыймылынын саясый кеңешинин мүчөсү Болот Шамшиев, «Демократия жана атуулдук коом үчүн» коалициясынын жетекчиси Эдил Байсалов, «Интербилим» бейөкмөт уюмунун өкүлдөрү, №1 Университет шайлоо округунан талапкер болгон Болот Марипов болуп, жалпысынан 28 адам бар эле. Ушул эле күнү кармалгандарга карата райондук ички иштер бөлүмүндө көчмө сот өтүп, алар Акыйкатчы Турсунбай Бакир уулунун кепилдиги менен бошотулушкан. Болот Мариповго эскертүү берилген.

Тартип сакчылардын шефтери алмашкан

Ушул 23-мартта президент Аскар Акаевдин жарлыгы менен вице-пре­мьер-министр жана ички иштер министринин милдетин аткаруучу болуп Кеңешбек Дүйшөбаев дайындалган. Ал эми премьер-министр Николай Танаевдин буйругу менен ички иштер министринин орун басарлыгына Султан Акаев, Темирбек Субанов, Сергей Баженов дайындалышкан.
Аскар Акаевдин дагы бир жарлыгы менен башкы прокурор Мыктыбек Абдылдаев ээлеген кызматынан бошотулуп, анын ордуна башкы прокурордун милдетин убактылуу аткаруучу болуп Мурат Суталинов дайындалган.

Башкы прокурордун маалымат жыйыны...

Ушул эле күнү К.Дүйшөбаев дагы, М.Суталинов дагы маалымат жыйынын өткөрүшкөн. Азыркы тапта Улуттук коопсуздук кызматын жетектеп турган Мурат Суталинов ошол күнү Ош, Жалал-Абадда облустук бийликтин имараттарын басып алгандарга жана Кыргызстан элдик кыймылынын (КЭК) жетекчиси Курманбек Бакиевге кылмыш иши козголушу ыктымалдыгын айткан. “Азыр алар мамлекеттик өтө оор бир топ кылмыштарды жасап жатышат. Сегиз берене боюнча: күч менен мамлекеттик бийликти басып алуу, массалык башаламандыкты уюштуруу, өзүм билемдик жана башкалар. Азыркы тапта жолдош Бакиевге каршы кылмыш иши козголо элек, бирок материал, фактылар даярдалып жатат. Эгер анын бул иштерге катышы далилденсе, биз мыйзамдын алкагында аракет кылабыз”,- деген эле андагы ашкы прокурордун милдетин аткаруучу, азыркы УККнын жетекчиси Мурат Суталинов.

Ал андан ары сөзүн улап: “Ош жана Жалал-Абадда­гы окуяларга тиешеси бар 400-500 адамга кылмыш иши козголот”,- деген. Мурат Суталиновдун ошондогу айтканы боюнча, түштүк облустардагы көтөрүлүштөрдүн башында баңги заттарды саткан адамдар турган. “Биздин колубузда “түштүк аймактарда күнү тууп жаткандардын башында кылмышка катышы барлар турат” деген айныгыс маалыматтар бар. Мен ал жакта баңги заттарды сатууга катышы барлар жүргөнү боюнча фактыларды келтире алам. Силер эл аралык баңги зат жолу Ооганстандан башталып, Кыргызстандан өтөрүн жакшы билесиздер”,- деген.
Ички иштер министринин милдетин аткаруучу Кеңешбек Дүйшөбаев болсо: “Өлкөдө Конституциялык тартип орнотуу үчүн керек болсо курал колдонууга даярбыз”,- деп айткан.

Акаев оппозиция өкүлдөрүн кабыл албай койгон

Ал аралыкта 23-марттын кечинде Жогорку Кеңештин депутаты Кубатбек Байболов, “Ата Журт” кыймылынын лидери Адахан Мадумаров жаңы Жогорку Кеңештин депутаттарын, оппозиция лидерлерин, ишкерлерди «Хаят» мейманканасына чогултуп, президент Аскар Акаев менен сүйлөшүүгө барууну талкуулашкан. Оппозиция даярдаган сунушта өлкөдөгү кырдаалды жөнгө салуу үчүн өкмөттү, Борбордук шайлоо комиссиясын, Жогорку Сотту кызматтан кетирип, үч айдын аралыгында президенттик шайлоо өткөрүү сунушталган.
Бул сунушту Ас­кар Акаевге айтуу үчүн Өкмөт үйүнө Жогорку Кеңештин депутаттары Аскар Салымбеков, Жан­төрө Сатыбалдиев, Акматбек Келдибеков, Өмүрбек Бабанов баштаган адамдар барышкан. Бирок аларды президент Аскар Акаев кабыл албай койгон.
Жиберилген кишилер премьер-ми­нистр Николай Танаевге, президенттик администрациянын башчысына гана жолугуп чыгышкан.
Андан бир күн мурда, 22-мартта жаңы шайланган парламенттин жыйынында премьер-министр Николай Танаев оппозиция менен сүйлөшүүгө бийликтин барбай турганынын себеби тууралуу: «Алар бийлик түзүмүн кайра калыбына келтирип, баштапкы абалга кайтып барышмайынча биз алар менен сүйлөшүүгө отурбайбыз»,- деген эле.
Аскар Акаев сүйлөшүүгө макулдугун бербей койгондон кийин Адахан Мудумаров «Азаттыкка» берген интервьюсунда: «Бул «Кыргызстандагы абал президентти таптакыр кызыктырбайт. Же болбосо бул абалды жөнгө салуу боюнча эч кандай чаралар көрүлбөйт» дегенди билдирет»,- деп айткан.
Ушул эле 23-мартта Кыргызстан элдик биримдигинин жыйыны өтүп, анда өлкөдөгү абал талкууланган. «Оппозиция сүйлөшүүгө даяр эмес» деген бийликтин сөзүнө карата Координациялык кеңештин төрагасы Курманбек Бакиев: «Абалдан чыгуу керек. Президент Акаев мырза акыр аягы абалды жөнгө салуу боюнча оппозиция менен сүйлөшүүгө даяр болду го деп ойлойм»,- деген.
Бирок Аскар Акаевдин айланасында дагы “оппозиция менен сүйлөшүүгө баруу керекпи же жокпу?” деген суроого келгенде талаш-тартыштар болгону белгилүү. Мисалы, жаңы шайланган парламенттин 22-мартта өткөн биринчи жыйынында депутат Бермет Акаева: “Оппозиция менен сүйлөшүүгө барбоо керек”,- деген. Жыйында өлкөгө өзгөчө кырдаал абалын киргизүү демилгеси дагы козголгон. Бирок аны президент туура көргөн эмес.
Президент Аскар Акаевди жактоочулардын бири, генерал Болот Жанузаков эмне себептен бийлик сүйлөшүүгө барбай жатканы тууралуу «Азаттыкка» берген интервьюсунда: «Президент да, премьер-министр да сүйлөшүүгө даяр. Бирок сүйлөшүүлөрдү жүргүзүү үчүн ага жагдай, шарт керек. Жанагинтип баарын талкалап, тоноп жатышса кантип сүйлөшүү болсун?! Бардыгын токтотуш керек. Ошондон кийин гана сүйлөшүү болот»,- деген эле.

Бороон алдында...

Бул аралыкта коргоо министри Эсен Топоев менен жаңы парламенттин депутаты Ташкул Керексизов баштаган топ Ошко барып, оппозициялык лидерлер менен пикир алмашкан.
Ушул эле 23-мартта Бишкектеги Максим Горькийдин эстелигинин жанында пикетке чыккан “Ар-намыс” партиясынын Эмил Алиев баштаган мүчөлөрүн, аларга кошуп Кочкор районунан келген 4 аялды Бишкек шаардык Ички иштер башкармалыгына алып кетишкен.
Ал эми бул күнү Москва районунун Ак-Суу шаарчасында пикетчилер экс-депутат Эркин Бөлөкбаевдин демилгеси менен боз үй тигишип, “Президент кызматтан кетсин!” деген плакаттарды илип, жол жээгинде 100дөн ашуун киши нааразычылык билдирип турушту.
Ал эми Кыргызстан элдик конгрессинин төрагасынын орун басары Алмаз Атамбаев 24-мартта Бишкектин Алматы-Ахунбаев көчөлөрүнүн кесилишинде митинг өткөрүүгө даярданып жатканы маалым болду.
Анын алдында КЭКтин төра­гасы Курманбек Бакиев күч органдарынын кызматкерлерине кайрылып, элге каршы курал колдонбоону өтүнгөн: “Сиздер аркылуу офицерлерге, солдаттарга кайрылгым келет. Мен элге каршы күч колдонбоого алардын акыл-эси жетет деген ойдомун”.

Мына ушундай, окурман. Мындан төрт жыл илгери толкуган калк Акаевди ээрден шыпырып түшөрдөн бир күн мурунку күндөгү урунттуу окуялар ушулар болчу.

Кубат Оторбаев
www.azattyk.kg



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: