Жалал-Абад облусунун “Эркиндик” аянтында учурда жаңылануу иштери кызуу жүрүүдө. Реконструкция боюнча, 25 миллион сомдук тендерди утуп алган “Транс-Юг-авто” ЖЧКсы жалпы аянты 13 400 чарчы метрди ээлеген мурунку борбордук аянтты сүрдүрүп, жаңы салып жатышат. Куруучу-инженер Азизбек Нурматовдун айтымында, аллеяларга мрамор таштар төшөлүп, айланасы газон, ландшафттык дизайн менен кооздолууда. Андан сырткары бири музыкалуу, экинчиси жөн эле атылып турган түркүн түстүү эки фонтан да коюлуу алдында турат.
“Иш 25-апрелде башталган. Учурда 60 пайызы бүтүп калды”,- деп куруучулар кубанышууда. Борбордук аянт 31-август – Эгемендүүлүк күнүнө карата жаңыланып, бүтүп калышы пландалууда. Андан сырткары жанындагы эле “Эл достугу” аталган сейил бакта да ушундай жаңылануу иштери башталды. Буюрса, майрамда Жалал-Абаддын тургундары жаңы аянтта жетелеше басып калышат.