ОТУНБАЕВА & БАБАНОВ. ТАНДЕМ БОЛУШУ МҮМКҮНБҮ?

"Роза Отунбаева менен Өмүрбек Бабанов бирикти" деген кептер Ак үй тарапта талкуулана баштады. Күздөгү, андан аркы саясий күрөштөргө чогуу барышары айтылууда. Мындай тандем бекем болуп, калктын ишенимине ээ боло алабы? Серепчилер эмне дейт, байкап көрөлү.

Табылды Акеров,
серепчи:
– Отунбаева менен Бабановдун биригип, саясатка аралашуусу үчүн Бабанов коомдо өзүнө жакшы пикир жаратышы керек. Мисалы, Келдибековго окшоп тырышып, митингдерди уюштурбай премьерликтен кетип, рейтингин бир калыпта кармап турса жана парламенттик, башка шайлоолорго чыгууга мүмкүнчүлүк жаралса гана Отунбаева Бабанов менен биригип чыгышы мүмкүн. Андай учурда Бабановдун мурунку саясий имиджи бир топ тоскоол болот. Көп чатактарды, буюртма материалдарды чыгарат. Ал өз кезегинде Отунбаеванын рейтингине терс таасир этет.
Экинчиден, “Отунбаева менен Бабанов биригип жатат” деген сөздөрдү “бабановчулар” өздөрү деле чыгарышы мүмкүн. Бабанов саясий маалымат талаасында өтө бекем, акчанын күчү менен бир катар маалымат булактарын өзүнө каратып алган. Өзүнүн аналитикалык тобу бар. ММКларга чыккан саясатчылардын, эксперттердин ар бир билдирүүлөрүн ошол аналитикалык топ изилдеп, анан аларга каршы контр ыкмаларды ойлоп табышат. Башка саясатчылардын биринде да мындай аналитикалык топ жок. Отунбаева-Бабанов тандеми да ошондой ыкмалардын бири болуп калышы мүмкүн. Себеби Отунбаева дүйнөдө да аты белгилүү, Кыргызстанда да таасир берүүчү инсан. Бабановду ага жалгаштырып, рейтингин кармап туруу максаты болушу да мүмкүн.
Эмне үчүн чет элдеги кыргыздар “Мекендештер” жана “Замандаш” болуп бөлүнүп калышты? Муну Отунбаеванын максаты, Бабановго сырттагы бардык кыргыздарды бириктирип, ошолордун добушун алып берүү болуп, “Замандаш” партиясы буга каршы болуп өзүнчө калды деп жорууга да болот.
Отунбаева-Бабанов Убактылуу өкмөттүн тушунда Кыргызстандагы бүтүндөй сарууларды бириктирүү аракетин көрүшкөн. Экөө тең саруу. Мындайча айтканда, ошол кезде эле президенттикке Бабановду алып чыгуу аракети каралган.

Турат Акимов,
серепчи:
– Мындай тандем эч кандай колдоого ээ боло албайт. Бул экөөнүн биригиши – жөн эле айтылып жаткан сөз. Отунбаеванын бүгүн Бабановду колдоп, алдыга жетелеп кетишине ишенбейм. Бабанов арызданышы мүмкүн, “эже, биз тил табыша албай калдык, тигиндей, мындай” деп. Ал эми Бабанов бүгүн кызматтан түшсө эмне болот? Көп болсо оппозициялык маанайга өтүп же өзүн келечектеги президент катары жарыялап, Адахан Мадумаров сыяктуу бир-эки жылдап үгүттөө жасап жүрө берет.
Менимче, Бабанов-Отунбаева тандеминин түзүлүшүнө эч кандай мүмкүнчүлүк жок. Бул экөө бири-бирине кандай жардам бере алмак эле? Отунбаева өзү президент болуп турган убакта эмне иш жасап кыйратты?

Айылчы Сарыбаев,
серепчи:
– Мен Бабановду саясатчы эмес, бизнеси үчүн саясатта жүргөн киши деп эсептейм. Ал Отунбаева менен биригеби же Отунбаева аны менен биригеби, бул алардын жеке иши. Алардын канчалык деңгээлде мамлекеттин саясатына таасир эте алары чоң суроо. Себеби жакшыбы-жаманбы, Отунбаева өткөөл учурда тынчтык жолу менен президент шайлоого мүмкүнчүлүк берди. Ал өз миссиясын аткарып бүттү. Эми өлкө үчүн экс-президент катары салымын кошо берет деп ойлойм. Бабанов, албетте, өкмөт башчы бойдон калууга аракет кылат, акчасын жумшайбы, күч органдарын жумшайбы... Бабановго каршы да өлкөдө толтура прогрессивдүү күчтөр бар, жаштар, андан да күчтүү өзүбүздүн саясатчылар бар. Мындан трагедия кылыштын кереги жок. Эгерде Бабанов өкмөт башчы катары “өлкөнү өнүктүрдүм, коррупцияны жойдум, элдин турмушу оңолуп кетти” деп өзүнө ишене алса, мындан ары да жакшы иштей аларын далилдей алса, каршылык жок. Азырынча көзгө көрүнө турган эч бир иш бүтүрө элек. Отунбаева экөөнүн биригип, алдыдагы күрөштөргө чогуу чыгышы – бүдөмүк нерсе. Булардын кол кармашып кетерине анча деле ишене бербейм.

Автандил Добулбеков
politika@super.kg