Ассоль Молдокматова:«БИЗДИН МЫЙЗАМДУУ НИКЕБИЗ БААРЫНЫН ООЗУН ЖАПТЫ»

Көптөгөн эл аралык сыйлыктардын ээси, өзүн чыгармачылык жааттын көп тармагында сынап көргөн Ассоль Молдокматова учурда Лос-Анжелесте жашайт. Ал Кыргызстанга иштери менен келип, бизге маек куруп берди.

«АТА-ЭНЕСИЗ БАЛДАР БОЛБОСО ЭКЕН»
– Атам Абдыкалый Молдокматов белгилүү журналист болгон. Менин төрөлгөнүмө 11 ай болгондо эле бул дүйнө менен кош айтышкан. Жалгыз бой калган ар бир энеге балдарды тарбиялоо кыйынга турат. Ошентсе да апам башын бийик көтөрүп, кайгыга алдырбады. Мени күчтүү кылып тарбиялаган апам “Ассоль, сен кыйынсың. Дайыма алдыда жүр” деп ушул убакытка чейин дем-күч берип келет. Үй-бүлөбүз карапайым калктын катарын толуктачу, көпчүлүк сыяктуу айлыктан айлыкка чейин жашап күн өткөргөнбүз. Ошонун баарына чыдаган апам – азыр менин баа жеткис байлыгым.
Апамдын атасы да эрте каза болуп, балдар үйүндө чоңойгон экен. Кичинекей чагымда “апа, мен бутума турайын. Ошондо бардык балдар үйүнө жардам берем” деп убада берген элем. Соңку 9 жылдан бери балдар үйүнө каттап турам. Ал жердеги балдардын көбү мени “апа” деп аташат. Бала чагымдан бери тилегеним, өлкөбүздө ата-энесиз балдар болбосо дейм.

«ӨЗ БАКТЫМДЫН КУЛУМУН»
– Ар мүнөтүм алдын ала пландалган. Бардыгына жетишкенге аракет кылам. Учурда камкор жубаймын, энемин. Үч апта Лос-Анжелесте жашасам, 1 жумам Кыргызстанда өтөт. Бир жуманын ичинде телеканалдардын биринде таңкы эфирди алып барам, Мода үйүмдө кардарлардын кийимдеринин үстүндө иштейм. Иши кылып таңкы 5те күнүм башталып, түнкү 1де аяктайт. Үстүбүздөгү жылы Нью-Йоркто өткөн дизайнерлердин сынагында баш байгеге ээ болуп, актёр Кери Тагава сыйлык тапшырган. Бул эмгегимди БУУ баалап, дүйнөгө кыргыз маданиятын таанытып жатканым үчүн атайын грамота менен сыйлады. Ошондон кийин мени Американын орус тилдүү радиосуна мода жаатында долбоорду алып барууга чакырып, ошол жакта да иштөөдөмүн.
Баса, 15-18-ноябрда Голливудда өтүүчү “Дүйнө сулуусу” сынагынын калыстар тобуна кошулдум. Жакында эле Голливуддун академиясында бет жасалгалоо курсун аяктап, азыр окуумду менеджмент тармагында, ошондой эле актёрлор академиясында улантып жатам. Америкада окуу кымбат. Анын үстүнө ай сайын Кыргызстанга келип турсам, көп каражат талап кылынат. Адам чыдагыс график менен иштеп, 12 жашымдан бери өз бактымдын кулу болуп келем.

«АЛМАЗБЕК – БАЛАМДЫН МАШЫКТЫРУУЧУСУ»
– Уулдарым Жан менен Шабдандын төрөлүшү, Лас-Вегаста болгон Алмазбек Раимкулов экөөбүздүн тоюбуз жашоомдогу унутулгус мүнөттөрдүн бири. Балдарым да чоң-чоң ийгиликтерди жаратса дейм. Убактымдын тардыгына карабай, аларга туура тарбия берүүгө аракет жасайм. Эрте жашынан баштап эле балдарыма “сен – жеңүүчүсүң!” деп айтып келем. Ошон үчүн алар жаш экенине карабай ийгилик жаратып келишет. Мисалы, Жан 7 жолу бий боюнча Дүйнө чемпиону болду. Шабдан да чет тилдерин үйрөнүп жатат. Жайкы каникулда Алмазбек Шабданды бокс боюнча машыктырды. Эми жакында анын алгачкы мелдеши болот. Буюрса, Жаңы жылды чемпиондорум (ред. балдарым, Алмазбек) менен Америкада тосолу деп жатабыз.

«УШАК СӨЗ ЖӨНӨКӨЙ АДАМДАРДЫ ДЕЛЕ ЭЭРЧИЙТ»
– Белгилүү адам болгондон кийин сени ушактардын жакшысы да, жаманы да ээрчийт. Мени нес кылган абал Алмазбек экөөбүз баш кошконубуздагы маал болду. Биз тууралуу эмне деп гана жазып чыгышпады?! Кыргызстандын жана Американын мыйзамы менен жубай катары каттоодон өткөндөн кийин, ушак чыгарып, жаман сөз айткандардын баары ооздорун жабышты. Эң башкысы, Алмазбектин ата-энеси батасын берип үйлөндүрүшүп, бактылуу үй-бүлөлөрдүн катарындабыз.
Чыңгыз Айтматов бир кезде жакшы кеп айткан эле: “Өзүнүн уятын жашырыш үчүн башка бирөөнү уят кылат”,- деп. Андыктан менин алтын эрежем бар. Адамдар тууралуу эч качан жаман сөз айтпайм. Ушактарга да көңүл бурбайм. Философиялык жактан караганда, атактуу эле эмес, жөнөкөй адамдардын аркасынан деле сөздүн жаманы да, жакшысы да ээрчийт.

«МЕКЕНИМДИН ТАГДЫРЫНА КАЙДИГЕР ЭМЕСМИН»
– Океандын ары жагында жүрсөм да, Ата Мекенимдеги кырдаал мени түйшөлтпөй койбойт. Азыр Кыргызстан бийлик кризисинде турса да, эртең өлкөмдүн гүлдөп өсүшүнө бекем ишенем! Ага салым кошууга даремети жеткен саясий уюмдардын арасынан "Ата Мекенди" белгилейт элем. Өзүм да бул партиянын акыркы жылдардагы ишмердигине аралашып жүрөм. Бул партия өлкөбүздүн саясий түзүлүшүнүн тарыхында жазылып калат, ошого татыктуу салымы, иштери, окуялары бар.

Айдай Асанбекова
koom@super.kg