КАР КӨЧКҮДӨН КАНТИП САКТАНУУ КЕРЕК?

Кылычын алып кыш келе жатпайбы, андыктан табияттын ар кандай «эркелигин» көтөрүүгө даяр болушубуз кажет. Баткен облусунда жаратылыштын табигый кырсыктарында өзүн кантип алып жүрүү жөнүндө КРнын ӨКМисинин Баткен облусу боюнча башкармалыгынан маалымат алып, окурмандарга көрсөтмө катары берүүнү чечтик.

ЭМНЕНИ БИЛҮҮ ЗАРЫЛ?

Жол жүрөрдө аба ырайы жөнүндө маалыматты, унаа жолдорунун абалын, кар көчкү түшүү коркунучун жалпы маалымат билдирмелеринен же ӨКМнин ыкчам күзөтчүсүнөн билүү кажет.
Тоолуу аймактарда же кар көчкү түшүү коркунучу бар жолдордо жол кызматчылары белгилеген унаа арасындагы аралыкты бекем сактоо керек.

КӨЧКҮДӨ ӨЗҮН АЛЫП ЖҮРҮҮ ЭРЕЖЕЛЕРИ:

Көчкү өтө бийик жерден түшүп келе жатса, унааңыз менен тез өтүп кетүүгө аракет кылыңыз. Эгер жөө болсоңуз, тез чуркап коопсуз жерге барыңыз же жар астына бекинип тура калууга болот (жаш бактардын артына бекинип турбаңыз).
Эгер качып кете албай калган абалда калсаңыз жүгүңүздөн бошонуп, тизеңизди ичиңизге бүгүп, көчкү келе жаткан жакка далыңызды салып жата калыңыз.
Оозуңузду жана мурдуңузду моюн орогучуңуз, жакаңыз менен жаап, көчкүнүн үстүндө карманууга, ылдамдыгы азыраак жээгине чыгууга аракет кылыңыз.
Мүмкүн болсо, өйдө чыгууга аракет кылыңыз.
Көчкүнүн алдында калсаңыз, күчүңүздү сактап өзүңүздү кармап, уктабаганга аракет кылыңыз.
Эгер кичине оюк тешип алсаңыз, бирок чыга албасаңыз, кыйкырып куткаруучулардын көңүлүн өзүңүзгө бурсаңыз болот. Сизди сөзсүз табышат.
Коопсуз жерде болуп калсаңыз, аймак башкармалыгына көчкү жөнүндө билдирме жасаңыз жана жабыркагандарга жардамдашыңыз.

ҮШҮК АЛГАНДА БИРИНЧИ ЖАРДАМ
От жагылуучу бөлмөнүн ичинде үшүк алган дене бөлүгүн жумшак кездеме менен ушалап жылытыңыз, андан кийин жылуу сууга салыңыз жана суу температурасын 40-45 градуска чейин акырындап жеткириңиз.

Бегайым Тажибай кызы
batken@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (1)

Cho

2012-11-26 23:45:19

кудайым кочкудон озу сактасын баардык кыргыз элими

Комментарий калтыруу үчүн өз ысымыңыз менен кириңиз же каттоодон өтүңүз.

№ 525, 23-29-Ноябрь, 2012-ж