Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

АЯЛЗАТ – ААЛАМ АЖАРЫ!

№540 8-14-март, 2013-ж


Баарыбызга өмүр тартуулап, чоң түйшүктү мойнуна артып, чоң жоопкерчилик менен бала тарбиялап, үзүлгөндү улап, улуулукту, сулуулукту даңазалап, үйдүн куту, түндүктүн түркүгү болуп келе жаткан бул – аялзаты экенин эч ким тана албаса керек. Аны эмнеге гана теңебедик? Айга, Күнгө, Жылдызга... Мындан да чоң нерсеге теңегибиз келет. Бирок сөз кургуруң табылбайт тура. Кыска гана «Бар болгула, айымдар! Силер ыйлабагыла, силердин жылмаюуңар өчпөсүн, силердин сүйүүңөр, мээримиңер түгөнбөсүн» дегибиз келет.
Мындан бир ай мурун «Супер-Инфо» гезити 8-Март– Аялзатынын майрамынын урматына карата «Аялзат – аалам ажары!» аттуу сынак жарыялаган эле. Редакциянын дарегине келген каттардын ушунчалык көптүгүнөн кыргыз эли сөз баккан калк экендигине дагы бир жолу ынандык. Биринен сала бири мыкты, жүрөк түпкүрүнөн жаралган эмгектер. Жеңишке баары татыктуу. Бирок сынак болгон жерде сөзсүз жеңүүчү болот эмеспи. Редакциялык жамаат ары тартышып, бери тартышып отуруп 10 талапкердин эмгектерин баса белгилешти.

8-Март – Аялдардын эл аралык майрамына карата уюштурулган "Аялзат – аалам ажары!" сынагыбыз жыйынтыкталды. «Мыктынын да мыктысы болот» дегендей, алдыңкы 3 орунду акындар Зайырбек Ажыматов, Улукбек Жайчыбеков жана Бердибек Жамгырчиевдин
чыгармалары ээледи. Алардын айрым
ырларына орун бердик.

ЭНЕЛЕРГЕ ТААЗИМ
Бала үчүн чыркырап жаны дайын,
Бала үчүн арналган баары дайым.
Кантип сыят зор түйшүк жүрөгүңө,
Кагылайын, апалар, кагылайын?!
Жок эч нерсе сиздерге теңегенге,
Жок таамай сөз баалоочу энелерге.
Аздык кылат салмагы Ай, Күн, Жердин,
Апалардын эмгегин ченегенге.
Үмүттөр көп өмүрдө акталбаган,
Үшкүрүктөр көңүлдө катмарлаган.
Энелер, ай, антсе да мээрим төгүп,
Эссиз уулун бапестеп, кастарлаган.
Апалар, ай, ак дилин ката албаган,
Апа деген – асылдык катарлаган.
Мен эле эмес, менсинген далай акын,
Мээримиңди сөз таап жаза албаган.
Ар учурда ырыс-кут жандаганың,
Айланышат асылга кармаганың.
Ак дилимден силерге таазим этем,
Айланайын, апалар, айланайын.

МЕЛМИЛ
Бир сулууга жолуктум Мелмил деген,
Сулуулукка, мээримге мелмилдеген.
Эриниме төшөлүп эриндери,
От ичкенди үйрөндүм эрдим менен.
Жаңырууда, бардыгы жаңырууда,
Жалын, оттор денемде агылууда.
Катаал күндөр какшытып катып калган,
Каным ташыйт дүркүрөп тамырымда.
Сенсиз мокоп, жашоодон сууп келдим,
Сүйүү, сүйүү – туткасы улук жердин.
Согуп жүрөк демиңден демиктирген,
Соолуп жаткан жеримден туруп келдим.
Башым тийип Күн, Айга тура калсам,
Аңкайышат аскалар улагамдан.
Мен өзүмдү эң бийик сезип турам,
Корком, корком, эх, андан кулагандан.
Мелмил, Мелмил, Мелмилим, мелмилдеген,
Мээрим бердиң, күч бердиң мен билбеген.
Кайнап турса канымда улуу сүйүү,
Кармашууга даярмын мезгил менен.

Зайырбек Ажыматов

ЖУБАЙЫМА
Жан дүйнөм ооруп турса,
Сен күчтүү дарыдайсың.
Сулуу жүз, мээрим менен,
Оорумду дарылайсың.
Көзүмдү карап турсаң,
Бал тапкан аарыдайсың.
Сүйүүнү ыйык тутуп,
Мынчалык ак жүрөксүң.
Ыймандуу мүнөз менен,
Сен мага чын сүйөксүң.
Кимгедир бирөө сулуу,
А мага сен чүрөксүң!
Атадан жетөө болуп,
Тууганга бай болсом да.
Сен жокто жалгызсырайм,
Көңүлүм шай болсо да.
Чыйрыгып үшүгөнсүйм,
Табигат жай болсо да.
Жашоодо дем-күч болгон,
Аман бол, асылзатым.
Эрим деп ызааттаган,
Акылдуу аруузатым.
Бүт өмүр сага тартуу,
Мээримдүү АЯЛЗАТЫМ!!!

ЭНЕКЕ
Энеке, көп ойлоном,
Ишенсең, ичтен ыйлайм.
Элге окшош эмесмин деп,
Өзүмдү өзүм кыйнайм.
Адашып жүргөнсүймүн,
Денеме жаным сыйбай!
Энеке, ойлойсуң го,
Бул балам ойлонбойт деп.
Көр турмуш тирлигине,
Карайлап корголойт деп.
Кичине тыңый түшсө,
Корсоңдоп ойдолойт деп.
Ооба, ЭНЕ, туура ойлойсуң,
Билесиң мүнөзүмдү.
Антсең да артык көрөм,
Дүйнөдө бир өзүңдү.
Тирлик деп жан талашкан,
Сага арнайм күрөшүмдү.

Улукбек Жайчыбеков

КӨЛӨКӨ АЙЫМДАР
Байкалбаган сыр менен ороп нурга,
Башталышы айымдар жомоктун да.
Керек болсо өмүрдүн бир мүнөтүн,
Келбей турат силерсиз короткум да.
Кылым жазсак бүтпөстүр дастан дагы,
Гүл чыгарган жансыңар таштан дагы.
Жалган бекен, чынында силерсиңер,
Жашоодогу жез кемпир, мастан дагы.
Оо, айымдар, кай бирин айтам дагы,
Оңой эмес сырыңар байкалмагы.
Эркелетип периште дейбиз бирок,
Экениңер чындык да, шайтан дагы.
Деңиз болуп сезимин жашырчулар,
Күн жылыса күлүңдөп ачылчулар,
Көөдөндөгү байлыкты уруп койбой,
Көр дүйнөнүн көркүнө сатылчулар.
Каректерге катылып, жашынчулар,
Алтын, күмүш көрсө баш урчулар.
Жан дүйнөнүн байлыгын бат унутуп,
Жалган, кооз дүйнөгө жакынсыңар.
Анткен менен а бирок, эх, перилер,
Айды самап кыялда жетпедиңер.
Чөнтөк бошто силерге жагыш кыйын,
Чөнтөк толсо жабышып кетпедиңер.
Күнүмдүктү ойлогон, эх, перилер,
Күн чыкканда жабышып кетпедиңер.
Күн бүркөлсө таптырбай житип кетчү,
Көлөкөгө опокшош көп жериңер.
Кай бир кезде өмүргө түн түшүрөр,
Кандуу жолго азгырган түлкүсүңөр.
Бирок канча амалга салсаңар да,
Бийлигине ээ кылбайт бүркүтүңөр.
Кызыгы көп, шыңкылдак күлкүчүлөр,
Тирүүлүктүн түгөнгүс мүлкүсүңөр.
Из жашырып коктуда жүрсөңөр да,
Илип кетет баары бир бүркүтүңөр.
Айымдар, ай, чынында түлкүсүңөр,
А жигиттер силердин бүркүтүңөр.

Бердибек Жамгырчиев

ЭРКЕКТИН ТЕҢ ЖАРЫМЫ – АЯЛЗАТ!
Эркекке эриш-аркак жөлөк болуп,
Куш сымал бөлөк үйгө барып конуп.
Аялзаты көз ирмемде ошол үйгө,
Капырай, калат экен бүлө болуп.
А бирок кай бир эркек макоолонуп,
Аялдын баркын билбейт, кагып-согуп.
Энелик мээрим менен аялзаты,
Чыдайт экен балдарынын багын коруп.
Турмушта ар кыл тагдыр жолун тооруп,
Кыйналып, кысталса да жүрөк ооруп.
Ачууга алдырбастан аялзаты,
Жашайт экен калбастан гүлдөй соолуп.
Аял-эркек ээрчишип жупташпаса,
Жүрөктөр ташка айланат, муздай тоңуп.
Бири-бирине баш ийип ыкташпаса,
Көл-дайра көз ирмемде калат соолуп.
Бир гана баркын билер жары болсо,
Аялзат асмандагы айдай толуп.
Эх, чиркин, эң бактылуу эне болмок,
Башына эч түгөнгүс бакыт конуп.

Жазгүл Бейменжан кызы

КЕМПИРИМЕ
Кыялың көрүп оолуккам,
Кызыгып жүрүп жолуккам.
Кемпирим болдуң балпайган,
Кыз элең, кызыл жоолукчан.
Кемпир да болсоң керексиң,
Кеп салып кечке эрмексиң.
Кычышса аркам жүдөтүп,
Кандыра тырмап бересиң.
Калыңдап төшөк саласың,
Кабаттап жууркан жабасың.
Кайыгып үшүп калба деп,
Кымтылап жылуу жабасың.
Күч-кубат жетип турганда,
Карылык деген тамаша.
Көлөкө жерге багармын,
Кейибе, кемпир, мен барда.
Казан-аяк бир кагышып,
Кээде тетир карашып.
Капалык тарап бат эле,
Калчы элек кайра жарашып.
Койнунда жатсам кучактап,
Коңурук тартат коркурап.
Көнүп да калган көнүмүш,
Коёмун башты тумчулап.

Абдыжапар Мураталиев

АЯЛ – МЕН!
Аялсыңбы – бактылуусуң анда сен,
Ал бакыттын бир үзүмүн таткан мен.
Таразасы салынган тагдырымдын,
Арабасын тартып келе жаткан мен!
Сүйүү менен, үмүт менен курам чеп,
Менин үйүм – кичинекей мамлекет.
Чырпык менен чынар кылам уямды,
Бузуп салып, басып кетпе, АЯЛ деп!
Адамдар бар, арабызда эсирген,
Теңсинбестен топуракка тепсеген.
Тебеленип ылай, чаңда калсам да,
Моюн бербей, баш көтөргөн АЯЛ – мен!
Ыйласам да, сыртымдан күлүп турам,
Кыйналсам да, үмүттүн үйүн курам.
Ааламдын бир бурчунда тукум улап,
Бул жашоону АЯЛ – мен сүйүп турам!

Акмөөр Өмүркул кызы

АЯЛДАР – АЛЛАНЫН АМАНАТЫ
Аял назик...
Оорутуп жүрөктөрүн,
Кыйкырып, катуу сөз айтпагыла!
Ал ишенчээк...
Жалган айтып,
Кыянаттык кылбагыла!
Ишеничтин дарбазасын жаппагыла!
Кыяматта жооп берерсиң,
Аялзатын аздектеп сактагыла!
Эркектерге тапшырган Алла Таала,
Аялдар – аманаты Жараткандын,
Дегени бар, азирети пайгамбардын...
Ооба, ооба...
Аял назик, аял ыйык...
Аялзаты көлдөй терең, тоодой бийик.
Аял улуу, аял сулуу...
Аялдын жок жаман аты.
Аялзаты Айдай аппак, Күндөй нурдуу,
Ардактап жүрөлүчү аялдарды,
Анткени алар – Алланын аманаты...

Медербек Кадыров

КЫЗЫМА КЕРЭЭЗ
Жаш өткөндө кайгырдым, кызым,
Түгөйүмдөн айрылдым, кызым.
Түшүнөр деп ата сырын,
Бел кылып сага кайрылдым, кызым.
Энеңди эстеп мен бүгүн, кызым,
Көз жашым төгүп бөксөрдүм, кызым.
Башыма жазган багыма көнүп,
Көп күндү минтип өткөрдүм, кызым.
Энеңе берген ал белек, кызым,
Акыркы экен билбепмин, кызым.
Колума кайра тийди деп эми,
Жакшылык күндү тилепмин, кызым.
Тагдырга жазып оор күндү, кызым,
Түтүнсүз күйүп-жаныпмын, кызым.
Айталбай кайгым ичимде түнөп,
Жалдырап жалгыз калыпмын, кызым.
Кыштын узун түнүндө, кызым,
Төшөктө уктап жата албайм, кызым.
Өзүңдүн кайгың таштан оор болсо,
Батынып сырым айта албайм, кызым.
Өзүңдү сакта, сен жашсың, кызым,
Башыңа жаздык коюп кой, кызым.
Жакшылап жашап, кайраттуу болуп,
Мен өтүп кетсем, көмүп кой, кызым.
Эч кимге оордук тийгизбейм, кызым,
Кыйналсам дагы билгизбейм, кызым.
Алдымда канча өмүрүм калса,
Силер деп жашап, жол издейм, кызым.
Бардыгын камдап коёмун, кызым,
Мезгили жетсе айтайын, кызым.
Эч кимди кыйнап, оорутпай ичин,
Жерге мен тынч жатайын, кызым.

Токтобек Жолдошев

МИЛИЦИЯНЫН АЙЫМДАРЫ
Катарда бирге турган жанымдагы,
Ийининде жылдызы бар тагынганы.
Кызматын так аткарып иштеп келет,
Бүгүнкү милиция айымдары.
Катардын эң алдыңкы сабындагы,
Тапанча болуп кээде тагынганы.
Жигиттен кем калышпай кызмат өтөйт,
Бүгүнкү милиция айымдары.
Өткүрлүк, чечкиндүүлүк канындагы,
Мүнөзүң кээде өрт да, жалын дагы.
Үйүнө барса назик, камкор эне,
Бүгүнкү милиция айымдары.
Катталган кылмыш иши аныктаары,
Тергөөгө алып, бекем тастыктаары.
Чындыкты таразалайт акыйкаттуу,
Бүгүнкү милиция айымдары.
Кызматта кечке жүрүп сагынганы,
Урматтап, башын ийип багынганы.
Балдары, арзып тапкан жан шериги,
Бүгүнкү милиция айымдары.
Сактаган кыргызымдын салтын дагы,
Сыйлаган кайын журтун айылдагы.
Ыйбалуу кыз-келиндер, мисс-перилер,
Бүгүнкү милиция айымдары.

Ырысбүбү Сагымбаева

Нарындан атайын келген сынактын эң улуу катышуучусу, 83 жаштагы Сынжыбек Байбосунов ата "жубайлар тең арып, карышса" деген тилегин айтып, жалпы айымдарга ыр белек сунду.

8-МАРТ – КУТ МАЙРАМ!
Майрамдын баары кут майрам,
Биринен бири кем калбайт.
Өзгөчө шаттуу курч майрам,
8-Март майрам!
Ааламдын эли аздектеп,
Ардактап айтат алтынды.
Алтындан кымбат асылга,
Салыштырчу зат барбы?
Аял – баарыбыздын энебиз,
Сыймыгын айтып келебиз.
Жок болсо аял заматта,
Айланы таппай кетебиз.
Ай, Чолпон болуп жаркыган,
Байбичең турса жаныңда.
Кубаныч толуп койнуңа,
Бүткөн бой эргип, балкыган.
Касиеттүү байбичем,
Он балага эне эле.
«Баатыр эне» аталып,
Кадыр-барктуу жан эле.
Улуу майрам, улуу күн,
8-Март дейбиз.
Ушул күнү төрөлүп,
Түгөйү болуп эгиздин,
Кош майрам коштоп өңөрүп.
Белгилеп жылда турчу элек.
Өң тааныш, эл-журт кадырлап,
Бир тууганы, балдары,
Салтанат майрам курчу элек!
Элүү жыл иштеп мугалим,
Чарбадан иштеп отуз жыл.
Күч-кубат берип байбичем,
Алдыңкы сапты бек кармап,
Эмгектен чыкты атагым.
Эми өзүңдөн калдым ажырап.
Сыйпалап ордуң таба албай.
Мүңкүрөп турам баса албай.
Байбичемдин кыздары,
Ар жерде иштеп жатышат.
Кут болсун деп майрамың,
Куттуктоо айтам кадырлап.
Куруп кеткен үй-бүлөң,
Шаң курап турсун жадырап.
Улуу кызым Гүлмайрам,
Ат-Башыда райондун,
Ардактуусу, атуулу.
Көп жылдар тынбай иштеген,
Кызматында барктуусу.
Мектепте завуч, директор,
Агартуунун мыктысы.
Райондо депутат,
Иштеп келет татыктуу.
Эльмира менен Илина,
Ден соолуктун сакчысы.
Гүлмира кызым шаарда,
Тийиштүү кызмат аткарып,
Жашоого ыкчам, шаттуусу.
Жалпы эле куттук айтамын,
Дүйнөнүн аялзатына.
Клара Цеткин колдогон,
Эркиндик, теңдик баарына.
Тынччылык болуп дайыма,
Урматын сактап аялдар.
Жашоосу шаңдуу кут болуп,
8-Март күндү
Майрамдап турсун жабыла!

Сынжыбек Байбосунов

Сынакка демөөрчүлүк кылган өнөктөштөрүбүз: «Келдике» зер үйүнө, «Куликовский» кондитердик үйүнө жана «Дархан» ишканасына терең ыраазычылык
билдиребиз.

Дамира Арстанова
lira@super.kg



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  2 
Комментарийлер(3)
11.03.2013. 22:49 
Тайпасы:
Тартип бузгандар
Комментарийлердин саны:
107
Катталган:
09-09-2012
Соӊку аракети:
28-05-2015 20:29
Жынысы:
Белгисиз
0
Ажыматов акын болуп сынакка катышканы уят!!акча же белек керек го менимче,же женебизге белек таппай калганбы?
12.03.2013. 10:47 
Тайпасы:
Жаран
Комментарийлердин саны:
174
Катталган:
08-04-2011
Соӊку аракети:
07-04-2017 23:34
Жынысы:
Белгисиз
Калаасы:
BISHKEK
0
Ким ал Аыжматов?
12.03.2013. 18:52 
Тайпасы:
Кыймылы жок
Комментарийлердин саны:
77
Катталган:
14-03-2009
Соӊку аракети:
09-12-2014 18:03
Жынысы:
Белгисиз
0
"Супер-Инфо" сынакта акындар катышпасын деген шарт койгон эмес, жарнакты дагы бир жолу, козду чон ачып окуп койсон болот,prezent. Ырды акындар жаратпаганда ким жаратмак эле?!
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: