ДАЙЫР КАЛП АЙТАРЫН ЖАШЫРБАСА,НАЗИРА ПИАРГА МУКТАЖ ЭМЕСМИН ДЕЙТ

«Шамал болбосо чөптүн башы кыймылдабайт» деген сөздү кыргыздар көп колдонобуз. Андыктан макалдан алыстабай, айрым өнөр ээлерине тиешелүү суроолорду узатып көрдүк.

Чылым чегип, ичимдик менен «дос» болгон айымдар тууралуу оюңуз?

Токтобүбү Черикчиева:«АЙЫМДАРДЫН ИЧИП-ЧЕККЕНИНЕ КАПАМЫН»
– Ичсе иче беришсин, бирок акыл-эси менен. Мас болуп көчөдө тентип жүргөндөргө караманча каршымын. Биз улуу муундун өкүлү болуп калгангабы, мындай нерселер көзгө аябай өөн учурайт. Чылым чеккени биякта турсун, улууларды көзгө илбей кучакташып-жабышып алганына не дейсиң?! Азыркы кыздарда намыс деле калбай калды. Мен, мисалы, азыр деле улуу адамдардын алдынан кесип өтпөйм. Ал эми жаштар жолун кесмек түгүл жөөлөп кетишет. Бул нерсе ар бир адамдын дээринен, үйдөгү тарбиясынан да. Анан да кээде той-кечеге барып калганда улуу айымдардын ичип-чегип, мааниси жок сүйлөп отургандарын көргөндө капа болуп кетем.

«Атың чыкпаса жер өрттө» дегендей, өзү тууралуу ар кандай сөздөрдү чыгарып таанылгандарга кандай көз караштасың?

Назира Бердигулова:«ПИАР ҮЧҮН ӨЗҮ ТУУРАЛУУ УШАК ЧЫГАРГАНДАРДЫ ЖАКТЫРБАЙМ»
– Менимче, андай жолго өзүнө ишенбеген адам барышы мүмкүн. «Чёрный пиар тоже пиар» демекчи, бизде пиар менен популярдуулукка жеткендер көп, ар кандай сүрөткө түшүп, бир нерсени чыгара калып дегендей... Аракет кылсак, пиары жок эле ийгиликке жетишүүгө болот. Мен ошол өз эмгеги менен ийгиликке жеткендердин катарындамын. Атайын пиар үчүн ушак чыгарганды жактырбайм.

«Калптын казаны кайнабайт» дегенди кандай түшүнөсүң? Сенде калп айткан учурлар болду беле?

Дайыр Исмадияров:«ТАКЫР КАЛП АЙТПАЙМ ДЕП «АНГЕЛ» БОЛБОЙМ»
– Калп айтсаң, качан болсо да билинет. Эгер бир жалган айтып алсаң, артынан аны жашырыш үчүн кайра башканы сүйлөп, айтор, уланып кете берет. Калптын зыянсыз түрү бар. Мисалы, досторум урушуп кетсе, аларды жараштыруу максатында жалган айтып коюшум мүмкүн. Такыр калп айтпайм деп «ангел» да болбойм. Кээде сөздү туура түшүнбөй шашып же бир жакка баргым келбей жалкоолуктан жалган сүйлөгөн учурлар болгон. Бирок, чынында, мен калпты жакшы айта албайм. Анткени аягына чейин чыкпай эле билдирип салам.

«Ойлонбой сүйлөгөн онтобой ооруга жолугат» дейт, ойлонбой сүйлөп алган кез болгонбу?

Санжар Мыкыев:«СҮЙЛӨӨР АЛДЫНДА ЖАКШЫЛАП ОЙЛОНУШ КЕРЕК»
– «Айтылган сөз атылган ок» деп коёт го. Ошол сөзгө толугу менен кошулам. Эмнени сүйлөсөң да ойлонуп сүйлөш керек. Бул өзгөчө мырзаларга тиешелүү. Менде окуучу кезде ушул сыяктуу учурлар болгон. Бирок азыр мындай көрүнүш кездеше элек, ыңгайсыз абалга түшө элекмин. Калп айткан кандай жаман болсо, ойлонбой туруп сүйлөп коюу дагы ошондой эле жаман адат. Калп эле маанисиз сүйлөй берсең, ишеничтен чыгып да каласың.

«Саны бар, сапаты жок ырчылар көп» дешет. Ошол боюнча пикириң...

Асел Кадырбекова:«ЫРЧЫЛАРДЫ СЫНДАГЫМ КЕЛБЕЙТ»
– Негизи, мен эч кимди сындабайм, андай адатым жок. Анткени ар бир адам болгон аракетин жумшап, жакшы максаттары менен чыгып жатса, алардын шагын сындырып коюу туура эмес. Мен дагы жаңыдан чыгып жатам, мага да мындай сындардын айтылуусу толук мүмкүн. Албетте, бул нерсе мага катуу тиет. Менин, чынында, чыгармачылыктан башка эч нерсе колумдан келбейт. Андыктан бул чөйрөдөн кетип калууну ойлоп да көргөн эмесмин. Чыгармачылык мен үчүн бүтүндөй жашоо.

Сизди Гүлнур Сатылганованын ырдоо стилин туурайт дешет...

Роза Шакирова:«ГҮЛНУР ЭЖЕНИН ЫРДАГАНЫН ЭМЕС, СҮЙЛӨГӨНҮН ТУУРАЙМ»
– Жок, анын ырдоо стилин туурап ырдабайм, жөн гана сүйлөгөнүн бирөөлөргө туурап коём. Ошентип туурап сүйлөп койгонумдан чыккан сөз болсо керек. Негизи, менин анча-мынча элдерди туурап коймой адатым бар. Көбүнчө өзүмө жаккан адамдарды. А өзүңө жаккан адамдарды тууроого неге болбосун? Ал эми Гүлнур эже экөөбүздүн ырдоо стилибиз эки башка.

Гүлжамал Бөрүкулова,
Гүлназ Атантаева
star@super.kg

 Кыстарылган видео