Борбордук шайлоо комиссиясы 20-августта соттолгон «ата журтчу» депутаттарды мандатынан ажыратты. Бул жыйынга депутаттар Камчыбек Ташиев, Садыр Жапаров, Талант Мамытов катышышкан жок. «Жыйынга катышуу тууралуу эч кандай чакыруу келген эмес. Негизи, мыйзамда мандатынан ажыратылчу депутаттар жыйынга катышуусу керектиги тууралуу жазылбаган»,- деди жыйын болгон күнү Садыр Жапаров. Ал «Муну бүт кыргыз эли көрдү, саясий буйрутма экендигин, БШК Ак үйдүн айтканы менен чечим чыгарды. Бийликке мандаттан ажыратуу гана керек эле. Ташиев, Мамытовдор менен жолуга элекмин. Мандатты алды деп митинг уюштурбайм. Мандаты жок деле, көчө саясатчысы болуп деле мамлекетке пайдалуу иштерди жасай берсе болот» деп билдирди. Тиешелүү чечимди БШКнын 10 мүчөсү колдоп, 1 мүчөсү каршы добуш берди. «Конституцияга ылайык, соттолгондор депутат боло албайт»,- деди БШКнын төрагасы Туйгунаалы Абдраимов.
Эске сала кетсек, Жогорку Сот 6-августта «ата журтчу» депутаттарга карата козголгон кылмыш иши боюнча чечим чыгарган. Соттук курам Бишкек шаардык сотунун депутаттарды актаган чечимин толугу менен жокко чыгарып, Кылмыш-жаза кодексинин 30 жана 295-беренелери боюнча күнөөлүү деп тапкан. Аларга райондук сот чыгарган 1 жыл 6 айлык жаза өтөө мөөнөтү кыскартылып, 1 жыл 5 ай деп өзгөртүлдү. Ал эми Талант Мамытовдун 1 жылдык жаза өтөө мөөнөтү ошол боюнча калган.
Гүлмайрам Сабырбекова,
Эльвира Караева
politika@super.kg