Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

АГЫП КЕТКЕН ОКУУЧУЛУК КАЙЫГЫМ...

№357 4-10-сентябрь, 2009-ж.


“Актай барак алганмын, ак кайык жасаганмын,
Окуучулук күндөрүм деп жазганмын.
Агып кеткен окуучулук кайыгым,
Эми издеп таппай калдым дайынын...” - деп обончу Бек Борбиев ырдагандай, окуучулук күндөрдүн дайынын таппай калганыбыз менен, ошол күндөр дале эсибизде. Жаңы окуу жылынын башталышын шылтоолоп, белгилүүлөргө кайрылып, окуучулук күндөрүнөн кабар алдык.

Мектепти алтын медаль менен аяктагандар

  • Муратбек Бегалиев
  • Самат Дөөлөтбаков
  • Назира Айтбекова
  • Урмат Усенов
  • Нурзат Токтосунова

“Эки” албаса окуунун кызыгы жок деп эсептегендер

  • Шайыр Касымалиева
  • Бактыгүл Бадыева
  • Замир Арыкбаев
  • Максат Бегалиев
  • Назми
  • Кенже Дүйшеева
  • Микаэль

Мектепти толук аяктабагандар

  • Динара Эсенгулова
  • Ильяз Абдыразаков
  • Анжелика
  • Бегимай Эсенгулова
  • Санжар Бердибеков
  • Сайкал
  • Айпери Кубик кызы

“Бир” деген баага окугандар да бар

Роза Шакирова тентектик кылып, мугалимдин сөзүн укпагандыгы үчүн “бир” деген баа алган. Нурайым Азыкбаева да сабакка даярданбай келип, “бир” алган экен.

Өмүрүндө "эки" алып көрбөгөндөр

  • Замир Мырза
  • Гүлзинат
  • Динара Акулова
  • Сема
  • Айжан Акылбекова
  • Токтобүбү Черикчиева

Классташтар

Мирбек Атабеков учурдагы кээ бир ырчылардын ырларынын текстин жазып берип жүргөн Кундуз Качкынова менен, андан кийин борбордо Гүлмира Рысбаева менен бир класста окуган.
Султан Садыралиев менен Кайрат Примбердиев классташ.

Так илимдерге жоктор

Сураштыра келгенде жылдыздарыбыздын 80 пайызы математика, геометрия, физика, химия сабактарын жаман көрүп, жакшыокушкан эмес.

Курмангазы Азыкбаев:

“Эжейимди “маңка” атка кондургам”

– Ой, мен мектепте шоктугум башымдан ашкан тентек болчумун. Мугалимдерге тийишүү үчүн ар биринин мүнөзүнө жараша сценарий ойлоп тапчумун. Бир күнү класска эжейден мурда кирип, отургучуна кнопка коюп койдум. Эжейим отуруп жатып, ушундай бир кыйкырды дейсиң... Кыйкырганын көрүп, жыргаганымды сураба. Анан билмексен болуп отуруп калдым. Көп эле мугалимдердин отургучуна клей куюп, ак кийинип келген болсо, сүрөт тартуучу кызыл боёк куюп, далай жолу ыйлаткам. Бир жолу доскага жазып жаткан эжейдин артына “маңка” деп жазылган кагазды билгизбей чаптап койгом. Эжей артына чапталган “маңка” деген жазуусу менен үйүнө барыптыр.
Мектептен чыгып бара жатканда жазууну көргөн окуучулар эжейди үйүнө жеткиче шылдыңдашыптыр. Балдар мени Куба дешчү. Кайсы класска кирбейин, Курмангазы, Куба деген жазуулар парталарга батпай кеткен эле. Анысы аз келгенсип, класстын шыптарына пластилин менен атымды жазып чыккам. Директор мектепке ата-энемди чакыртып, катуу урушкан. Ошентип, ата-энем мен үчүн мектепти ремонт кылып беришкен. Анан да атам жыгач уста болгондуктан, парталардын баарын жаңылап берген болчу.

Неля:

“Кабинетти талкалап сала жаздаганбыз”

Окуп жүргөндө химия сабагынан берген эжей тартипти аябай катуу кармачу. Бир жолу анын сабагына Жаркын деген классташым экөөбүз беш мүнөт кечигип келсек, ордубузга отургузбай, намысыбызга тийчү сөздөр менен урушкан. Ошондо ага өчөшүп калган болчубуз. Бир жолу класска кирсек, эжей жок экен. Лабораториясына кирип, идиштериндеги кислоталарды бири-бирине куюп, полго суу чачып, гүлдөрүн жулуп, кабинетти талкалап сала жаздаганбыз. Анан химия сабагы башталганда эжей келип, "муну куйганда мындай реакция жүрөт" деп түшүндүрүп баштады. Көрсөткөнү айтканындай болбой, окуучулардын алдында аябай уят болгон. Биз Жаркын экөөбүз эжейди уят кылганга, өчүбүздү алганга жыргаган элек.

Турусбек Жумалиев:

«Бир сабактан «беш» алгам»

– Мен музыкадан жакшы окучумун. Бир жолу музыка сабагынан Азия деген эжейим мени ырда деп доскага чыгарды. “Мекен” деген ырды ырдап бердим. Анан башка окуучуларды доскага чакырса, баары эле “менин ордума Турусбек ырдап койсунчу?!” дей беришти. Ырдаганымды жактырган эжей мени ырдата берди. Кыскасы, ошол күнү беш баланын ордуна ырдадым. Эжей менден “беш” деген баасын аяган жок. Күндөлүгүмдөгү бааны көрүп, сүйүнгөнүмдөн териме батпай калдым. Үйгө барып, апама көрсөткөнгө ашыгып чуркасам же кадамым арбыбайт. Жыгылып, тоголонуп үйгө араң жетип, энтиккенимди баса албай күндөлүгүмдү апама көрсөткөнүм бүгүнкүдөй эсимде. Көрсө, баланы мактоо көтөрөт турбайбы.

Бек Борбиев:

«Журналга жылан салып...»

– 6-класста болсо керек эле, биология сабагынан берген эжейден “жыландан коркосузбу?” десем, “жок, жыландан эмнеге коркмок элем?!” деп койду. Бир күнү эжей сабак өтүп жатып эшикке чы­гып кетти. Убакыттан пайдалана чуркап барып журналды ачтым да, кичинекей суу жыланды салып, жаап койдум. 5 мүнөт өткөн соң эжей келип, журналды ачып өңү купкуу болуп, нес болуп катып калды. Бир аздан кийин өзүнө келип, эшикке чыгып кетти. Аңгыча эле завуч келип кыйкырып “ким журналга жылан салды?” деп териштирип кирди. Кыздар “журналга жыланды Берадор салды” деп айтып коюшту. Завуч мени жетелеп мугалимдердин алдына алпарды. Карасам, эжейимдин көздөрү кыпкызыл, ой-да ыйлаган окшойт. Эжейимден кечирим сурадым. Апам мектепте иштечү да, аны да чакыртышты. Ошентип, катуу ызы-чуу болгон.

Эмил Балтагулов:

«4-класста балалуу болгум келген»

– 4-класста класс жетекчи агайымдын кызын жактырып калгам. Ага акылдуу көрүнүш үчүн “мен сени сүйүп калдым, экөөбүз бактылуу болобуз. Биздин көп балабыз болот” деп кат жазганмын. Ал кат кыздын апасынын колуна тийип калып ит эле болгом. Үйүбүздүн жанында балдар менен ойноп жатсам, ал кыздын апасы келип “жашабай жатып сүйүүнүн балекетин билесиңби?” деп урушкан. Кошуналардын көзүнчө жаман сөздөр менен тилдеп, кулагымдан чойгондо өзүмдү аябай жаман сезгем. Дагы жакшы, ошол маалда үйдө апам жок экен. Болбосо апамдын жүрөгү оорумак. Ошондон кийин бир чоң кылмыш жасап койгонсуп, эшикке чыгып балдар менен ойной албай же мектепте кеңири жүрө албай кыйналгам. Анткени элдин баары мени карап “уяты жок бала келе жатат” деп айтышкандай туюлчу. Жакшы окуган, тартиптүү балдардын катарында жүрүп эле кат жаза коём деп өзүмдү бүт айылга шылдың болгондой сездим. Бул шылдыңдан башка мектепке которулуп кетип кутулгам. Азыр угушума караганда, ал кыз үйбүлөлүү экен. Анан да мен 10 жыл ичинде 10 мектеп которгом.

Жанета:

«7-класста биринчи жолу жылдыз болгом»

– Мен 7-класста лагерге барып калдым. Барсам орун жок өзүмдөн улуу кыздар менен бир бөлмөгө кошуп коюшту. Мени кичине деп алар басынтып, буюмдарымды алып коюшуп көп ыйлатышчу. Бир күнү ыр-бий боюнча конкурс болуп калды. Биздин бөлмөдөн мен чыкмай болдум. Өмүрүмдө биринчи жолу апам артист көйнөк сатып берген эле, ошол көйнөктү лагерге апама көрсөтпөй алпарганмын. Анан конкурска ошол көйнөктү кийип чыгып мода көрсөтүп, ырдап жеңүүчү болгом. Ошондо мени кордогон кыздар, тескерисинче, доско айланышты. Кол тамга сурашып, сөз айткан жигиттер көбөйүп, өзүнчө эле жылдызга айланып калгам. Окуучулук кезди эстесем эле биринчи ушул окуя көз алдыма тартылат.

Эрмек Нурбаев:

«Алгачкы эфирим – Алиппе майрамы»

– 1-классты аяктап жатканда Алиппе майрамын Раушан деген классташ кызым экөөбүз алпарганбыз. Негизи, башка кыз менен алпармакмын. Бирок шарт ошондой болуп калды. Раушандын майрамды алпарууга даярдыгы жок же Нуркыздын кол жазмасын түшүнбөйт. Анын кыйналганын көргөн мугалимдер мен карап сүйлөчү кагазды Раушанга беришти. Ошондо мен кагаз карабай сүйлөгөм. Сөз таппай калганда күлдүрүп, туура эмес айтып алсам артынан кайра оңдоп, кыскасы, ошондо эле азыркы алпаруучулук стилим түзүлгөн экен. Болгондо да картон кагаздан жасалган телевизордон чыгып сүйлөп, өзүмдү профессионал сезгем.

Гүлшайыр Садыбакасова:

«Каттын жообун апам жазган»

– 9-класста окуп жүргөндө Абыш деген классташ балам төрт бүктөлгөн кагазды колума карматып, “эртең жообун жазып кел” деди. Мектептин артына өтүп катты окусам, “сүйөм-күйөм” деп жазыптыр. Биринчи жолу мындай кат алып жаткандыктан, уялганымдан үйгө ыйлап келдим. Апам “эмне болду?” десе “Абыш мага кат жазыптыр” деп ыйладым. “Эмне, ошого да ыйлайсыңбы? Сен эми бой жеттиң, жигиттер көз артып, кат жаза баштайт, буга даяр болушуң керек” деди. Мен дагы эле ыйлаганымды токтотпой “эмне үчүн мага жаккан эмес, жакпаган бала кат жазат?” деп шолоктодум. Апам: “Антип ыйлабай, жакпаса мен жашмын, дос болуп жүрөлү”,- деп каттын жообун жазып бер деди. Кыскасы, ошондо ыйлап жатып каттын жообун апама жаздыргам. Эртеси күнү берип коюп качып кеткем. Азыр Абыш экөөбүз жолукканда ушул окуяны эстеп күлүп калабыз.

Замира Рахманбердиева
star@super.kg



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: