ЖУБАЙЛАР ОРТОСУНДАГЫ КӨЗГӨ ЧӨП САЛУУНУН БЕЛГИЛЕРИ

СТАТИСТИКАДАН

Эркектердин 75, аялдардын 60 пайызы жок дегенде өмүрүндө бир жолу жан шеригинин көзүнө чөп салат. Басымдуу себептери:

• Жеке жашоосундагы жаңы нерсени туюу үчүн (19 пайыз).
• Сүйүктүүсүнүн үйдө убактылуу жоктугу (12 пайыз).
• Жаңы сезим (12 пайыз).
• Бактылуу эмес үйбүлөлүк жашоо (9 пайыз).
• Чөп салган жан шеригинен өч алуу үчүн (1 пайыз).

ЭРКЕК АЯЛЫНЫН КӨЗҮНӨ ЧӨП САЛГАНДА...

1. Бир күнү эле модалуу жинсы сатып алат. Ага чейин «мени ким карамак эле?» деп колуна тийгенин кийип жүргөн.
2. Сакал-мурутун тасырайта кырынып, атыр себинип калат. Мурун «сакал-мурут – эркектин көркү» деп кырынбай шылтоолочу.
3. Ишинде баары эле капыстан «отпускага» кетет да, ошондуктан, ишинде күн-түн кармалууга аргасыз.
4. Чөнтөк телефону менен жалаң ваннада сууну шаркырата агызып сүйлөшүү адатына айланат. Анан ваннадан чыкканда «ишкер достор адамча жуунганга да мүмкүнчүлүк бербейт» деп «кейип» калат.
5. «Көбөйгөн крутой достордун жанында крутой жүрбөсөң болбойт» деп жанына көп акча салып жүрө баштайт.
6. Сүйүү тууралуу кинолорду көрүп, китептерди окууга өтөт. Ага чейин спортту гана окуп, сүйүү кинолорду көргөндөрдү мыскылдай жылмайчу.
7. Машинаңыздардагы алдыңкы отургуч сиз көнүп калгандай абалда турбай жылдырылып калат.
8. Тырышып, эптеп чогулткан акчага келген машина бат-бат, өзгөчө дем алыш күндөрү бузула баштайт. Угаарыңыз: «Жолдо калып трос тапкыча, машинаны СТОго жеткиргиче түн жарым болуп...»
9. Жетекчиси жамааттын ынтымагын чыңдоого киришип калат. Бир күнү алар менен тоого чыкса, бир күнү бирөөсүнүн туулган күнүн белгилөөгө кетет.
10. Тамак даярдоону же жок дегенде салат түрүн жасоону үйрөтүүнү суранат. Буга чейин ашкана менен кастрюль эркекке тиешелүү эмес деп керкейчү.

АЯЛ КҮЙӨӨСҮНҮН КӨЗҮНӨ ЧӨП САЛГАНДА...

1. Сырткы көрүнүшүнө көп көңүл буруп калат. Мурда жалаң шым кийчү болсо, эми юбкага, мурун юбка кийсе, эми шым кийүүгө өтөт.
2. Болбогон кемчиликтер үчүн эле күйөөсүн жемелеп: «Сен таза кырынбапсың, бырышкан шым менен жүрөсүң...» дей баштайт.
3. Телефон чалууларга жооп бербейт же соткасын таптакыр өчүрүп салат. Анан «соткамдын батарейкасы отуруп калган» же «маанилүү жолугушууда болдум» деген шылтоолорду айтат.
4. Жумуштан кийин тосуп алууларга караманча каршы болот. А буга чейин «тосуп албайсың» деп каарып жемелөөчү.
5. Купуя курбусу пайда болот. «Курбум аябай уялчаак, ошондуктан, ал бир жакка барса, коштоп жүрүүгө туура келет» дей баштайт кашкайып.
6. Жумушка дамамат маникюр, педикюр жасап бара баштайт. Мурун болсо тырмак боёгонду гана эптепсептеп билчү.
7. Майрам эмес күндөрү деле «бирге иштешкендери» гүл же башка белек берүүгө өтөт.
8. Бөлмөгө бекинип алып, узакка ишкер сүйлөшүү­лөрдү жүргүзөт.
9. Дамамат дем алыш күндөрү аны илгери бирге окуган «курсташтары» же «бөлөлөрү» туулган күнүнө же башкага үйүнө чакырат да турат.
10. Карьерасын өстүрүү үчүн көп иштеп, офисте кармала баштайт. Ага чейин көп иштөө назик аялзатына эмес, эркектерге гана таандык деп келген.