Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Съездбек Искеналиев: «БИР-ЭКИ ЖЫЛДЫН ИЧИНДЕ ЫРЧЫЛАРДЫН ЛИДЕРИ БОЛОМ»

№180 14-20-апрель, 2006-ж.


– Съездбек, сенин бала кезиң ырчылык менен байланышта өттү беле?
– Албетте. Мен ырчылыкка өтө эле жаш кезимден баштап кызыга баштапмын. Үч жашымда ырдаган ырларымды кассетага жаздырып коюшкан экен, азыр ошону коюп, угуп алып күлкүм келет.

– Анда кайсы ырларды ырдаган экенсиң?
– Анда «р» тамгасына тилим келчү эмес экен. «Карагат» деген ырды «Кайагат, кайагат, кандай болуп жайалат...» деп ырдаптырмын. Ошондой эле «Жаз жамгыры» деген ырды чала-була булдуруктаганым жазылган.

– Ошол кассетаны укканда сенде кандай сезим пайда болот?
– Байкемдин Самат деген кичинекей баласы бар. Ошону үйдөгүлөр мага окшоштурушат. Анан калса Самат да ырдаганды жакшы көрөт. Кассетадагы ырларымды укканда Саматты карап отуруп «мен да дал ушундай болсом керек» деп өзүмдү анын ордуна коюп коём.

– Анда эл алдына да эрте эле чыга баштасаң керек?
– 2-класста окуп жүргөнүмдө өзбекче ырга бийлеп чыккам. Ал кезде уялганды деле билчү эмес экенмин. Ким «бийлеп койчу?!» деп кол чаап койсо эле бийлей берчүмүн. Ошондо да мектепте бир кече болуп жалаң кыздардын арасында эркектерден бир мен бийлегем. Чоң апам тигип берген кичинекей өзбекче чапанды кийип, топу таппай убараланганыбыз эсимде. Акыры эжемдин топусун кийип чыккам. Ошондон баштап элдин сүймөнчүлүгүнө арзып, мектепте өткөн бир дагы кече менсиз өтпөй калган. Бир жолу болсо мектепте концерт коё турган күнүбүздө мага койдун кезүүсү туш келип калып, мени үйдөгүлөр кыйкырып-өкүрүп ыйлаганыма карабай концертке жибербей коюшкан. Мектеп жашымда Айчүрөк Иманалиева ырдаган «Кызыл гүл» деген ырды көп ырдачумун. Ошондуктан, мени айылда эч ким Съездбек дебей, элдин баары «Кызыл гүл» дешчү. Жакында эле элдин батасын алайын деп айылыма бекер концерт берип келдим. Кемпир-кесектер мени дагы деле унутуша элек экен. «Ай, кызыл гүл балам, баягы ырыңды ырда» дешет. Анан «Кызыл гүл» менен «Ак бантикти» ырдап бердим.

– Шаарга келип билимиңди кайсы жактан уланттың?
– Мектепти бүткөн соң, ырчы болом деп алгач искусство институтуна келсем, бир агай ырдатып көрүп «сен али жөжө короз экенсиң, Күрөңкеевге бар» деп чыгарып койгон. Анан апам экөөбүз Күрөңкеев атындагы музыкалык окуу жайына бардык. Ал жакка барсам эле «колуңду көрсөтчү?!» деп калды бир мугалим. Колумду көрсөтсөм, «Сен кыякка жарайт экенсиң, кыяк бөлүмүнө өттүң» деди. Ал кезде мен эптеп музыкалык окуу жайына өтүп алсам эле ырчы болуп чыгам деп ойлочу экенмин. Ошентип, «кыяк бөлүмүнө өттүң» десе «аа, аккордеон үйрөнөт турбаймынбы» деп кудуңдаган боюнча кайра айылга жөнөп кеттим. Жаңы окуу жылы башталып, сабакка келсем эле колума чоң кыл кыякты карматып коюшту. Көрсө, баягы «кыяк» дегени мен ойлогондой аккордеон эмес эле, кыл кыяк экен. Менин ошол жерден эле маанайым түштү. Анын үстүнө экинчи күндөн баштап кыяк үйрөнө албагандарды колубузга чаап, кадимкидей сабай баштады. Эрке өскөн жаным мындайды көтөрө албай төрт күндөн кийин сабакка такыр барбай койдум. Өзүм каалаган башка факультетке которулайын десем, анда төлөп окуучу бөлүмгө которуласың дешти. Аны үйдөгүлөргө айтсам, «бизге контракт дегенди угузба» дешет. Кыскасы, айласыз кыяк бөлүмүн төрт жыл окуп бүтүрдүм.

– Демек, сен кыл кыякчы турбайсыңбы? Азыр ал аспапта ойнойсуңбу?
– Окууну бүткөндөн бери кармай элекмин. Кармасам ойнойт болушум керек.

– Ошентип, өзүң каалабаган адистикке ээ болгон боюнча калып калдыңбы?
– Жо-ок, кайдан калып калайын?! Андан кийин искусство институтунун вокал бөлүмүнө тапшырып, аны аяктадым.

– Алгачкы чыгармаң кайсы болду?
– Күрөңкеевдин 3-курсунда окуп жүргөн кезимде «Өмүр» деген ырымды жазгам.

– Эң биринчи жолу өз ырыңды радиодон укканда сенде кандай сезим болду эле?
– Бул өзүнчө кызык окуя. Күрөңкеевди бүткөн жылы «Өмүрдү» «Кыргызстан Обондоруна» алпарсам, «Ии, жакшы эле ыр экен, көрөбүз» деп кош көңүл мамиле кылып алып калышты. Анан үч күн күттүм, беш күн күттүм, бир ай күттүм. Баягы ырдын чыга турган түрү жок. «А-а, болбой калган экен. Демек, менден ырчы чыкпай калды го» деп өзүмдү таштап койдум да, баарына кол шилтеп коюп айылга кетип калдым. Ошол учурда денсоолугум да жакшы болбой жүргөн, «кымыз ичип кел» деп үйдөгүлөр мени тоого жиберип ийишти. Тоодо жүргөнүм менен эс-дартымдын баары эле бул жактагы ырымда. Үмүт деген нерсе жаман экен да. Ошентип, тоодо он беш күн жүргөндө жүдөп такыр болбой калдым. Оозум кесилип, бети-колумдун баары туурулуп жүдөгөнүмдү көргөн эжем «кой, муну колго түшкөн немистей кылбай айылга жиберели» деп калды. Муну укканда сүйүнгөнүмдү сураба. Эртеси атты токуп алып айылга жөнөдүм. Айылга жетип аттан түшүп эле буркан-шаркан түшүп ыйлап кирдим. Өзүм жыйырмадан өтүп калган килейген эле жигитмин. «Силер эмнеге мени тоого калтырып коёсуңар?» деп ыйлап же токтосомчу?! Анан апам «Бишкекте радиодон сенин ырыңды берип жатыптыр» деп калды. Аны укканда ызам да тарады, ыйым да басылды. Эми оюмдун баары эптеп эле Бишкекке жетүү болуп калды. Ошондогу айылда өткөн бир жума тим эле кылымга тете болду го, чиркин! Кыскасы, Бишкекке да келдим. Аңдыганым эле радио. Же менин ырымды бере койбойт. Анан бир күнү эле радиодон «Өмүр» жаңырып жатат. Андагы сүйүнүчүмдү мен азыр сөз менен жеткирип бере албайм. Өмүрүмдө ошондой кубанбасам керек эле. Ошол мүнөттөн баштап баягы сууп калган демим кайрадан жанданып, күчөп, чыгармачылыкка талпынгандан талпына бердим. Жана дагы деле талпынып келе жатам.

– Азыркы популярдуулугуңа өзүң кандай баа бересиң?
– Жакшы эле баа берем. Эл сүйүп, эл угуп жатабы, демек, кандайдыр бир жакшы жыйынтык бар экен дейм. Мындан бир-эки жыл мурун аттуу-баштуу эле бир-эки ырчыга ырларымды сунуш кылсам, көңүл бурбай коюшкан. Азыр «Съездбек, мага ыр жазып берчи?!» деп менин артымдан кууп жүрүшөт. Айта кетчү нерсе, менин азыркы популярдуулугум – менин чыгармачылыгымдын башталышы гана. Менин азыр жылдызым жана элек. Буюрса, бир-эки жылдын ичинде мен сахнанын лидери болом.

– Эмнеден улам мынчалык ишенимдүү айтып жатасың?
– Азыр бизде бүгүн бар да, эртең жок ырлар толтура. Алардын жанында мен өзүмдүн ырларыма ишенем, өзүмө ишенем, элиме ишенем.

– «Эсимде» аттуу ырыңдын обонун кантип жаратканың эсиңде барбы?
– Бул менин көптөн-көп күткөн обонум болчу. Эргүү катуу келип калганда жаралган обон болсо керек. Бул обон жаралгандан кийин да жарыкка чыкпай, көөдөнүмдө сакталып көпкө жүрдү. Бир жолу айылда апам эк&11257;өбүз суу бойлоп коноктон келатканбыз. Мен кыңылдап ушул ырдын обонун салсам апам: «Токто, ушул кайрыгыңды кайра ырдап берчи?!» деп калды. Кайра кайталадым эле апам: «Муну батыраак жаздыргын. Ушул ыр буюрса, сени элге таанытат» деп калды. «Эсимде» ушул окуядан бир жылдан кийин жарыкка чыкты. Апамдын оозуна сала бергендей чын эле бул ыр менен көпчүлүккө тааныла алдым. Башкача айтканда, «Эсимде» мени эки тепкичке алга жылдырды.

– Репертуарыңда канча ырың бар?
– Отуздай ырым бар. Алардын жыйырма беши өзүмдүн ырларым. Ушул жерден бир жаңылык айта кетейин. Жакында эле «Мир» телеканалы «Селки» аттуу ырымды клипи менен алып кетишкен эле. Ошол ыр азыр Россиянын кайсы бир шаарындагы караокелерге киргизилип, айланып жатыптыр. Бул жөнүндө өзүм да жакында эле уктум.

– Ырчылыктан башка да жумушуң барбы?
– Жок. Азыр ырчылык менен алек болуп эле жүрөм. Кечинде «Адриатика» кафесинде иштейм. Кафе мен үчүн чоң тажрыйба топтоомо негиз болду. Анткени, ал жакты күн сайын «жандуу үн» менен ырдап, такшаласың.

– Жүрөгүңдүн ээси барбы?
– Бар. Ал 20 жаштагы перини мен түбөлүк сүйүүм деп эсептейм.

– Качан үйлөнөсүң?
– Ушул жылы үйлөнөм деген пландарым бар болчу. Бирок, сүйлөшкөн кызым «үйбүлөлүү болгондон кийин алаксып, чыгармачылыгыңды өксүтүп коюшуң мүмкүн. Андан көрө жакшылап иштеп, чыгармачылыгыңдын пайдубалын түптөп ал. Анан шашпай үйлөнө беребиз» деп жатат. Бир чети аныкы да туура. Бирок, ким билет, балким, жыл аягына чейин үйлөнүп калаармын.

– Кызың чыгармачылыгыңды жакшы түшүнөт го?
– Аябай жакшы түшүнөт. Күйөрман кыздарымдан да ашыкча кызганбайт.

– Күйөрман кыздарың көппү?
– Көп эле. Бирок, чектен чыккан күйөрман кыздарыма кезиге элекмин. Үйгө телефон чалгандар болуп калат. Алсам: «Сиз менен таанышсам болобу?» дешет. «Болот» десем апкаарып кетишеби, трубканы коё салышат.

– Сен үйдүн кичүүсү болсоң үйдөгүлөр «айылга келип жаша» дешпейби?
– Антип айтышпайт. Анткени, биздин үйбүлөдө бул маселе чечилген. Атамдын мен кичине кезимде эле көзү өтүп кеткен. Тирүүсүндө биздин келечегибизди ойлоп шаардан да үй алып койгон экен, азыр ошонун пайдасы тийип жатат. Мен ушул үйдө кала турган болуп сүйлөшкөнбүз. Апам болсо бул жакка бир айда үч-төрт жолу келип турат. Балким, кийинчерээк биротоло бул жакка алып келип алам.

Маектешкен Азиза Сатимбекова



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: