Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Гyлмира Рысбаева: «ТАЖИК КЫЗЫ ЭКЕНИМДИ БОЙГО ЖЕТИП КАЛГАНЫМДА БИЛДИМ»

№193 14-20-июль, 2006-ж.


Гүлмира Рысбаева 1985-жылы 12-октябрда Нарын шаарында төрөлгөн. Апасынын кызматына байланыштуу 2 жашынан баштап 7 жашына чейин Казарман шаарчасында өскөн. 7 жашынан 20 жашына чейин белгилүү эстрада ырчысы Динара Акулованын колунан тарбия алган. Эки бир туугандын улуусу. Бойдок.

– Гүлмира, сенин чоң сахнага чыгып, эл көзүнө көрүнө баштаганыңа бир топ жыл болуп калыптыр. Чыгармачылыкка болгон кызыгууң кайсы мезгилден баштап ойгоно баштаган?
– Мен балабакчада жүргөн 3 жашымдан баштап ырдай баштаган экенмин. Жашым өйдөлөгөн сайын ырга болгон кызыгуум күчөгөндөн күчөп, бир ордумда тура албай эле бийлеп, ырдай берчүмүн. “Майрамдарда сени көчөгө ээрчитип чыккандан кадимкидей заарканчумун” дейт апам. Анткени, майрамдык концерт болуп жаткан жерге барып «ырдайм» деп чыр салган адатым бар эле. Ошентсем айла жок апам мени ырдатканга мажбур болчу экен. Анан уюштуруучулар, көрүүчүлөр ар кандай белектерди беришчү. Элдер «кызын ырдатып, белек алып жатат» дешпесин деп апамдын ансайын бети кызарчу экен. Ошентип жүрүп Казармандын элине бат эле белгилүү болуп калдым. Майрамдарда өздөрү чакырып ырдата башташты. Ал эле эмес, 6 жашымда Бишкекке чакыртышып, телевидениеге тартышкан.
– Динара Акуловага канча жашыңда келдиң эле?
– Анда жети жашта болчумун. Ал мындайча болгон. Мен негизи тилим чыгып, акылыма киргенден баштап эле Динара Акулованы кумир тута баштагам. Телевизордон көрүп аны туурап, «Аккуу белең айперим», «Аккордеон» аттуу ырларын ырдап калчу элем. Казарман эли да мени ушул ырларды ырдаганымдан улам “Ырчы кыз” деп жакшы таанышчу. Бир күнү эле апам “Динара Акулова концерт коюп келатыптыр” деп калды. Сүйүнгөнүмдү айтпаңыз! Убакыт дегеле өтпөйт. Кыскасы, ошол күнү концертке бардык. Апамдар эрте эле барып, мага экинчи катардан орун алып коюшуптур. Кумир туткан ырчыларымды жакындан көргөнгө тим эле кубанычым коюнума батпайт. Бир маалда ырдап жатып эле Динара Акулова “Келгиле, чогуу ырдайбыз, каалоочулар бийлесе болот” деп калды. Отургандардын эч кимиси деле орундарынан козголгон жок. Жалгыз эле мен сахнага чыгып алып бийлеп да, Динарага кошулуп ырдап да жаттым. Менин талантымдан кабары бар жердештерим мени андан бетер сүрөшүп, “биздин кызыбызды ырдаткыла, алып кеткиле!” деп кыйкырып калышты. Анан мени ырдатышты эле, “Аккордеон” менен “Аккуу белең айперимди” ырдап бердим. Абдумалик Шерматов “Биз менен кетесиңби?” деп сурады эле эч такалбай туруп эле “Кетем” дедим. Ошол жерден эле “кызыңызды алып кете берелиби?” деп апамдан сурашканда апам да көп элдин көзүнчө эмнегедир башын ийкеп койду. Эл батасын берип, кыскасы, мен кетмей болдум. Ошол күнү артисттер биздин үйдө конок болду. Эртең менен баары уктап жатышканда эрте туруп мектепке барып, китептеримди тапшырып, мугалимдер, классташтарым менен коштошуп келдим. Анда мектепке бара баштаганыма болгону 23 күн болгон экен. Анан туугандарыбыз келип өздөрүнчө кеңешишип, он күндөн кийин кайра келмей болуп биз жөнөп кеттик.
– Анан он күндөн кийин кайра бардыңбы?
– Кайдан? Он күн эмес, бир ай өтүп кетсе да эмнегедир апамды, үйдү сагынган жокмун. Бишкекке келип мага ырларды жаздырып, кайра эле Ошко гастролго кеттик. Ырдын кызыгына батып көп убакыт өтүп кеткенин да билбей калыптырмын. Бирок, апам менен телефон аркылуу бат-бат сүйлөшүп турдум. Өзүм болсо чоочун үйбүлөгө бат эле көнүп кеттим. Абдумалик Шерматовду “папа” деп, Динара Акулованы “мама” деп Меридина менен ойноп, кыскасы, ушул үйбүлөнүн мүчөсү болуп калдым.
– Ошол боюнча Казарманга барган жоксуңбу?
– Көп өтпөй эле апам шаарга көчүп келип алды. Ошондуктан, ал жакка 10-класста окуп жатканымда гана концерт коюп бардык. Мен ырдап жатканда залга жык толгон элдин арасынан ыйлап жаткандарга күбө болдум. Концерттин аягында менин кичинекей кезимдеги сүрөттөрүмдү көтөрүп келишип, “мен сенин кошунаңмын”, “мен сенин тууганыңмын”, “мен классташыңмын” дегендер көбөйдү. Мен алардын бирөөсүн да тааныбай калыптырмын.
– Гүлмира, сени көпчүлүк кыргыз эмес дешет...
– Ошентип айтышат. Анткени, мен тажик кызымын. Апам Москвада окуп жүргөндө атам менен таанышып, экөө үйлөнүп алышкан экен. Бирок, “алыс жер, улуту башка” деп апамдын туугандары каршы чыгып, Тажикстанга жибербей коюшуптур. Ал кезде мен апамдын боюнда экенмин. Ошентип, жада калса мен атамды көрбөй да калыптырмын. Болгону сүрөтүнөн көргөм. Экөөбүз куюп койгондой окшош экенбиз. Мен төрөлгөндө апам мага Феруза деп ат коюп, Наимова деп атамдын фамилиясына жаздырган экен. Бирок, таятам буга каршы болуп, менин атымды Гүлмира деп өзгөртүп, фамилиямды өзүнүн фамилиясына жаздырып алыптыр. Азыр балким аты-жөнүмдү өзгөрт­пөгөндө атам издеп таап алмактыр деп ойлоп коём. Жаш кезимде “Апа, атам каякта?” деп сурасам, апам “командировкада” деп койчу. Кийин чоңойгонумда гана баарын төкпөй-чачпай айтып берген. Ошентип, тажик кызы экенимди бой жетип калганымда гана билгем. А апам болсо азыр башка турмушка чыккан. Атам мени өз кызындай кылып аябай жакшы көрөт. 4-класста окуган иним бар.
– Силер көбүнчө эле гастролдордо жүрчү эмес белеңер? Ушул гастролдор мектептеги сабактарыңа тоскоолдугун тийгизчү эмес беле?
– Ырас, гастролдорго көп кетчүмүн. Сабактан суранган мен үчүн өзүнчө эле чоң маселе болчу. “Эже, он күнгө гастролго барып келейин” десем, “Сенин он күнүңдү билем, бир ай жоголосуң” деп жатып араң жиберчү. Айткандай эле бир ай дегенде келчүмүн. Ошентсе да берилген тапшырмаларды алдын ала аткарып, же келгенден кийин окуп, классташтарыма жетишип алчумун. Биз, Мирбек Атабеков экөөбүз мектепти бир партада отуруп бүттүк. 9-классты бүтүп жатканда Мирбек биологиядан экзамен тапшырам деп кирип кетти да, кайра бат эле чыкты. “Кайсы суроо келди?” десек, “Мен суроого жооп берген жокмун, ырдап берип баа алып алдым” дейт. Анын артынан эле мен кирдим. Мугалим “сен да ырдап бересиңби?” дейт. Мен болсо суроолордун баарына даяр болчумун.
– Мектептеги кечелердин көркүн экөөңөр ачсаңар керек эле?
– Экөөбүз эле эмес, биздин мектепте жалаң артисттердин балдары окучу. Биз – Динара Акулованын үч кызы, Сыймык Бейшекеевдин эки баласы, Айчүрөк Иманалиеванын Аргени, Ырыскелди Осмонкуловдун уул-кызы. Биздин катышуубуздагы мектептеги чакан кечелер да өзүнчө эле чоң концертке айланчу. Жада калса мен бүтүп кеткенден кийин да чакырышып, кечелерде ырдап берип жүрдүм.
– Мектепти бүткөн соң, чоң окуу жайга тапшырдыңбы?
– Азыр музыкага тиешеси жок эле окуу жайда 2-курста сырттан окуйм. Кээде ал окуумду таштап, музыка жагына тапшырсамбы деп дагы ойлоп кетем.
– Гүлмира, сен элдин эсинде “Кичинекей Гүлмира” боюнча эле калып калгандайсың. Ортодо сахнага көп чыкпаганыңа эмне себеп болду эле?
– Мени азыр кээ бирлер “Баягы кичинекей Гүлмира сенсиңби?” деп тааныбай калышат. Чын эле ортодо менин ырдаганымды көрбөй калгандыктан ушинтишсе керек. Мен мектептеги окуума тескери таасирин тийгизбесин деп ырга көп бериле берген жокмун. Анын үстүнө бир үйдөн көп ыр­чы чыккан болбойт экен. Бизден мамам, мен, Малика ырчы болгондугубуздан, бирибиздин маселебиз бүтсө бирибиздики чыгып жатып мага көп көңүл бурулбай калды окшойт. Мына, буюрса, чыгармачылыкка эми киришкени турам.
– Чыгармачылыкка киришкениң го жакшы экен, бирок, экинчи апаң болуп калган Динара Акуловадан кетип калганың жаман болуптур.
– Кеткеним чын. Муну ар ким ар кандай айтып жатышыптыр. Мына, менин Динара Акуловага келгениме 12 жылдын жүзү болуптур. Ал мени бакты, тарбиялады дегендей. Ушунусуна рахмат. Менин бөлүнүп кеткенимдин бир гана себеби бар. Бирөөнүн моюнунда отура бербей уямдан учуп, өз алдымча жем таап жейин деп чечтим. Болгону эле ушул.
– Ошентсе да 12 жылдан бери чогуу жашап, эми бөлүнүп кеткен өкүнүчтүү болсо керек?
– Өзүм ушинтип чечкенден кийин өкүнгөн жокмун.
– Кеткенден бери кабарлаштыңарбы?
– Башында кабарлашып турчубуз. Көптөн бери алар өз иштери менен алек болуп, мен өз ишим менен алек болуп кабарлаша элекпиз. Азыр алардын кайда экенин да билбейм.
– Азыр өз апаң менен чогуу жашап жатасыңбы?
– Апамдар Арчабешик жаңы конушунда турушат. Алгач алар менен чогуу жашадым. Бирок, көп жылдан бери бардык шарты бар кабаттуу үйдө жашап, ошондой үйгө биротоло көнүп калыптырмын. Ошондуктан, азыр шаардын борборундагы байкемдин үйүндө жашап жатам.
– Эми сага чыгармачылык жактан ким колдоо көрсөтөт?
– Мен өзүмчө иштеп жаткан төрт айдан бери азыр мен үйүндө жашап жаткан Алыкожоев Турат аттуу чоң кызматта иштеген байкем финансы жагынан да, чыгармачылык жактан да колдоп келе жаткан. Бирок, ал чыгармачылыктан алыс чөйрөдө жүргөндүктөн, чыгармачылыктын ой-кырларын жакшы биле бербейт. Ошондуктан, мен дагы башка жаш ырчылар сыяктуу өзүмдүн продюсерим Назгүл Насиева менен чыгармачылык жактан тыгыз иштешип жатам. Буюрса, экөөбүз көп иштерди баштаганы турабыз. Ошондой эле Жаныш Момунов жакшы жардам көрсөтүүдө.
– Азыр сахнага чыкканына жыл айлана элек ырчылар жеке концерттерин берип жатышат. Сенин сахнада жүргөнүңө он жылдан ашып калса да жеке концертиңди бере элек экенсиң...
– Мен он жылдан ашык убакыт ичинде ырдаганды гана үйрөнбөй, уюштуручулук иштерди да өздөштүрүүгө жетиштим. Буга албетте, Динара Акулованын салымы чоң. Андыктан, жеке концертимди элге тартуулаганга эми убакыт жетти деп эсептейм. Буюрса, концертти күз мезгилинин аягына пландап жатабыз.
– Концертиңе Динара Акулованы да чакырасыңбы?
– Албетте, аларды биринчи кезекте чакырам. Малика экөө келишип, жакшы сөздөрүн айтып, ырдап берип кетишет деген үмүтүм бар.

Маектешкен Азиза Сатимбекова



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: