Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

АСКАТ СУЛАЙМАНОВ: «БАЛДАРЫМДЫ БИР ЖУМАДА БИР КӨРӨМ»

№215 15-21-декабрь, 2006-ж.


Кара тору, кер мурутчан жигит Аскат Сулаймановдун жүзү жалпы эле кыргыз журтуна тааныш болуп калгансыды. Бул актёр теледен байма-бай көрсөтүлүп жаткан роликтерден тышкары «Апамдын махабаты», «Айыл өкмөтү», «24 саат» аттуу кыргыз фильмдеринде роль жаратып, талантын элге ачып бере алды.
Аскат 1978-жылы 27-майда Балыкчы шаарында төрөлгөн. Үй­бүлөлүү. Үч уул, бир кыздын атасы. Учурда Кыргыз мамлекеттик драма театрынын жана анын алдында түзүлгөн «Дем» театрынын актёру.

– Аскат, актёрлук өнөргө кандайча ээ болуп калдың эле?
– Апамдын айтуусуна караганда, биздин урук-тукумубуздан актёр чыккан эмес экен. Мага бул өнөр кайдан жуккан билбейм, бирок, мен 6-классымдан баштап роль ойноп, сахнага чыга баштагам. Мектепте бир агай драмалык кружок ачып, таланттуу балдарды чогулткан эле. Ошондо кандайдыр бир иш-чара болуп, «Карагул ботом» спектаклинде баланын ролун ойногонум мактоого арзып, атайын грамота менен сыйлангам. Кийин мектепти бүтүп жаткан кезим Манастын 1000 жылдыгына туш келип калып, Балыкчыдан Таласка спектакль коюп барганбыз. Анда да «Өзөктөн чыккан өрттө» Семетейдин ролун аткарып, мактоого арзыгам. Ошентип, мектепти бүткөн соң, искусствого кызыгып калган жаным Бишкекке келип Б.Бейшеналиева атындагы музыкалык окуу жайга тапшырууну дегдеп алдым. Келсем, бул жакта айрым улуу адамдар: «Аскат, Караколдо Алматыга конкурс жүрүп жатыптыр. Тапшырып көрбөйсүңбү, балким, өтүп кетесиң. Кокусунан өтпөй калсаң, кайра Бишкекке өзүбүз өткөзөбүз» деп калышты. Ошентип, алардын сунушу менен конкурска тапшырсам, кудай жалгап өтүп кеттим. Он төрт бала тапшырдык эле баарыбыз ийгиликтүү бүтүп келдик
– Демек, казак тилинде окуган экенсиң да?
– Ооба, төрт жыл казакча, орусча окудук. Азыр казак тилинде эркин сүйлөй алам. Ал эле эмес, айрым учурда казактардын тойлоруна тамадалык кылам.
– Окууну бүткөн соң, Алматыда иштеп калууга мүмкүнчүлүк болгон жокпу?
– Болгондо да чоң мүмкүнчүлүк болду. Себеби, окуу жайда менин талантымды аябай баалашчу. Казактын бир чоң эле актёру: «Кыргыздар Сүймөнкул Чокморов өлдү деп эмне үчүн кайгырышат? Жакшы көңүл буруп кам көрүшсө, мына, Сүймөнкул Чокморов» деп мени көрсөтүп калаар эле. Окууну бүткөндөн кийин да кал деп аябай суранышты. Бирок, менин шартым жок болчу. Анткени, мен үйбү­лө­дө үч кыздын арасындагы жалгыз эркекмин. Ошентсе да апама бир ооз айтып көрө­йүн деп телефон чалсам: «Кой, бөтөн эл деген бөтөн эл, бул жакка эле кел» деп такыр көнбөй койду. Анын үстүнө мени менен барган балдардын баары эле кетип жатышса мен каламбы деп өзүмдүн да көңү­лүм чаппай койду. 200 дол­лар­лык айлык акысына да караган жокмун.
– Кыргыз драма театрына кандайча туш болуп калдың?
– Алматыдан келатканда эле «же драма театрына ишке кирем, болбосо такыр артист болуп иштебейм» деп ойлоп келгем. Дипломдук иш катары үч спектакль коюп, үчөөн­дө тең башкы ролду ойнодум. Ролум комиссияга жагып, дароо эле мени ишке алып калышкан.
– Театрдын айлык акысы төмөн экени белгилүү. Жумушка кирип жатканда сени ушул маселе ойлонтту беле?
– Кесибимди ушунчалык сүйгөнүмдөн алгач айлык жөнүндө деле ойлобоптурмун. Ошондо 430 сом айлык алчумун. Квартирама болсо миң сом төлөйм. Эки баламды багуу деген маселе бар. Кыйналганды көрө бер. Бирине тартсам бирине жетпейт, карыздын болсо куйругу үзүлбөйт. Ушинтип кыйналганыма чыдабай бир байкемдин сунушу менен акчасы көп такыр эле башка багыттагы жумушка кетмей болуп калдым. Бирок, бул жактагы бир-эки улуу актёрлордун «Кой, биз деле алгач ушундай кыйынчылыктарды башыбыздан өткөргөнбүз. Бир аз чыда. Убактылуу кыйын­чы­лыктарга туруштук бере албасаң талантың кор болот» деген кеп-кеңештерине ынанып калып калган элем. Бир жылдай ошентип кыйналганым менен кийин айлык акым көбөйдү, рекламаларга, фильмдерге роль сунуштала баштады. Азыр кудайга шүгүр.
– Сенин жогорудагы сөзүңө караганда, студент кезиңде эле үйлө­нүп алган окшойсуң?
– Ооба. 19 жашымда үйлөнгөм. Мен башынан эле өзүмдөн улуу балдар менен достошчумун. Каникулга барганда ошол досторумдун үйлөнүп, айрымдары балалуу болуп жаткандарын көрүп кызыктымбы, айтор, аларды туурап менин да үйлөнгүм келип кетти окшойт. Элмира аттуу өзүмдүн группалаш кызымды сүйүп калып, экөөбүз аз убакыт сүйлөшүп жүрдүк да, баш кошуп алдык. Бирок, студент кезибизде такыр кыйналган жокпуз. Келинчегим экөөбүз жети жарым миң теңгеден стипендия алчубуз. Андан тышкары мен окуу жайдын эшигин шыпырып бир топ акча тапчумун.
– Келинчегиң да актриса турбайбы. Жумушта да чогуу иштейсиңерби?
– Ал өз кесиби менен аз эле убакыт иштеди. Айлыктын аздыгынан иштебей эле үйдө балдар менен отуруп калды.
– Атасы да, энеси да искусство адамдары болсо балдарыңдын да актёрлукка шыгы болсо керек?
– 5-класста окуган улуу балам актёр болом деп айтат. Калгандары азырынча ар кайсы кесипти айта беришет. Бирок, баары мени теледен көр­гөндү ушунчалык жакшы көрүшөт. Мен катышкан рекламаларды көрүп калышса да «Папам! Папам!» деп тим эле жандары калбай кубанып алышат. Жакында эле апам «Айыл өкмөтүнүн» дискин алып келиптир. Азыр аны күн сайын сөзсүз көрүшөт. Фильмде кайненесине эшикти кайтартып коюп келинине кирип, курумду чечкен жерим бар эмеспи. Ошол жерин көрүп жатышып беш жаштагы кичүү балам: «Мына, папам курун чечти. Азыр тигини куру менен аябай сабайт» деп жатпайбы. Анткени, тентектик кылышканда аларды курум менен чаап коём да. А улуулары болсо балээдей эле түшүнүшөт.
– Келинчегиңиз кесибиңизге кандай карайт?
– Менин кесибим абдан оор. Жумуштун ушунчалык көптүгүнөн көбүнчө үйгө балдарым уктап калганда барып, эртең менен уктап жатышканда кайра келе берем. Ошентип, балдарымды бир жумада бир көрөм. Ошондо балдарым: «Оо, йес, папам келди!» деп сүйүнүшөт. Ушундай кеч барып, эрте кетмейдин айынан келинчегим экөөбүздүн ортобузда түшүнбөстүк болуп кетет. Бирок, чыдабаска айла барбы?
– Ата-энең, туугандарың кесибиңе каршы эмеспи?
– Апам мени актёр кылам деп түк ойлогон эмес эле. Мектепти бүтөөрүмдө Жогорку милиция Академиясына окутам деп, акчасын түйүп отурган жеринен барбай койгом. Анда апам: «Балам, мен айтаарымды айттым, кийин өкүнүп калбасаң эле болду» деген эле. Алматыдан окууну бүтүп келип, дипломдук ишимди жактаганда апам гүл көтөрүп алып келип, менин ойногон ролдорума ошондо биринчи жолу маани бериптир. Ошондо менин туура жолго бет алганымды сезип: «Баламдын келечегине балта чапмак экенмин да» деп мени кучактап алып ыйлаган. Азыр болсо апам да, башка туугандарым да менин кесибим менен сыймыктанышат.
– Кайсы фильмде аткарган ролуңа өзүң ыраазы болосуң?
– Кинодо жараткан ролдорумдун баары эле өзүмө жагат. Ошентсе да укмуш жаратып салдым деп айта албайм. А элге «Айыл өкмө­түн­дө­гү» милициянын ролун ойногонум өзгөчө таасир калтырган окшойт. Ошол фильм жарык көргөндөн кийин менин атым Аскат болбой эле «Участковой» болуп калгам.
– Өзүң катышкан фильмди көрүп отуруп өзүңдөн кемчилик тапкан учурларың да болобу?
– Андай учурлар болот. Биринчи тартылган фильмим «Апамдын махабатында» Аскардын жаш кезин ойнободум беле. Ошол кездерде толуп да жүргөн мезгилим болчу. Сейил менен бактын арасында жүргөн эпизод бар. Ошол жерде толуктугум аябай эле билинип, курсагым чыгып калганын кийин көрүп жатпаймынбы. Анан да жалбырактарды чачышып ойноп коюптурмун. Ушул эпизодду такыр көргүм келбейт. Колумдан келсе монтаждап оңдоп коймокмун. Бирок, кеч болуп калды.
– Сага кандай ролдорду ойногон жагат?
– Мага негизи комедия жарашпайт. Спектаклде го эмне кылсаң да жараша берет. А фильмде олуттуу эле ролдорду ойногонду жактырам. Баарынан кызыгы, мага дайыма милициянын ролу туш келип калат. Мындай ролго биринчи «Айыл өкмөтүндө» туш болдум эле. Кийин «24 сааттын» үч бөлүгүндө тең милиция болдум. Жакында Алматыга кыскача кинонун үзүндүсүнө тартылууга чакырышты эле, анда да ошондой роль берип коюшуптур. Бир режиссёрдон «Мен эмнеге дайыма милициянын ролун аткарам?» десем: «Анткени, сенин рожаң наглый экен» дейт. Ушундай дал келүүгө өзүм да таң калам.
– Учурда кандай фильмге тартылып жатасың?
– Азыр «24 сааттын» 3-бөлүмүнө тартылып жатам. Жакында эле Балыкчыдан съёмкадан келдим. Кар жок болгон учурду тартыш үчүн ата­йын ошол жакка бардык. Балыкчыда кар жок экен.
Эми мындан кийин да көптөгөн фильмдерде роль жаратып, өз талантымды элге дагы кененирээк жайылтсам деген тилегим бар. Кыргыз киносу эми бутуна туруп келатпайбы. Буюрса, алдыда дагы көп жетишкендиктерди багынтам деп ишенимдүү айта алам.

Маектешкен Азиза Сатимбекова


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: