Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

2006-жылдын супер ди-джейи Чыңгыз Мырзаев: «УШУЛ УБАККА ЧЕЙИН ӨБҮШҮП КӨРӨ ЭЛЕКМИН»

№246 20-26-июль, 2007-ж.


Нурбек, 16 жашта, Бишкек:
– Чыңгыз аттуулар атактуу болушат эмеспи. Атыңызды Чыңгыз деп ким койгон?
– Атымды ата-энем эле койгон. Өздөрү “чоң атаңдын уруксаты жок эле коюп алганбыз” деп тамашалап айтып калышат. Адамдар ар бир кадамын жакшы ниет менен жасайт эмеспи. Ошондуктан, мен төрөлгөндө “Чыңгыздай залкар адам болсун” деген тилекте коюшса керек. Чыңгыз Айтматовдой болуш кыйын. Албетте, ал агайыбызды сыйлайбыз, урматтайбыз. Бирок, колдон келишинче адам болгонго аракет кылып жатам.
– “Бир тууган” деген ырыңыздын клибиндеги кыргызды алыска тааныткан атактуу кикбоксчу Канат Сыдыгалиев менен кандай туугандыгыңыз бар деп сурайын дедим эле. Анан клиптегилер ата-энеңизби?
– Чынын айтканда, Канат байке менен тууганчылыгыбыз жок. Бирок, ушул клиптен кийин бир туугандай болуп калдык, буга аябай кубанычтамын. Канат байке да спорт жаатында элибиздин туусун көтөрүп, көп жеңиштерге жетишкен чыгаан жигит. Клиптегилер менин ата-энем. Көзү бакырайган кичинекей кыз менин эң кичинекей карындашым.

Жибекгүл, 18 жашта, Бишкек:
– Чыңгыз байке, саламатсызбы? Мен сизди аябай жакшы көрөм.
– Рахмат, мен да сиздей карындаштарымдын барына кубанычтамын. Сурооңузду бере берсеңиз болот.
– Динге болгон көз карашыңыз кандай, намазга жыгыласызбы?
– Альхамдулилла, баарыбыз мусулманбыз, келме келтирип жүрөм. Намаз окугандарга аябай жакшы көз караштамын. Убагында беш убак намаз окучумун. Убактым жетишпей калганда эртең мененки багымдатты окуп жүрдүм. Кудай өзү кечирсин, азыр шайтан минип, окубай калдым. Буюрса, окуймун деген ниетим бар. Жума намазга барып турам. Ар дайым парздарды аткарганга аракет кылам, орозо кармап, зекет берип дегендей.
– Ырчы катары “ырчылар тозокко түшөт” дегендерге эмне деп жооп берет элеңиз?
– Ар кимге жараткан ар түрдүү талант менен ырыскы берет экен. Мага ырчылыкты бериптир, ага өкүн­бөйм. Ким билет, ырчылар тозокко түшөт же болбосо түшпөйт деп мен жыйынтык чыгара албайм.
– Мурунку 20-кылым менен азыркы 21-кылымдын кыздарына болгон көз карашыныз кандай, айырмасы барбы?
– “Элүү жылда эл жаңы” дейт, убакыттын өтүшү менен адамдар өзгөрүшү мүмкүн. Бирок, ар убактын өзүнө жараша өзгөчөлүгү бар. Ошондуктан, түз көз караштамын.

Перизат, 21 жашта, Бишкек:
– Чыңгыз байке, жиниңиз катуу келгенде эмне кыласыз?
– Мен жинденгенде элден оолак болгонду жакшы көрөм. Себеби, ачуу үстүн­дө катуу айтып алсаң, ал адам таарынып калышы мүмкүн. Андыктан, өмүр өткөнчө көңүл калышпай, сыйлашканга не жетсин?! Көптөн бери жиним деле келе элек, жинденбей эле коёлучу дейт элем.
– Сиз жатаканада жашаганда кандай кызыктуу, тамашалуу күндөр өттү эле?
– Негизинен, мен ата-энемдер менен чогуу эле жашаймын. Достор менен кызыктуу да, ошон үчүн эле жатаканага чыгып алганмын. Күлкүлүү күндөр күнүгө эле болуп турчу. Түнү менен уктабай кече уюштуруп алып ырдап-бийлесек жатакананын астыңкы кабатындагылар чыгып урушчу. Кыскасы, жакшы күндөр өттү. Мен үйдүн алыстыгынан эмес, өзүм каалап, достор менен бирге болуу максатында жатаканага чыгып жашап жүргөм. Кээде ошол күндөрдү сагынам. Азыр үйдө ата-энем менен биргемин.
– Биз сизди ди-джей катары да, ырчы катары да тааныйбыз да. Ошонун кайсынысы сизге жакыныраак?
– Азыр көп убактым, башкача айтканда, күнүмдүн жарымы радиодо өтүп жатат. Калганы ата-энеме, туугандарыма, ырчылыкка бөлүнөт. Бардыгына тең кароо кыйын. Убакыт деген учкан куш экен. Бирок, баарын тең алып кеткенге аракет кылам. Эгерде каалоо болсо, көп ийгиликтерге жетишсе болот. Экөө тең бири-бирине тоскоолдук кылбайт. Тескерисинче, бири-бирин толуктап турат.
– Сиздин продюсериңиз барбы? Бар болсо аны менен канча убакытка чейин иштешейин деген оюңуз бар? Анткени, көбүнчө ырчылар менен продюсерлеринин ортосунда пикир келишпестиктер болуп кетип жатпайбы.
– Продюсерим убагында болгон. Азырынча өзүм эле иш алып барып жаткан кезим. Андай жардамчысы жок эле оокат кылса да болот. Кудайга шүгүр эле, “акырын барсаң алыс барасың” дегендей, өзүмдүн арабамды өзүм сүйрөп жатам.

Бактыгүл, 23 жашта, Токтогул:
– Алгачкы жолу өбүшкөнүңүз эсиңиздеби?
– Ушул убакка чейин өбүшүп көргөн эмесмин.
– Эмнеге мынча чырайлуусуз?
– Эми Кудайдын жаратканы да. Менимче, адамдардын баары эле чырайлуу болуш керек. Анткени, бул жашоого жаралуунун өзү эле канча сулуулук.
– Түндүктөн кыз алат белеңиз?
– Түндүк-түштүк дебеймин, кыргыздын кызы болсо эле болду.

Адинай, 14 жашта, Бишкек:
– Чыңгыз байке, бүгүн 16-июлда “Кыргызстан Обондору” радиосунда эфирге чыкканыңызга туптуура 2 жыл болуптур, куттуктайм.
– Чоң рахмат, мен аны унутуп калыптырмын. Эсиңизден чыгарбай жүргө­нү­ңүзгө ыраазычылык билдирем. Телефон чалып эскерткениңизге кубанычтамын.
– Көз ачып-жумганча 2 жыл болуп калган экен. Мага 2 жыл эмес, көп жылдай болуп жатат. Сиз үчүнчү? Кандай сезимдер болууда?
– Жумушуң кызыктуу болсо убакыттын өткөнүн такыр байкабай калат экенсиң. Өзүмдү жумушка жаңы келгендей эле сезе берем. Эми байкалбай ушунча убакыт өтүп кетиптир. Жаман болгон жок. Өз күйөрмандарымды таптым, ата-энемдин сыймыгына ээ болдум дегендей.
– Менин билишимче, сиз “Бирде жигит төө минет, бирде жигит жөө жү­рөт” деген макалды жакшы көрөсүз. Азыр төө минип жүргөн кезиңизби же?..
– Жигит болгондон кийин ар кандай учурлар болот. Ошондуктан, жөө калганда дагы, төө мингенде дагы тобо деп жашаш керек. “Кечээ ким элем, бүгүн ким болдум, эртең ким болом?” деп өзүңдү көзөмөлдөп туруу зарыл. Кудайга шүгүр, төө болбосо дагы тайдын үстүндө жүрсөм керек. Ата-энем, бир туугандарым, досторум бар бактылуумун.
– Кыялыңыздагы айдын перисин кандай элестетесиз?
– Билбейм, эми тагдырдын кошкону. Азыркы заманда кичине тыңыраак болбосоң да болбойт. Эки жарты бир бүтүн болуп, тириликти алдыга сүйрөгөнгө тил билги, ишмер кыз болсо жаман болбойт. Анан албетте, татынакай, акыл-эстүү, назик, кыскасы, аялзатына тиешелүү бардык сапаттарга ээ болгон айым болсо деймин. Мага жароокер жар, балдарымдын мээримдүү апасы болуп турса, мындан өткөн бакыт барбы?

Наргиза, 19 жашта, Бишкек:
– Үйбүлөңүз тууралуу кененирээк айтып берсеңиз. Апаңызга окшошсузбу же атаңызгабы?
– Атам Мырза 15 жыл сүрөтчүлүктү аркалаган. Апам Урниса бухгалтер. Карындаштарым Айтурган 5-класска, Гүлтурган 3-класска көчүштү, эң кичүү карындашым Эркинай 5 жашта. Аларды аябай жакшы көрөм. Өңүм апама, жөтөлгөнүм атама окшош экенин билем.
– Шоу-бизнеске аралашканыңызга бир жыл болду. Кандай ийгиликке жеттим деп ойлойсуз?
– Мен кыйратып койдум дегенден алысмын. Бул алгачкы гана кадамдарым. Жашоо жаңы башталды, жашпыз, келечегибиз алдыда. Буюрса, бир жылдын ичинде жаман болгон жок. Чөйрөм кеңейди, жакшы адамдар менен тааныш болдум дегендей. Шоу-бизнесте өз ордумду тапканга жетиштим. Аракет кылсаң берекет болот, дагы деле болсо алдыга умтулуп жатам.
– Сиздин оюңузча, биздин ырчылар да чет жакка чыгып ырдашса болобу?
– Аракет кылса сөзсүз болот. Эмне үчүн болбош керек? Кыргызда таланттуу улан-кыздар көп. Өзүңүз деле көрүп жатсаңыз керек. Мен сөз берем, ушул ырчылардын төрт-бешөө сыртка чыкса, көп элдин колдоосуна арзыйт. Болгону, иштеш керек.

Айгерим, 17 жашта, Бишкек:
– Кайсы тамактарды жакшы көрөсүз? Жакшы көргөн тамагыңызды өзүңүз жасай аласызбы?
– Палоо менен шишкебекти жакшы көрөм. Курсак ачканда тамак тандабай калам. Шишкебекти өзүм бышырчумун. Мектепте окуп жүргөндө жада калса “шашлыкчы” деген атка конгонмун. Тоого чыкканда мугалимдерге шишкебек бышырып берчүмүн. Ошондой эле палоо жасаганды да билем. Жаныбарларды деле велосипед тептирип жатпайбы, адам болуп туруп кантип палоо жасаганды билбей калайын?!
– Берметтей тизилген тиштериңизди кантип сактайсыз?
– Өзгөчө деле сыры жок. Эл катары эле бир күндө үч маал жууп коём. Болгону, жалаң “Blend-a-med” тиш пастасын колдоном.

Сезим, 13 жашта, Бишкек:
– Дүйнөдө эң кымбат адамыңыз ким?
– Албетте, ата-энем.
– Апаңыз бир кызды жактырып калып, “ушул кызга үйлөн” десе эмне дейт элеңиз?
– Сунушун четке какпастан, ал кызды карап көрөт элем. Балким, жылдызыбыз келишип калса ажеп эмес. Ата-эне баласын эч качан жаман болсун дебейт.
– Бала кезиңизде болгон кызыктуу окуялардан айтып бербейсизби?
– Балалык кез сонун. Ал убакта эмнелер гана болбойт?! Азыр эстей албай турам. Ошентсе да бала кездеги көз ирмемди айтып берейин. Көчөнү чаңызгытып жылаңайлак, жылаңбаш ойночумун. Аябай шок да, эрке да элем. 3-4-класста алып берген сары тобум бар болчу. Азыр аны менен карындаштарым ойноп жүрүшөт. Андан сырткары, 2 кап оюнчугум бар эле.

Махабат, 14 жашта, Бишкек:
– Сизди “быйыл үйлөнөт экен” деп уктум. Бизди качан жеңелүү кыласыз?
– Мен жайкы эс алууга кеткенде радиодон Арстан байке: “Чыңгыз келинчектүү болуп келет, үйлөнөт”,- деп жатып эле пиар болуп кетти окшойт. Бул жөн гана кесиптештеримдин тамашасы. Ушундан улам көптөр “быйыл үйлө­нөт экен” деп ойлоп калышты болуш керек. Балким, сүйлөшкөн кызым бар болсо үйлөнүү жөнүндө ойлонуп көр­мөк­мүн. Бирок, ал киши да жок болуп жатпайбы. Учурда издеп жүргөн кезим.
– Чыңгыз байке, сүйлөшүп көр­бөй­лүбү, мүмкүн тагдырлаш болуп жүрбөйлү?!
– Каршы эмесмин, чын эле сиз айткандай болуп калышы ыктымал.
– Бирок, менин жашым 14тө эле...
– Убакыт байкалбай, тез эле өтүп кетет. Чоңоё берсеңиз анан көрөбүз да.

Элзада, 15 жашта, Бишкек:
– Апаңыздын ак сүтүн актадым деп ойлойсузбу?
– Жок, жашоого эми келип, нанды “нана” деп жаңы үйрөнүп жатсак, кайдагы ак сүттү актоо? Эненин ак сүтүн жеке эле мен эмес, бардык эле адамдар актай албайт болушу керек. Актай албасам да өмүр бою сый көрсөтүп өткөнгө аракет кылам.
– Качандыр бир кезде депутат болом деп ойлойсузбу?
– Кыргыздын жигити болгондон кийин элиңе эмгегиңди арнаганга не жетсин?! Жашоодон көптөгөн сюрприздерди күтсө болот. Тагдырыма жазса, элиме жакшы жактарым, эмгегим менен көрүнгөнгө бар күчүмдү аябайм.

Даанышман, 15 жашта, Бишкек:
– Ырчылар рингге чыгышат деп “Супер-Инфо” газетасы жазбады беле. Бул рингге кандай даярдык көрүп жатасыз?
– Тилекке каршы, убакыттын тардыгына байланыштуу, эч кандай даярдыгым жок. Ал рингге мен чыкпайм.
– Нелянын ырынын клибинде эки кыз менен жүрөсүз го. Чыныгы жашооңузда мындай эмессизби?
– Экөө эмес, бирөө да жок болуп жатпайбы.

Айпери, 15 жашта, Ош:
– “2007-жылдын эң сексуалдуу ырчысы” деген наам берилсе макул болот белеңиз?
– Билбейм аны, бул жөнүндө ойлоп көрбөптүрмүн.
– “Супер-Инфонун” “Тамаша торуна” түшкөндө кандай абалда калдыңыз эле?
– Эми ал жөнүндө кеңири маалыматты гезит ийне-жибине чейин жазбады беле. Албетте, мындай окуяны күткөн эмесмин, алгач шок болдум. Кыскасы, сиз өзүңүз гезиттен окугандай абалда калгам.
– Мал сойгонду билесизби?
– Албетте, кыргыздын жигити болуп туруп мал сойгонду билбесем уят го. Кичинекей кезимде алгач тоок сойгонду үйрөнгөм. Биринчи жолу сойгондо тоокту моюнунан эмес, төшүнөн баштап сойгом. Ошентип жатып үйрөнүп алгам. Азыр мал сойгон жагынан устамын.

Оксана, 19 жашта, Бишкек:
– Боюңуз узун. Кантип боюңузду узарттыңыз эле, сырын айтып бербейсизби?
– Билбейм, табиятымдан ушундай болушум керек. 9-класска чейин томпойгон эле толук бала болчумун. Велосипедди көп тепчүмүн. Мүмкүн, ошондон улам боюм өскөндүр.
– Эгерде сизди модель агенттигине чакырса иштейт белеңиз?
– Ойлонуп көрмөкмүн.
– Голливуд ырчылары менен дуэт ырдаганга сунуш кылышсачы?
– Биринчи сунуш кылышсынчы, анан көрөбүз да.
– Айдоочулук күбөлүгүңүздү сатып алгансызбы же окуп алгансызбы? Жол эрежесин бузуп, МАИге кармалган учуруңуз болду беле?
– Машина айдаганды окубай эле үйрөнүп, анан айдоочулук күбөлүктү сатып алгам. Жолдо жүрүү эрежелерин Кудайга шүгүр эле билем. Бирок, жол чырактын сарысы жанганда өтүп кетип, анча-мынча эрежени бузуп койгон учурларым кездешет. МАИ кызматкерлерине түшкөн учурларым деле көп болот. Анткени, эртең менен жумушка шашып келем. Катуураак айдаганда “токто” дегендер көп.
– Эфирде айтчу түгөнбөгөн анекдотторду кайдан табасыз?
– Жумушум ошол да, элдин маанайын көтөрүш керек. Ал үчүн сөздүн гүлүн терип сүйлөп, кызыктуу анекдотторду айтканга аракет кылам. Досторумдун, туугандарымдын арасында уккан жакшы сөздөрдү, анекдотторду эстеп калам да, эртеси күнү эфирден айта берем. Кыскасы, издесең табасың.

Анара, 16 жашта, Бишкек:
– Ырчылар радиого ырларын бергенде акча төлөшөбү?
– Жок, андай эмес, ырды сындан өткөрөбүз. Эгер биздин радиого ылайыктуу болсо, ал ырлар сөзсүз эфирден кетет. Кээде бизге начар ырлар келип радиодон кетпей калса, кээ бирөөлөр ошондой ойлошу мүмкүн. Мазмунуна, обонуна, аранжировкасына, үнүнө көңүл буруп коюшса болду. Бизде андан артык талап жок.
– Сиз радиодо эмне үчүн кечинде иштебейсиз?
– Бизде ошондой, эртең мененки, түшкү, кечки кылып, сүйлөө стилине карата бөлөт. Менин ди-джейлик стилим эртең мененки таңкы шоуну алып барганга ылайык болгондуктан, эртең мененкиге бөлүнгөм.
– Канча жашка чейин ди-джей болуп иштеймин деп ойлойсуз?
– Билбейм. Аны убакыт көргөзөт. Азыр жашмын, иштей берейин. Балким, Бактыбек Мамытовдой диктор болуп кетемби, алдын-ала эч нерсе айта албайм. Бирок, Дүйшөн Байдөбөтов менен Бактыбек Мамытов айгалар менин кумирлерим десем болот.

Бермет, 17 жашта, Бишкек:
– Жашоонун кызыгы эмнеде?
– Жашоонун кызыгы жашоодо. Жашоонун өзү рахат.
– Көп аялдуулукка көз карашыңыз...
– 100 пайызга каршымын. Бир аялды татыктуу багып, балдарын өксүтпөй караса, бул – чыныгы мырзалык сапат. Кыздардын чет жакка турмушка чыгышын да туура көрбөйм. Жигиттер жетишпейт дегенге да кошулбайм. Жеңил ойлуу болбогонго аракет кылсак баары болот.
– Тамада болуп иштейсизби? Мен тойго чакырсам канча аласыз?
– Жакындарымдын, дос-тааныштарымдын суранычы менен тойлорду алпарып калам. Биз, ырчылар, элибизде дайыма той болуп туруусун каалайбыз. Ал эми канча акча алаарыма кызыксаңыз, тоюңузга чакырсаңыз билесиз.

Айгерим, 14 жашта, Бишкек:
– “Кыргызстан Обондору” радиосунан алган акчаңыз өзү­ңүз­гө жетеби?
– Акчанын акылы жок эмеспи, канча болсо да жетпейт. Баскан-турганың, ал- бул деп жатып эле акча кете берет. Менин оюмча, адамга акча эч качан жетпейт. Ошондуктан, адам баарына топук кылыш керек.
– Президент болуп калсаңыз эмне кылмаксыз?
– О, анда тартип деген сөздү аябай жаттамакмын. Башкаларга айтуудан мурун өзүң таза болсоң жүзүң жарык, айтканың өтүмдүү болот. Ал эми президенттин жумушу оңой же жыргал деп айтуу туура эмес. Элдин жүгүн артуу анча-мынча эркектин колунан келбейт.
– Күйөрманыңыздан алган унутулгус белегиңиз эмне болгон?
– Мындан 4-5 ай мурун жумушка бир кыз чоң оролмодогу белекти алып келип берди. Көрсө, анын ичиндеги гитара экен. Канышай деген күйөрман кызым сиңдисинен берип жибериптир. Ал кыздын өзүн көрө элекмин. Кат да жазган экен, ал катты гитаранын ичине салып койгом. Мындай белектер, каттар кыздардан көп эле келет. Өткөндө өзүмө окшош кылып Айхан деген кыз сүрөт тартып берген. Андай белектери үчүн рахматымды айтам. Күйөрмандарымдан келген каттар болсо 5 килограмм болуп калды го. Баары сакталуу.

Даярдаган Замира Рахманбердиева



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: