Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

«АЛАКАЧЫП КЕТИШСЕ ЭРКЕКЧЕ МУШТАШАМ»

№254 14-20-сентябрь, 2007-ж.


«Боз салкын» фильми аркылуу мекенибиздин булуң-бурчуна чейин таанымал болууга жетишкен Асема азыр 21 гана жашта. Жаш экенине карабай баарыбыздын бүйүрүбүздү кызытып, учурда Кыргызстанда популярдуулугу артып турган убагы.

– Асема, сен тар­тылган “Боз салкын” фильмин көр­бөгөн кыргыз калбаса керек. Бул киного кандайча келип калдың эле?
– 2004-жылы Бишкектеги “Бийиктик” басмаканасында иштеп жүргөндө ал жакка Шазада аттуу бир байке келип, чогуу иштеп калдык. Ал “Боз салкындын” режиссёру Эрнест Абдыжапаров агайдын алысыраак иниси болот экен. Кичинекей кезимден эле ыр-бийге жакын болуп өскөндүгүмдөн, анын алдында өзүмчө эле артист боло берчү­мүн. Бир күнү эле Шазада байке менин кылыктарыма күлүп: “Бир кино тартылганы жатат. Кастинг жүргүзүп, баш каармандын ордуна таланттуу кыз издеп жатышкан. Барсаң сен сөзсүз өтөсүң”,- деп калды. Башында анча деле маани берген эмесмин. Кийин бактымды бир сынап көрүүнү чечип, кастингге бардым. Алгач мени баары эле көңүлкош кабыл алышкан. Анан берилген тапшырманы аткаргандан кийин таңкалып эле ооздорун ачып калышты. Кийин Эрнест агай: “Сени бир көргөндө жактырган эмесмин, оруска окшогон кандай кыз дегем. Кыргызча сүйлөп аткара келсең эле жакшынакай актриса болуп калат экенсиң. Эгерде кастинг сүрөт боюнча болсо, сени чакырмак эмесмин”,- деп айтып жүрдү.
– Бул алгачкы ролуң эмеспи, аткаруучулук жагынан кыйынчылыктар болгондур...
– Көп деле кыйналган жокмун. Анткени, менин кичинекей кезимден эле аткаруучулук талантым бар. Кээ­де үйгө коноктор келип калышса баарын күлдүрө бергендигимден, айласы кеткен апам үстөлдүн астынан чымчып койчу. Тасманы тартуу убагында болсо, жанагы тоонун капталынан чуркап жүрүп бийлеген кадрлар үч ирет кайра-кайра тартылган. Бул менин аткара ал­бай кыйналганымдан эмес, ойногонумду көрүп, операторлордон тартып режиссёрго чейин каткырып жатып тарта албай калышканынан болду.
– Киного өз атың менен тартылууну ким сунуш кылды эле?
– Сценарий боюнча ал кыздын аты Асыл болчу. Анан мени баары эле “Асема” деп чакырып атышып Асема болуп калган. Анан кинонун жаратуучулары: “Мейли, өз аты менен эле тартыла берсин”,- деп коюшкан.
– Сени көчөдөн көргөндөр таанып калышаарында шек жок. Асема деп атыңды да билишет. Андай учурларда эмне кыласың?
– Башында таанып колдору менен көрсө­түш­сө, кыжаалат боло берчүмүн. Алтургай кичинекей балдар: “Сен Асемасыңбы?”-деп да сурап калышчу. Аларга кебетемди бузуп, тилимди чыгарып койсом: “Аа, ал эмес экен”,- деп кетип калышаар эле. Азыр болсо элдер менен сүйлөшүп кете берем. Өзүм маршруткаларда кетип баратып барчу жериме жеткиче мени тааныгандар менен эски тааныштай баарлашып барам.
– Күйөрмандарың көбөйүп, алардын арасында белектерди берип, сага жагынып жаткандары да болсо керек?
– Ооба, белек бергендер көп эле болот. Алардын арасында бир күйөрманым күндө гүл берип жүрөт. Ар күнү ар кандай түстөгү роза гүлдөрү менен көңүлүм­дү ачат. Бул – менин күйөрмандарым берген жагымдуу белектердин эң өзгөчөсү.
– Ал ким болушу мүмкүн? Шек санаган адамың барбы?
– Жөн гана менин талантымды баалаган күйөрмандарымдын бири болсо керек. Мен деле, мисалы, Женнифер Лопес бул жакта болсо күндө гүл берип турмакмын. Анткени, мен дагы анын талантын баалаган күйөрмандарынын биримин да. Эгерде гүлдүн ээси мени сүйгөн жигит болсо, белегин берип эле жүрө бербестен, эмгиче кандайдыр бир аракеттерин көрө баштамак. Жок дегенде келип мени менен таанышып кетмек.
– Ушинтип сага көрүнбөй жүрүп эле бир күнү кинодогудай кылып алакачып кетсе кантесиң? Эл арасында кино көрүп отуруп “мен ушул кызды алакачам” деп достору менен мелдеше кеткен жигиттер да бар экен. Андайлар кезигип жатабы?
– Андай болушу мүмкүн эмес. Анткени, азыр адамдар дагы заманбап салт менен үйлөнүп калышпадыбы. Жок дегенде кудалашып дегендей. Деги эле алакачуу салтына мен терс көз караштамын. Эгерде алакачып кетсе, отурмак эмесмин деп ойлойм. Анда кинодогудай эмес, чындап эркекче мушташмакмын. Мага күчтөрү жетпейт. Кээде телефон аркылуу коркутушкандары болбосо андайлар мага келе да алышпайт. Саатка карашпайт, түнкү саат экиби, үчпү же күндүзбү, айтор, чалып алып эле: “Асема, биз сени бүгүн саат мынчада тигил жерден алакачып кетебиз”,- дешет. Андайлардан коркпойм. Айтпадымбы, эркекче мушташам.
– Турмушта кинодогу жолдошуң Тынчтык экөөңөр­дүн мамилеңер кандай?
– Ортобузда достуктан башка эч кандай мамиле жок. А сүйүү сезими болсо, мен тарапта жок, аны билбейм. Баса, учурдан пайдаланып айтып алайын, эл арасында «Съездбекке турмушка чыгып, боюнда бар экен», «Тынч­тыкбек алакачып кетиптир» деген сыяктуу ушактар кеңири тараптыр. Булардын баары туура эмес, жөн гана ушак кептер. Учурда мен өзүмдүн, алар өздөрү­нүн жашоосу менен алектенишүүдө.
– Андай ушактардын арасында “Асема кинодо жөнөкөй кыз болгону менен чыныгы жашоосунда шаардын ойсоңдогон кыздарынын бири экен. Тамеки тартып, бой көтөрүп, эч кимди теңине албайт” дегендери да бар экен…
– Кудай сакта, мен андай эмесмин. «Эл оозунда элек жок» деп коюшат эмеспи, айта беришет да. Шаардык болгонум менен жөнөкөй кызмын. Тамеки тартпайм, спирт ичимдиктерин ичпейм.
– Кинодогу Асема менен жашоодогу Асеманын окшоштуктары барбы?
– Көп мүнөздөрүм окшошуп кетет. Мисалы, мен дагы бир таарынган адамыма түшүндү­рүп эч нерсе айтпастан эле сүйлөбөй коём. Анан да өтө эле ишенчээкмин, ушул жерим өзүмө жакпайт. Ал гана эмес, кинодогу Асемага менин башымдан өткөргөн сүйүүмдү да окшоштурууга болот. Бир кыз, атын айтпай эле коёюн, сүйлөшүп жүргөн жигитим экөөбүздүн ортобузга түшүп, анын айынан жигитим менен таптакыр сүй­лөш­пөй калгам. Кинодогу Асемадай болуп мен дагы жигитиме эч нерсе дебей, таарынычымды айтпай эле кетип калган элем. Азыр кээде жолугуп калсак, кыжырым келип эле кача берем.
– А учурда жигитиң барбы?
– Жигитим бар. Беш айдан бери кыз-жигит катары сүйлөшүп жүрөбүз. Ал азыр чет өлкөдө иштейт.
– Качан баш кошолу деп турасыңар?
– Буюрган күнү. Өткөндө ыр жаздырганы кетип баратсак, бут кийимимдин та­маны ачылып кетип жатпайбы. Аялдамада туруп элден уялганымды айтпа. Таманы да бийик болчу. Анан маршрутка келбегенден кийин чыдабай жөө кете бердим. Филармониядан ЦУМга чейин араң жетип, жаңы эле маршруткага отурганымда таманы түшүп калды. Эртеси башка бут кийим кийип алсам деле жолдон таманы түшүп калып, дал ошондой окуя кайталанып атпайбы. Аны уккан досторум «күйөөгө чыкканы калгансың го» деп жатышат. Ошондон бери жапыз тамандуу бут кийимдерди кийип калдым.
– Жигитиң алыста болсо, курбуларың менен кайда эс алууну жактырасың?
– Мен атайлап барып эс албайм. Бийге баруу дегенди унуттум. Кээде эле бирөөнүн туулган күнүнө барып калсам, ошол – мага эс алуу. Мен жаш кезимден баштап эле өзүм иштеп, акча тапканга көнгөм. Азыр да жумуштун айынан эс алууга деле убакыт артпайт.
– Жаш кезиңден эле иштеп акча табууга өтүшүңө ата-энең кандай карашат?
– Мен өзүм тынч отура албаган эмгекчил адаммын. 9-класстан тартып эле өз жүгүм­дү өзүм көтөрүп келем. Алгач жогоруда айткандай, басмаканада иштегем. Кийин кафелерде ырдап жүр­дүм, азыркыга чейин эле каникул учу­рун­да ырдап акча табам. Ата-энем башында: “Сага эмне жетишпей жатат? Акча керекпи? Курсагың ачпы?”- деп чычалай беришчү. А азыр көнүп калышты. Эртең менен эрте үйдөн чыгып кеткен бойдон кечинде барам. Кыскасы, үйдөгүлөргө күндө келип түнөп кетүүчү конок эле болуп калдым.
– Учурда окууңдан тышкары эмне менен алектенип жатасың?
– Түшкө чейин сабакка барам, түштөн кийин чыгармачылык менен алектенип ыр жаздырууга чуркап жатам. Кээде жетише албай сабактан кыйналган учурларым да болот. Сүрөт тартуу менен тигүүчү­лүк менин дагы бир өнөрүм десем болот. Тынч отургандан көрө бир нерсени ала калып саймалап, кооздоп бир жерге иле коюуну жактырам. Мурда кийим тигүүчү машинам бар эле, азыр бузулуп калып колго тигип жатам. Жогоруда айткандай, бийлегенди жактырам. Былтыркы жылдан бери “Айбике” деп аталган 10 жашар кыздардан турган бийчилер тобум бар. Кээ бир концерттерде катышып жүрүшөт. Убактымдын тардыгына байланыштуу топту жакын курбума тапшырууну ойлоп жатам. Андан тышкары, учурда жаңы киного тартылуу алдында турам. Анан да жаңы эле “Махабат жылдызы” деген мюзиклга тартылып бүттүм. Рекламаларга тартылып жүрөм, бирок, эфирге чыга элек. Айтор, талыкпастан чыгармачылык менен иштеп келатам.
– Ырчылык талантыңды ачып, эл алдына ырдап чыгышыңа эмнелер түрткү болду?
– Ырдоо жактан талантым бар болгону менен ырдап чыгам деп деле ойлогон эмесмин. Бирок, тегерегимдеги жакын адамдарымдын колдоосунда алгачкы ырымды жаздырдым. “Сенин үнүң бар, сенин музыкага шыгың бар”,- дей берип көндүрүштү. Учурда “Өчпөсө экен сүйүү­бүз” деген менин аткаруумдагы алгачкы ыр радиолордон кетип жатат, обону өзүмдүкү. Каражаттын тартыштыгынан клип тартууга жана дагы чыгармачылык жактан өсүүгө демөөрчү издеп жаткан учурум.
– Ар бир адамдын балалык чагы ар башкача болот эмеспи. Сен дагы таттуу балалык чагыңды эскере кетсең.
– Балалык кез жакшы өттү. Мен үйдө эң кичүүсүмүн, анан да жалгыз кызмын. Ата-энемдин, эки байкемдин ортосунда эркелеп жүрүп өскөм. Эрке болгонум менен, кызыктуусу, жетиге чыккыча сүйлөбөй жүрө берчү экенмин. Тагыраак айтканда, тилим чыккан, сүйлөгөндү билем. Бирок, күнү-түнү үн катпай жүрө берчү экенмин. “Асема, тигил эмне? Бул эмне? Атың ким?”- деп кыйнап жатып бир-эки сөз араң чыгарышчу. Анан бир күнү эле чачылып турган үстөлдүн үстүн көрсөтүп: “Үстөлдү тазалагыла, мен ырдайм”,- дептирмин. Ошондон кийин эл менен сүйлөшө баштаптырмын. Бирок, үч жашымдан баштап эле бийлей баштагам. 2-классымдан тартып “Чолпон” бий ансамблинде бийлеп, чоң-чоң концерттерге катышчумун. Негизи эле, искусство дүйнөсүнө аралаштырып, жолумду ачкан ошол ансамблдеги кураторум Зинаида Мамасалиевага чоң ыраазычылык билдиргим келет.
Кийин 11-классты аяктаган соң шаарыбыздагы кадыр-барктуу университеттердин биринен билим алууну чечип, Улуттук университеттин эл аралык мамилелер факультетине тапшыргам. Ошондон кийин эл алдына чыгып ырдоону, бий­лөөнү биротоло токтотом деп чечкем. Бирок, тагдырым мени искусство менен бекем байланыштырып койгондуктанбы, айтор, кайра эле экинчи курс кезимде киного тартыла баштадым.

Маектешкен Чолпон Сүйүнбаева


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: