Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Талант Анарбаев: «АЗЫРКЫ ДЕПУТАТТАР МЕНДЕН ДИПЛОМУ МЕНЕН ЭЛЕ АЙЫРМАЛАНАТ»

№273 25-31-январь, 2008-ж.


Акыркы кезде эмнегедир куудулдарыбыз жоголуп бараткандай сезилет. Балким, сахнаны ээлеп алган жаш жылдыздардын арасынан көрүнбөй калып жаткандыр, балким, чын эле элди күлдүрүүдөн чарчап, эс алууга чыгышкандыр. Эмнеси болсо да өнөктөш­төрүнүн арасынан суурулуп жыл башында жаңы программалары менен “Бешиликтен” чыккан таланттуу жаш куудул Талант Анарбаев Оштон келип калган экен. Биз куудул менен баарлашканга шаштык.

– Талант, элди күлдүрүп, элге жагып, куудул деген атка татыктуу болуштун сыры эмнеде деп ойлойсуз?
– Албетте, ташкындаган таланттын болушу зарыл. Анан талантым бар деп эле изденбей жүрө берсең деле элди тажатып алышың мүмкүн. Ошондуктан, дайыма аракетте болуп, бардык жаңылыктардан кабардар болуп турушуң керек. Ошону менен бирге элдин жашоо тур­мушун, жашоо деңгээлин да өз­дөш­түрө билүү зарыл. Кыскасын айтканда, өзүңдөн-өзүң эле куудул боло албайсың. Азыр акча берип юрист болсоң болот, акчаң болсо депутат болсоң да болот. 500 долларың бар болсо ырчы болуп, бир айдын ичинде “звезда” боло аласың. Ырдай албасаң үнүңдү компьютерден жасатып, бир клип тарттырып, КТРге берип койсоң бүттү, сен ырчысың. Азыркылар ушинтип эле ырчы болуп жатышпайбы. Ал эми акча берип сен эч качан куудул боло албайсың. 500 доллар эмес, миллион долларың болсо да ары жагыңда чымының болбосо куудул болуп элди күлдүрө албайсың да, туурабы?
– Демек, куудулдук талант менин канымда бар деп коркпой айта аласыз...
– Менин оюмча, атым да бекеринен Талант деп коюлбаса керек. Анткени, адамдын аты жашоосуна таасирин тийгизет. Ар бир адам атына жараша болоорун көп байкаймын. Кичинекейимден суур көрөмбү, коён көрөмбү, айтор, көргө­нүм­дүн баарын окшоштуруп туурай берчү­мүн. Аны байкаган апам: “Так өзүндөй кы­лып туурайсың”,- деп мактап калчу. Жаңыдан тилим чыгып баштаганда эле күл­күлүү ырларды жаттап алчумун. Мурда жиптен токулган баштык болоор эле, ошого мени салып туруп, дубалда кагылып турган чоң мыкка илип коюшчу. Баштыктын ичинде отуруп алып манас айтып, жаттаган ырларымды айтсам, үйгө келгендердин боору эзилип күлүп калышчу. Кичине чоңоюп калганымда өзүмдөн 10-15 жаш улуу балдар “эй, Талант, бери кел” деп чакырып алышып, “бизди күл­дүр­чү” дей беришчү. Мен ойлонбой туруп жаттап алган сатираларымды айтып бер­сем, ичтерин кармап алып күлүшчү. Ошентип, ме­нин кылыгыма эл күлсө, ага сүйү­нүп, эрдемсинип калчумун. Атам айылда маданият үйүнүн кызматкери болчу. Ата-энем отуруш, кечелерде жакшы ырдашып, артисттерди баалашчу. Ошон­дон улам болсо керек, мени “куудул болбо” деп тыйган эч ким болгон жок.
– Кичинекей куудул мектепте кандай окуучу эле?
– Мектепте жалаң “беш” деген баага окубасам да, жакшы окуучулардын эле катарында болчумун. Мен окубай коюп эмес, тентектик кылып мугалимдерди көп ыйлатчумун. Бирок, коомдук иштерге активдүү катышып, конкурс, кароо-сынактарга барып, ийгиликтерге жетип, кайра эле тентектигимди артынан жууп, тазалап алчумун. Антпесем мектепке чакырыла берип апамдын жаны калбай калбайбы. Шоктук кылган мектептеги “хулиган” балдардын төрт баланын үчүнчүсүндө сөзсүз менин фамилиям бар болчу. Мектепте окуп жүргөндө эшиктен кар алып келип эжей ары карганда журналга кар ыргытып коюп, кыздардын чачын жулуп, иши кылса, жаным тынчу эмес. 3-4-класста окуп жүргөндө автобуста баратып кемпирдин үнү менен “айланайын, шопур балам, ушул жерге токтоп койчу” деп тамаша кылып кыйкырганды жакшы көрчүмүн. Айдоочу токтотсо, эч ким түшпөйт. “Ким токтотту?” деген кыязда баары бири-бирин карап калышчу. Сүйлөнгөн айдоочу эми эле автобусун айдап жөнөгөндө: “Ээ, балам, токтоп койчу” деп чалдын үнү менен кыйкырам. Автобус токтосо, дагы эле эч ким түшпөй койчу. Анан айдоочу кыйкырып чал-кемпирлер менен урушуп, автобустун ичи ызы-чуу болуп жатып калчу. Дагы бир жолу автобуста кетип баратып элдин көптүгүнөн кысылып калдым. Зеригип эмне кылаарымды билбей “маа, ма-аа” деп эчкини туурасам, “автобустун ичине ким эчки салып алган” деп ызы-чуу болуп кетсе болобу. Ызылдашып жатып эчкини таппай, өздөрүнчө таңкалышып, тынчып калышкан. Ошентип жүрүп 10-класска чейин эле окудум. Менин оюмча, 11-классты сөзсүз окуунун кереги жок. Анткени, кайдагы бир акылга туура келбеген астрономия, дагы ушул сыяктуу түшү­нүк­сүз нерселерди окутушат экен. Бирок, мен окубасам да, 11-классты бүттү деген атестатты мугалимдер өз­дөрү алып келип беришкен.
– Үйдө да шоктук кылып атаңыздан таяк жеген күндөрүңүз көп болсо керек...
– Мен аябай шок болгонум менен ошончолук өжөр да болчумун. Үйдө 6 бир туугандын экинчисимин. Менден кичүү эки иним, эки карындашым бар. Үйдүн чоңу болгондуктан, шоктонбой, тескерисинче, апама жардам берип, үйдүн да, короонун да жумуштарын жасай берчү­мүн. Уй саап, короо шыпырып, кой багып, талаага иштеп, турмушка бышып чоңойдум. Колумдан бардык жумуш келген универсал адаммын. Азыр бир туугандарымдын баары үйлүү-жайлуу, өздөрү менен өздөрү. Үйлөнө элек мен эле калдым. Ана үйлөнөм, мына үйлө­нөм деп жатып 30га чыгып калыптырмын. Анын үстүнө апам ооруп жүрүп мурдагы жылы каза болуп, андан кийинки жылы иним каза болуп, үйлөнгөнгө такыр көңүлүм жок жүрдүм. Мына, азыр бир аз өзүмө келип калдым, үйлөнгөнгө убакыт эми келди деп ойлойм.
– Үйлөнүү керектигин моюнуңузга алып калыпсыз, көзүңүздүн астына баскан бирөө барбы?
– Азыр көңүлүмө төп келе турган кызды издеп жүрөм. Эгерде таап калсам, дароо үйлөнмөкмүн. Анткени, менин жа­шоомду түшүнгөн адамдын табылышы кыйын. Айлап гастролдо жүрөсүң, бир бутуң шаарда болсо, бир бутуң айылда. Бирде ачка, бирде ток болосуң. Мына ушунун баарына чыдаган кызга жолуксам, үйлөнөм. “Артисттин көргө­нүн хан көрбөйт, бир көргөнүн кул көр­бөйт” деп коёт эмеспи. Ошондуктан, мен айылдык же шаардык, билимдүү же билими жок деп бөлбөйм. Эң негизгиси, ыймандуу, сабырдуу, адамды сыйлай, кадырлай билген жан болсо эле болду.
– Мына ушинтип артист болуп айлап-жылдап гастролдо жүрүп эмне таптыңыз?
– Артист болуп эң негизгиси, көкүрө­гүмдөгү талантты элге тартуулап куудул деген ат таптым. Эл-жерди көрдүм, эл менен мамиле түзгөндү үйрөндүм. Бар-жокту көрүп, кыйналып-кысталып өзүм­дү таптым. Эл сени колдоп, дүркүрөтө кол чаап сүйүп турса, артист үчүн мындан өткөн байлык да, бакыт да жок болушу керек. Ал эми материалдык байлыкты айтсам, куудулдуктун арты менен 5-6 машина алмаштырып миндим, Оштон үй салганга жер алып койгом.
– Куудулдуктан башка дагы эмнеге жөндөмүңүз бар?
– Эгерде мен артист болбосом, анда бизнесмен болуп кетмекмин. 8-9-класста окуп жүргөндө эле чөп сатып, эптеп бир аз акча кылып алып, үйдөгүлөргө айтпай, шаарга келип базарда соода кылгам. Анан атамдар эптеп алдап чакырып алышып, Манас акеге кошуп берип койгон. Манас акеде жүрүп кыйналып кеттим. Анан бир аз акча чогултуп, ага үй-тиричилигине керектүү жип, кайчы, топчу, резина сыяктуу майда-чүйдө товар алып сата баштадым. Ошентип, Турбазада уйгурлар менен талашып иштеп жүрдүм. Андан кийин Ошто өрүк, мейиз сатып да иштедим. Базарда иштөө үчүн да талант керек. Мен быдылдап сүйлөп жатып жанымдагылардын да кардарларын тартып алчумун. Бал сөзгө алданган кардарлар келип менин товарымды алса, кардарын тарттырып койгондор албетте, мени урушушат. Андай учурларда күлүп же өздөрүн күлдүрүп кутулуп кетчүмүн.
– Сахнадан тажап базарга чыгып байып кеткиңиз келеби?
– Учурда “дарак бир жерден көгөрөт” деген принцип менен куудулдук кылып алектенип жатам. Эми карып сахнага чыга албай калсам да, төшөктө отуруп “Талант шоунун” балдарына сатира жазып берип тураармын. Негизи, куудулдар патриот калк болушат. Ырчыларга окшоп ар бир сатираны ар кайсы элден которуп акча таппайт. Мисалы, бир сатира жазып даярдаш үчүн эле бир ай убакыт кетет. Менимче, кыргызды улут кылып сактап калуучулардын бири бул – өнөр адамдары. А биздин өнөр адамдарыбыз, башкача айтканда, азыркы “звездалар” ар кайсы ырды которуп, чет элди туурашып, улуттук маданиятыбызды талкалап жатышпайбы.
– Азыркы сатираларыңыздын баарын өзүңүз жазасызбы же “атаңыз” Рахман Разыковдон жардам сурайсызбы?
– Рахман аке чыгарып элге таанытып койду, эми мындан аркы жолумду таап кетүү өзүмдөн. Азыр сатиралардын баарын өзүм жазам, кээде гана саясый сатираларга күчүм жетпесе, анда Рахман акеден кеңеш сурайм. Адам сахнага чыга берсе, өзү бышат. Мен Рахман акеде тарбияланып жүрүп жаштарга жол көрсө­түүчү жакшы сапатын алдым окшойт. Эртең өлсөң да эл “эй, бул бай эле, эки кабат үйү бар эле, 5-6 машинасы бар эле” деп айтпайт экен. Тескерисинче, «адамгерчиликтүү, ыймандуу эле» деп айтат тура. Ошондуктан, үйрөнгөн, билген, көр­гө­нүм­дү жаштарга үйрө­түп жол көрсөтүү максатында “Талант шоу” деген куудулдар тобун түзгөм. Учурда төрт таланттуу балдар иш­төөдө. Кудайга шүгүр, ишибиз жакшы.
– Качандыр бир кезде депутат болоюн деген оюңуз барбы?
– Чоң ой-максат, тилектерим бар. Мен ойлойм, депутат болуш үчүн сөзсүз орус тилин билиштин кереги жок деп. Анын үстүнө кыргыз болгондон кийин кыргызча эле сүйлөгөн оң. Негизи, адамдын ойлонуусу баарыныкы эле бирдей, болгону, ар кимисинин тагдыры ар башка. Эми азыркы депутаттардын менден өзгө­чөлүгү, диплому бардыгы эле болбосо, башка айырмачылыгы жок. Бирок, депутат болуп иш жасабагандан көрө, депутат болбой иш жасасаң да болот.
– Сиз жогорку окуу жайды аяктаган жок белеңиз?
– Мен артисттик менен алектенип жүрүп окуганга убакыт жоктугунан документтеримди Зулпукар деген жээниме тапшыргам. “Бир университетке тапшырып койчу”,- деп контрагымды кошо берсем, ал тапшырып коюптур. Бир жыл өткөндөн кийин “2-курс болдуң, контрагыңды төлө” дегенинен төлөп койгом. Ошол бойдон жүрө берипмин. Анан өткөндө: “Жок дегенде 6-курс болуп калдымбы?”- деп сурасам: “Жок, сен окуудан айдалып кеткенсиң. Эми кайра 1-курска отурушуң керек”,- дейт. Билим алуунун эрте кечи жок эмеспи, 30га чыгып алып университетте окуйт окшоймун. Жогорку билимдүү деген диплом баарыбир керек нерсе да.
– Концерт берейин деп камынып калыпсыз...
– Жылына бир жолу концерт берем. Жылдагы концертим бири-бирине окшошпойт. Быйыл да 30га чыгып калыпмын, сахнага чыкканыма да 15 жылдан ашык убакыт болуптур. Анан элиме “отузга чыкты курагым, элиме күлкү сунамын” деп отчёттук концертимди тартуулоонун алдында турам. Буюрса, жалаң жаңы сатиралар, жаңы форма, кызыктуу конкурстар болмокчу. Саясатчы, ырчынын баарын туурап, Султандын “13 жашар баланын арманы” деген ырын 8 тилде ырдап бермекчимин. Кыскасын айтканда, концертке келген эл кайдыгер кайтпайт.

Маектешкен Замира Рахманбердиева


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21166;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: