Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Султан Садыралиев: «МЕН ЭМИ КЫРГЫЗСТАНДЫН ТОЛУК КАНДУУ ЖАРАНЫМЫН»

№292 6-12-июнь, 2008-ж.


Ырчы Султан Садыралиевдин кыргыз шоу-бизнесине аралашканына эки жылдын жүзү болду. Бул аралык Султан үчүн көптөгөн ийгиликтерди алып келди. Жагымдуу ырлары менен бир нече күйөр­ман­дарды табууга да, жаш жүрөк­төрдү багындырууга да жетишти. Жаш жү­рөк­төрдүн кол жеткис адамына айланган бул ырчынын акыркы жаңылыктары, алдыдагы “Садыралиев тартуулайт” аттуу концертиндеги өзгөчөлүктөр туурасында ырчы менен маек курган элек.

– Султан, орто жерден чыгармачылыгыңда бир аз тыныгуу болуп кетти окшойт?
– Ооба, бир аз убакыт чыгармачылыктан алыс жүрдүм. Ата-энем ооруп калып, аларды Бишкекке алып келип, ооруканага жаткырдым. Ошентип, үч айга жакын такай алардын жанында болдум. Кудайга шүгүр, азыр экөөнүн тең денсоолугу жакшы.
– Эмне болуп ооруп калышты?
– Атам мурун көп жылдар колхоздун уюн багып, апам ошол эле колхоздо саанчы болуп эмгектенген. Колхоздор тараган акыркы жылдар менин эс тарткан кезиме туш келди. Фермадагы ар бир уйга Актөш, Алабай, Аксары сыяктуу аттарды коюп эркелетчүмүн. Уй сааганы чыккан апама ар бир уйду атынан айтып, чыбык менен айдап келип бер­чүмүн. Апам эртеден кечке ферманын ичинде жүргөн­дүктөн, кыштын кыраан чилдесиндеби, нөшөрлөп төккөн жамгырдабы, дайыма керзо өтүк кийип жүрчү. Экөөнүн денсоолугуна ошол жылдардагы бизди багабыз деп тытынган эмгектин залакасы тийсе керек деп ойлоп жатам. Атамдын да, апамдын да муундары ооруду.
– Кичинекейиңде ата-энеңдин ишине кол кабыш кылсаң, чоңойгондо аларга ырларың аркылуу дем-күч берип жаткан турбайсыңбы?
– Жылда май айынын ортосунда ата-энем уй багып жайлоого чыгышаар эле. Мен каникулга тарай элек болсом да алар менен кошо жайлоого чыгып кетчүмүн. Жайдын күнү болсо деле тоо суук болот эмеспи. Жа­ңы туулган музоону үшүп калбасын деп боз үйгө көтөрүп келип, жылытуу үчүн от жагып атама жардам берчүмүн. Апам тамак-аш алып келгени айылга түшкөндө атка учкашып эрмек болгон күндөрүм али­гече эсимде. Ошондо “апам атты качан чуркатаар экен?” деп эле күтө берээр элем. “Чап” деген сөз казакча “шап” деп айтылгандыктан, атты чуркаткым келгенде апама: “Атты шап, атты шап!”- деп ыйлаган да күндөрүм болгон. Апам мени аттан шыпырылып түшүп калбасын деп чоң жоолугу менен белине таңып алчу. Ал эми чоңойгондогу жасап жаткан ишимден экөө тең күч-кубат алышат десем жаңылышпайм. Бирок, атам эстраданы баалабаган адам. Эстрадага караганда элдик ырларды жакшы көрөт. Кыргыз ырчыларынын арасынан ага Бакыт Шатеновдон башка эч ким жакпайт. Ырларымдын ичинен “13 жашар баланын арманын” жана “43 жашарды” жакшы көрөт. Апама “Ай, энем” деген ырым өзгөчө жагат, ал гана эмес, ырдын текстин да жатка билет.
– Атайдын “Күй­дүм чогун” да ырдап чыгыпсың?
– Мен өзүмө жаккан гана ырды ырдай алам. Жагдайга жараша, продюсерим баш болгон бир топ адамдар “ырдап көрбөйсүңбү?” деп көп эле ыр сунушташат, бирок, ал ыр өзүмө жакмайынча ырдаганга дитим барбайт. Мага Атайдын бардык ырлары жагат. 2001-жылы 8-классымда «Атайдын 100 жылдыгына катышам» деп анын бүт ырларын жаттагам. Ошондон бери “Күйдүм чокту” ырдасам деген ой жадымда жүргөн. Акыры максатыма жетип, эстрада менен комуздун коштоосунда ырдап чыктым.
– Жалаң ырчылардын катышуусу менен тартыла турган “Достор” фильминде сен башкы ролду ойнойт экенсиң, ага кандайча мүмкүн­чүлүк алдың?
– Рысбек Жабировдон жакында жетим балдар жөнүндөгү “Достор” деген кино тартылаарын укканымда мен ага “казак, кыргыз элдеринин улуттук аспаптарынан арасына кошуп кетпейсизби?” деген сунушумду айткам. Рысбек байке менин ушул оюмду эске алганбы же өзүнүн да оюнда жүргөнбү, кинонун сценарийине домбраны кошуп кетиптир. Башкача айтканда, бир аял жалаякка оролгон мени, анан домбраны балдар үйүнүн алдына таштап кетет. Калганын айтпай турайын, кино тартылып бүткөн­дөн кийин өзүңөр көрөсүңөр да. Сценарийге домбра кошулганы үчүн режиссёр мени башкы ролго тандаган экен. Бул фильмди тартуу азырынча баштала элек. Алдыдагы концертимди берип алгандан кийин баштоону пландап жатабыз. Фильмге тартылуу үчүн мен чачымды кырдырышым керек экен. Буга продюсерим кандай карайт, аны азырынча сүйлөшө элекпиз.
– Достор демекчи, жашоодо кан досуң барбы?
– Чыныгы кан досторум деп сахналаштарым Мирбекти, Урматты, Акбарды айта алам. Бирок, төртөөбүз тең турмушта атаандаштарданбыз. Сахнада, чыгармачылыкта атаандашканыбыз менен бири-бирибизге ниетибиз түз, кандай кырдаал болбосун тике туруп берүүгө даярбыз деп ойлойм. Мирбек экөөбүз тең продюсерлерибизден кеткенден кийин убакыттын өтүшү менен туура эмес кылганыбызды билип, мен продюсеримден кечирим сурап кайра кайтып келбедимби. Ошондо мени Динара эже кабыл алганы менен Мирбек менен Асыл эже бир топко чейин келише албай жүрүшкөндө мен да кадимкидей чүнчүп кеткем. Мирбекке жардам берүүнүн түрдүү жактарын ойлоп жүрүп, акыры экөөнү элдештирүү максатында атайын сценарий түздүм. Ал сценарийди Динара эже колдоду. Чогуу иштешкенибиз менен Динара эже үйүмдү бир да жолу келип көргөн эмес эле. Сценарий боюнча Динара эже менин үйүмө Асыл эжени ээрчитип конокко келди. Үчөө­бүз отурсак, билмексен болуп Мирбек келип калды. “Жолугуп сүйлө­шө­лү” десек макул болбой жаткан Асыл эже аргасы жок Мирбек менен сүйлөшүүгө туура келди. Ошентип, ортодогу бир топ сөздөрдөн кийин Мирбек досум продюсери менен жарашты. Менин ошондо түзгөн сценарийим жакшы жыйынтык берип, азыр экөөбүз тең көп­төгөн ийгиликтерге жетишип жатабыз.
– Байкашымча, көпчү­лүк жаш ырчылар өз эмгеги менен байлык топтогонго жетишип жатат. Сенин кандай материалдык байлыктарың бар?
– Бардык нерсе өз убагы менен келет деп ойлойм. Мен акчанын артынан түш­пөйм. Акча менин артымдан түшсүн деген принцип менен жашайм. Алдымда айдап жүргөн машинам бар. Туулуп-өскөн Луговое айылына там салгам. Азыр ал жерде ата-энем жашайт. Жыйырма эки жаштагы балага мындан ашык байлыктын кереги деле жок болсо керек.
– Тапкан акчаңдын көбүн кайда жумшайсың?
– Көбүрөөгүн албетте, ата-энеме жумшайм. Азыр ата-энем айылда өздө­рү эле турушат. Улуу байкем, жеңем Бишкекте. Эжелерим өздөрүнчө турмуш куруп кетишкен. Ата-энем экөө тең иштебейт. Ошондуктан, акчамдын көбү­рөө­гүн дароо аларга жөнөтөм.
– Мүнөз жагыңа токтоло кетсең. Жүрүш-турушуңдан эмнегедир сүйүүгө туруксуздай көрүнөсүң?
– Туура айтасыз, мен сүйүүгө туруксузмун. Балким, бул менин чыныгы сүйүүгө жолуга электигим чыгаар. Бир кызды жактырып таанышып калгандан кийин аны менен жакшы эле мамиле түзө баштайм. Бирок, ал сүйүүм ашып кетсе эки-үч айга созулат. Ал эми мендеги жалпы сапаттарга токтоло кетсем, өтө эле шашмамын. Бир нерсени ойлонуп отурбай эле чечип салам. Антсе да ал чечимим мага жакшы жыйынтык алып келет. Анан ичиме сыр ката албаган ачыктык жагым да бар. Бул мүнөзүм көп учурда ишимди солгундатып коёт. Бирөө мага жакпай калса, аны ачык айтам же жасаган мамилем аркылуу көргөзүп салам. Туура эмес жасаганымды моюнума алып, кечирим суроо жагынан айкөлмүн. Көпчүлүктүн “менменсинип жүрөт” деген сөзүнө кошулбайт элем. Анткени, менин кебетем алдамчы десем болот. Кебетем бой көтөргөндөй көрүнгөнү менен сүйлөшө келген адамга андай таасир калтырбасымды мени менен таанышкан адамдардын баары айтып келишет. Ушул жашка келгени ийгиликке жетишкен адамдардын бир калыпта жүргөнүн көрө элекмин. Менде деле убагында анча-мынча көпкөндүк болгон.
– Күйөрмандарыңдан алган өзгөчө белегиң?
– 2007-жылы күзүндө койгон концертимдеги бир күйөрман кыздын белегин өмүр бою унутпасам керек. Ырдап бүткөндөн кийин эле бир кыз сахнага чыгып мени көздөй келатат. Гүл береби десем, колунда гүлү же каты жок. Бетимден өпкө­нү келатат окшойт деп жатсам эле колумду кармап туруп, нике шакегин салып жиберди. Мен эч нерсени түшүнбөй эле туруп калдым. Дагы жакшы, “бул эмне, кудалагандыкпы?” деп сөз таап чыгып кеттим.
– “Ырчылык убактылуу жумуш” деген пикир көп айтылат. Келечекте да­гы башка кесиптин ээси болууну көз­дөгөн жоксуңбу?
– Чынында, шоу-бизнес кайсы жерде болбосун ырчылар үчүн түбөлүктүү жумуш эмес. Мен азыр убактымды, өзүмдү, дилимди 100 пайыз сахнага арнап келем. Бирок, убакыттын өтүшү менен, болжол менен 20-30 жылдан кийинки ордумду башка жерде элестетем. Ал учурду азыртан ойлонуп, жакында боло турчу концертимден кийин Улуттук университеттин экономика факультетине документ тапшырып коёюн деп жатам.
– 20-30 жылдан кийинки экономист Султан Кыргызстанда иштейби же Казакстандабы?
– Албетте, Кыргызстандын экономикасына таасирин тийгизе турган экономист болом деп ишенем. Ата-энем Казакстандын жараны болгондон кийин мен да ошол жактыкы болуп эсептелчүмүн. Буга чейин тааныштарым, досторум тамашалап: “Сен өзү кыргыз эмессиң, кана, документиң?”- дей беришчү. “Менин жарандыгым жок болгону менен менин бетимдин өзү документ” деп тамашалап койчумун. “Кыргызстанда 5 жыл толук жашаш керек”, “кылмыш кылбаш керек” деген сыяктуу бир топ шарттарды басып өткөндөн кийин мына, эми Кыргызстандын толук кандуу жараны болуп, колума паспорт алдым.
– Жакында болчу концертиңдеги сахнанын улуттук колоритте жасалышы, кыргыздын эски ырларына басым коюшуң анда бекеринен эмес экен да?
– Мен кыргыздын жараны болгондугумдун урматына бул концертимдеги сахнаны жасалгалоодо кыргыздын боз үйүн чагылдырууну көздөдүк. Анан кыргыздын улуттук аспаптары болгон комузда жана ооз комузда ойнойм. Комуз менен “Көк сулуу”, “Мырзайым” жана башка элдик ырларды жандуу үн менен аткарам. Концерт үчүн атайын онго жакын жаңы ырларды жаздырдым. Жакшы ырлардан куралган видеоальбом чыгардык. Альбомдун ачылышына концертке келген күйөр­ман­дарым күбө боло алышат. Андан сырткары, сырты да, ичи да өзгөчө эки диск чыгардык. Сырты өзгөчө дегеним, дисктин өңү башкача, ичинин өзгөчө­лүгү, менин тандалма ырларымдан сырткары каалоо-тилектерим айтылат жана аягында видеоавтограф коюлат. Бул эки диск атайын уюштурулган оюндардан кийин менин чыгармачылыгымды сыйлаган чыныгы күйөр­мандарым­дын колуна тиет.

Маектешкен Сүйүн Кулматова



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: