Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Кенже Дүйшеева: «САЛТТЫ КАТУУ КАРМАГАН ЖАНМЫН»

№304 29-август - 4-сентябрь


– Кенже эже, маегибизди сиздин «Кыз-Бурак» тобуна келген күнүңүздөн баштасак...
– 1994-жылдын жай мезгили болчу. Айсалкын деген группалашым менен сүйлөшүп отуруп «Кыз-Бурак» тобунда ырдасам, ээ?» деп балалыктагы кыялдарымды айтып калдым. Анан ал: “Мен бул топтун кайсы жерде репетиция кылаарын билем, жүр, барып келебиз”,- дей баштады. Ошентип, бардык. Биринчи эле мурда сыналгыдан көрүп жүргөн Гүлшайыр эжени жанынан көргөнүмө кубандым. “Ушул эженин жанында жарым саат отуруп сүйлөшсөм гана” деп апама айткан сөздөрүм оюма түштү. Кудайга шүгүр, азыр жарым саат эмес, 24 саат чогуу жүрүп калбадымбы. Ошондо Гүлшайыр эже “жаңы келген кыз чыксын” дегенде “Чын эле мен сени таптымбы?”, “Заманам” деген эки ырды ырдагам. Эже: “Сага бирөө учак менен машина сатып берем десе топтон кетесиңби?”- деп сынап сураган. Мен “эч жакка кетпейм” дегем. Ошол кезде жеңем “иниме алперем” деп куда түшүп келгени жаткан. Мен болсо “Кыз-Бурак” менен качкан бойдон гастролдоп кеткем.
– Биринчи жолу эл алдына ошондо чыккан экенсиз да...
– Эл алдында бала кезден эле ырдачумун. Ал эми гастролго биринчи жолу чыккам десем туура болот. Ошондо Гүлнара менен Айжамал да топко жаңы келишиптир. Айжамал болгону 5-класстын окуучусу болчу.
– Ошол кезде эле жуучулар келип жатышса, ушул күнгө чейин канча киши колуңузду сурады экен?
– Азыркыга чейин менин колумду сурагандардын аягы сууй элек. Ал кезде мектепти жаңы бүтүргөндүктөнбү, айтор, бир айдын ичинде 7-8 жерден жуучу келчү.
– Ошентсе да, алигиче турмушка чыга элегиңиздин себеби барбы?
– Себеби – жүрөгүмдүн ээсин таба элегим. Ал эми аны таппай жүргөнүмдүн себеби, буюрган күндүн келе элегинде болсо керек. Байкем дайыма: “Кыздарды жадакалса мектепке окутуунун кереги жок. Баарыбир кетип калышат”,- деп айтып калаар эле. Ошондо ичимден “көрөсүңөр, мен билим алып, окумайынча турмушка чыкпайм” дегем. Мүнөзүмдө айткан сөзүмдү аткармайынча тынбаган адатым бар да, сөзүмө турдум. Өткөндө байкемдин балдарын окууга өткөрүүгө жардам берип, “мына, кыздардын деле колунан келет бекен?” деп айтсам, күлүп калышты.
– Негизи, турмушка чыкканга даярсыз да?
– Даяр элемин. Мурда бул жөнүндө көп ойлончу эмесмин. Чыгармачылыкка баш-отум менен киришип кетип, өзүмдү деле унутуп калыптырмын. Гүлнара, Айжамалдар турмушка чыкканда гана үйбүлө куруу туурасында ойлоно баштадым. Буюрса, турмушка чыгып, мотурайган балдардын энеси, сүйүктүү жар, ыймандуу келин болом. Болгону, белгилүү ырчы Кенжени эмес, жөнөкөй гана Кенжени сүйгөн адамды тапсам болду.
– Өткөндө “ушул убакка чейин өбүшүп көрө элекмин” деген элеңиз...
– Кээбирөөлөр “ушундай да болмок беле?!” деп таңкалышы мүм­күн. Бирок, мен кыргыз элимдин салттарын аябай сыйлайм жана дайыма салтты карманып жүргөнгө аракет кылам. Турмушка чыккандан кийин өзүңдүн, кайынжуртуңдун жана өмүрлүк жолдошуңдун алдында жүзүң жарык болуп жүргөнгө не жетсин. Мен өтө заманбап адаммын. Бирок, өзөгүмдү өзгөртпөгөнгө аракет кылам.
– Биринчи жолу сүйүү сезимдерине качан кабылдыңыз эле?
– 1-класстан 3-класска чейин бир бала мага момпосуй берип жүргөн. Күндө мектепке келгенде мен да «тиги келди бекен?» дегенсип аны элдин арасынан издеп калаар элем. Кийин мектепти бүтүп атканда ал баланын мага болгон сезимдерин башка балдар айтып коюп атышпайбы. Тиги байкуш уялып эле чыгып кеткен. Ошондон бери көрө элекмин... Көптөр менден коркушчу. Далай бала мага кат жазышып, бирок, каттарын жеткире алышкан эмес.
– Балдар сизден сүрдөп турушса, аябай каардуу кыз болгонсуз го...
– Эми кандай десем, мен каардуу эмес, эркек мүнөз кыз болчумун. Атам да мени “эркек кызым” деп эркелетип калаар эле. Анан да шайыр, шок, айтканын бербеген бир аз көктүгүм бар болчу. Бардык жерде лидер болуп алуу менин мүнөзүм гана эмес, адатым да болуп калды көрүнөт. Ал кездеримди кубануу менен гана эстеп коём. Шоктугумдан коңшу айылдын кыздары менен сууга түшкөнгө канал талашып мушташчумун. Алар биздин айылга келсе, биз кыйын болобуз, алар болсо биз барганда кыйын болушат, айтор, көп урушчубуз. Кийин “келишим” түзүп, “силер бизге тийбегиле, биз силерге тийбейбиз” деп сүйлөшүп алганбыз.
– Көңүлүңүз чөккөндө же бирөө капа кылганда жиниңизди кантип чыгарчу элеңиз?
– Үйүбүздө бир чоң алма бак бар болчу. Ошонун башына чыгып алып кыйкырып ырдаганды жакшы көрчүмүн. Шамалга чачтарым серпилип бактын башында отурсам, тимеле өзүмдү учуп жүргөндөй сезчүмүн. Мен ырдаганда эки четибиздеги кошуналарыбыз баары үйлөрүнөн чыгып алып угушчу экен.
– Ырчылык сизге кимден өт­көн?
– Өткөндө иним үйлөндү. Чынын айтсам, тойдо ырдаганга мага кезек жетпей калды. Байкелерим, эжелеримдин баары ырдашат экен. Негизи, үнүмдү апамдын үнүнө окшоштурам.
– Баса, сөз кезеги келгенде “Алма гүлү” деген ырыңыз туурасында айта кетсеңиз...
– Бул ыр менин ата-энеме тургузган эстелигим деп айтсам да болот. Себеби, ырдын “Алма гүлүн ачкан кезде, ата, сизден айрылгам, алма гүлүн төккөн кезде, апа, сизден айрылгам” деген эки сап кайрыгын мен ата-энемден айрылгандан бери эле ырдап жүрчүмүн. Кийин ушул кайрыктарды Фаризатка (Асанкалый кызы) айтсам, эртеси күнү эле “Алма гүлүнүн” сөзүн жазып берген. Негизи, ата-энем алма эмес, өрүк гүлдөгөн кезде каза болушкан. Атам жаңы өрүк гүлдөгөн кезде бул дүйнөдөн көзү өтсө, апам андан 40 күндөн кийин өрүк гүлүн төккөн кезде каза болгон. Апамдын “жазында өрүк гүлдөгөн кезде, анан кызгалдак гүлүн ачканда ооруган адам өлөт экен” деген сөзү азыркыга чейин көкүрөгүмдө. Атам каза болгондо ыйлап сыртка чыксам, эшиктин алдындагы эки түп өрүк апаппак болуп гүлдөп туруптур. Ал эми апам каза болгондо талаалар кызгалдакка толуп турган эле. Ошол себептен азыркыга чейин өрүк гүлдөгөн маал – менин жандүйнөмө жагымсыз убак. Анан ыр жаралгандан кийин «ырдаганга ыңгайлуу» деп өрүк гүлүн алма гүлү деп алганбыз.
– А клиптин мазмуну да өзүнчө кайгылуу. Андагы кичинекей кыз да ийине жеткире аткарыптыр...
– Мен бул ырды жаздыруу үчүн студияга барганда ыйлап атып араң ырдагам. Чыксам, ал жердеги операторлордун да көңүлү түшүп, кабактары бүркөө отурушуптур. Алардын бири: “Кенже эже, сиз ырдап жатканда көз алдыма клиптин сюжети тартылды”,- деп өз оюн айткан. Анан ага бир аз өзгөртүүлөрдү киргизип, клипти тартканбыз. Ал эми жанагы кызды болсо көчөдөн көрүп эле жактыргам. Мен да кичинекейимде ошол кыздай болуп чачымды өрүп алчумун.
– Келиңиз, эми ырчылыктан чет­­теп, сиздин башка да таланттарыңыз, өнөрлөрүңүз туурасында сөз кылабыз...
– Негизи, биздин үйбүлө сүрөт жагына шыктуу. Баарыбыз сүрөттү жакшы тартабыз. Ошондой эле мен ар түрдүү кооз курактарды кураганды аябай жакшы көрөм. Бош боло калсам төшөк кабыйм. Үй жумуштарын жасайм. Чындыгында, бир орунда отурган жан эмесмин. Эртеден кечке чуркап гана турушум керек. Спорт менен машыгууну да жактырам. Айрыкча баскетбол ойнойм. Кээде жиним келгенде бокс менен да машыгып, грушаны согуп-согуп алам. Азыр айылдагы үйгө чакан машыгуу бөлмөсүн даярдаткым келип жатат.
– Кандай учурда эс аласыз?
– Эс алуу да адамга эң керек. Андыктан, кээде ызы-чуудан тажаганда атайын тынч жайларга барып, албетте, “Кыз-Бурактын” кыздары менен эс алганды жактырам.
– Маегиңизге рахмат, чыгар­мачылыгыңызга ийгилик!

Маектешкен Чолпон Сүйүнбаева


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: