Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Съездбек Искеналиев: “ЫРЫМДЫ ЖАРАТПАЙ КОЮШКАНДА ООРУП КАЛГАМ”

№351 24-30-июль, 2009-ж.


 Съездбек дегенде эле көз алдыга тери жамынып “Селкигени” созгон ырчы элестейт. Бүгүн биз ошол териден жасалган кийимдери менен эсте калган ырчы Съездбек Искеналиевдин балалыгынан тарта азыркы турмушуна чейинки жашоосуна саякатка чыгабыз.

“Биринчи маянама вафли алып жегем”

– Мен 11 биртуугандын онунчусумун. Башкача айтканда, эркектердин кичүүсүмүн. Ошондон уламбы, айтор, ашынган тентек элем. 12ге чыкканымда атам каза болуп калды. Апам “атасы жок экенин билгизбейин” дедиби, мени мурункудан да талтаңдатып бош коё берди.
Чоң сахнага чыгууну бала кезимден эле кыялдангам. Мектепте мугалимдерден жана окуучулардан түзүлгөн “Максат” тобу бар болчу. 11-классты аяктагыча ал топтун көрүнүктүү ырчысы болуп жүрдүм. Айчүрөк Иманалиеванын “Кызыл гүлүн” укмуш ырдачумун. Ошондон улам мени кичинекей баладан кемпир-чалга чейин “Кызыл гүл” деп чакырып калышкан.
Ушул жылы айылыма барып, бүтүрүүчүлөрдүн бүтүрүү кечеси менен куттуктап келбедимби. Башка ырды ырдап жатсам деле баягы мени жакшы көргөндөр “сен биз үчүн дагы деле Кызыл гүлсүң” дешип, хор менен “Кызыл гүл” деп кыйкырып, кол чаап суранып жатышты. “Кызыл гүлдү” ырдайын десем сөздөрүн чын эле унутуп калыптырмын. Ошого карабастан, 5-6 жолу кайталап ырдадым окшойт.
Бир жолу 8-мартта “Максат” тобу мектепке концерт коймок эле. Ошол күнү кычап койдун кезүүсү келип калыптыр. Толтура байкелерим турса, үйдөгүлөр мени ыйлатып туруп кой кайтартып талаага жибергендерине азыркыга чейин ичим күйөт. Эртеси барсам мугалимдер катуу тилдешкен. Эсимде, “Максат” тобу менен коңшу айылдарга концерт коюп барып эки сом иштеп, ага вафли алып жегем.

“Кыл кыякчы болбой калганыма өкүнөм”

– Мектепти бүткөндөн кийин апам мени окууга тапшыртканы борборго алып келди. Экөөбүз тең шаарды билбейбиз. Кийингенибиз бир шумдук, чекеден тер кеткен. Искусство институтуна барсак Нурматов деген агай: “Сен, бала, короз экенсиң. Үнүң ачыла элек турбайбы, Күреңкеевге тапшыр”,- деп кетирип жиберди. Максатым эмнеси болсо да ырдап чыгуу болгондуктан, эптеп жатып окууга өтүп алдым. Мугалимдер бир факультеттин атын айтып, “ушуга окуйсуңбу?” дешсе, “ооба” дегем. Көрсө, ал улуттук аспаптар бөлүмү экен.
Сентябрда окууга барсам, бир мугалим баарыбызды отургузуп алып манжаларыбызды карап чыкты. Менин манжамды карап туруп “кыяк” деп койду. Аккордеон деп жыргап жатсам эле колума кыл кыякты карматты. “Муну чертпейт болчумун” деп сабакка эки ай катышпай койдум. Бирок кийинчерээк кыл кыяктан берген агайдын таасиринен улам манжаларым тандап койгон аспапты жакшы көрүп калдым.
3-курсту аяктап айылга барып, байкелериме кыл кыякты укмуш өздөштүргөнүмдү айтып мактандым. Эки байкем: “Азаматсың, эми айылга келип кыл кыяк чертип кой кайтар да, «Койчунун арманын» ырда”,- деп мазакташты. Алардын сөзүнө намыстанып, кыл кыякты таштап салгам. Азыр ошол кылыгыма өкүнүп кетем.

“Бир жолу студент кезде...”

– Биринчи жолу стипендия алганымда балдар менен майлап, арак ичтим. Мурун-кийин ичип көрбөгөн жаным көтөрө албай мас болуп калып, аудиториялардын баарын сабак жүрүп жатканына карабай, кайра-кайра башымды салып карай бериптирмин. Эртеси бир агай: “Искеналиев, кечээ эмне кылдыңар?! Ата-энеңди чакыртам!”- десе эле коркуп кетип баарын айтып берип салдым. Эртеси мени менен бир да бала сүйлөшпөйт. Көрсө, мени “саткын” деп бөлүп салышыптыр. Катамды кийин түшүндүм.Ошондо группалаштарыма араң кошулгам.

“Айыл мага жарашпайт”

– Агамдын берген 2500 сомуна алгачкы “Өмүр” деген ырымды жаздырдым. Ал кезде 2500 сом чоң акча эле да. Ырымды “Кыргызстан Обондоруна” алып барсам жаратпай коюшту. Ошондо көп ойлонуп, капа болгондуктан, нервге күч келип, невроз илдетине кабылдым. Эки бетим кадимкидей диртилдеп калды. Анан “мына, сага!” деп айылга барып, жайлоого кетип калдым. Чачым өсүп, колу-бутум, мурдум кесилип, шумдук жүдөдүм. Чоң эле баламын да, отуруп алып кадимкидей ыйлачумун. Коңшу чабандын аялы келип: “Сен шаарга кетишиң керек. Айылдын баласы эмес турбайсыңбы”,- дегенде жакага бастыра бердим
Аттан түшөрүм менен бир агам “сенин ырларың радиодон кетип жатыптыр” деди. Ошондо бүт кайгымды унутуп, сүйүнүчтөн жүрөгүм жарылып кете жаздады. Көрсө, радиого алып барган ырым эски ырлар сакталуучу архивге түшүп калыптыр. Аны Тынчтыкбек Кожобеков таап чыгып, эфирге коё бериптир. Ошондон кийин Тынчтык экөөбүз жакын достордон болуп калдык.

“Кышында айрык өтүк менен жүргөм”

– Айылдагылар “өзүңө кийим-кечек ал” деп акча салып жиберишти. Мен ага “Эсиңдеби” аттуу экинчи ырымды жаздырып салдым. Кышында айрык өтүк менен жүрөм. Ичине кар кирип, бутум чылпылдап суу болуп, тоңуп чыгат. Кудай жалгап, бир күнү айылдан апам келип калды. Ачык эле “өтүк алып бербесеңиз болбой калды” дедим. Апам таманы 7 сантиметрдей ачылып турган өтүгүмдү көрүп, ыйлап жибере жаздады. “Кийим ал” деген акчаны ыр жаздырууга кетиргенимди укканда уруша алган жок.

“Башымды жоготуп сүйгөн жокмун”

– Сүйүүдөн акыл-эсин жоготуп, баарына кайыл болуп турган досумду көрүп, “ушинтип да сүйөбү?” деп жиним келе берчү. Мен жактырган кыздар мени жактырышчу эмес. Ошол кездеги кыздардын психологиясы ушундай беле билбейм, акчалууларды карашчу. А менде кайдагы акча?! Келинчегим Жаркынайга чейин жан дүйнөгө бүлүк салган сүйүүгө кабылбадым. Жаркынай менен таанышканда гана сүйүү даамын таттым десем болот. Бирок экөөбүз кыйратып деле сүйлөшкөн жокпуз. Үйлөнүш керек болду, анан үйлөндүк. Азыр кызым экиде. Тили чыгып, баарыбызды кубантып жаткан учуру. Кечинде үйгө кирсем эле “папа, массаж жасап берем” деп далымды кармап калат. Гастролдон келсем “дагы кетип калат” дейт окшойт, “жөн, кетпе” деп быдылдай берет. Мага караганда апасына көбүрөөк окшош. Жаркынай учурда борбордогу сулуулук салондорунун биринде эсепчи болуп иштейт.

“Жеңелерим менен бешмин”

– Агаларымдын баары үйлүү-жайлуу. Төрт жеңемди тең жакшы көрөм. Жеңелериме барганда апама эркелегендей эле ар бирине эркелейм. Алар да мени жакшы көрүшөт.

“Алдыга койгон максатым чоң”

– «Келечекте Маданият министри болсом» деген тилегим бар. Ага жете албасам да, жок дегенде филармониянын директору болууга болгон күчүмдү жумшайм. «Жаштын тилегин берет» дегендей, бул максаттарым иш жүзүнө ашарына ишенем. Анан эркек балалуу болууну тилейм. Балам менен ээрчишип мечитке баратканымды элестетип алып өзүмчө сүйүнө берем. Учурда жума намазга барып турам.

“Ырчы аттууну жамандагым келбейт”

– Ырчыларды «бул жакшы, тигил жаман» деп бөлбөйм. Мен үчүн ырчылардын баары таланттуу. Бирөөгө жакпаган ырчы экинчи бир адамга жагышы мүмкүн. Болбоду дегенде эле туугандарына, ата-энесине жагат да, туурабы?

“Элимди эгемендүүлүк майрамы менен куттуктайм”

– Кудай буюрса, 30-31-августта элимди эгемендүүлүк майрамы менен куттуктап, концерт берсемби деп жатам. Азыр эски ырлардан үчтү, андан сырткары, обону өзүмө таандык беш ырды жаздырып жатам. Буюрса, бир жумадан кийин “Жалгыз гүл”, “Түшүмдө” деген ырларыма клип тарттырам. “Түшүмдөнүн” клиби “Аян” тасмасындагы кадрлардан алынат. Бул фильмди фестивалга тартышкан. Аталган фильмде мен башкы ролду жараткам.

“Анекдот айтканды жакшы көрөм”

– Бир киши Москвич алыптыр да. Бирөөгө айдатып коюп, арткы орундукта эки колду эки жакка чоюп чалкалайт дейт. Аны көргөндөр: “Алганың Москвич болсо, анан чалкалаганың кандай?”- дешсе: “Эки эшиги тең жабылбаса эмне кылайын?!”- дептир.

Сүйүн Кулматова
star@super.kg



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21442;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: