Үстүбүздөгү жылдын 13-ноябрында белгилүү шоумен, журналист жана тамада Бакыт Букаев киши колдуу болуп каза тапкан эле. Бир нече күндөн кийин анын өлүмүнө шектүү катары Улан Худайбердиев деген адам колго түшкөн. 10-декабрда Бишкек ШИИББи окуяга катыштыгы бар деп шектелген экинчи адамдын колго түшкөндүгүн кабарлады.
«МЕН ӨЛТҮРГӨН ЭМЕСМИН...»
Бакыт Букаевдин өлүмүнө тийиштиги бар деп шектелгендердин экинчиси, 33 жаштагы ЭЛДИЯР АБДИБАИТОВ төмөндөгүдөй көрсөтмө берүүдө:
– Мен Ош облусунун Өзгөн районуна караштуу Кызыл-Сеңир айылынан болом. Ал күнү Улан деген бала экөөбүз жолугуп калдык. Анан ал мага «жүрү бир жерге барабыз» деп калды. Ал айткан дарекке барган соң Улан үйгө кирип кетти. Мен эшикте күтүп калгам. Уланбек кирип телефон, анан ноутбук көтөрүп чыкты. Мен ал адамды өлтүргөн эмесмин. Кийин Уланбек кир деп чакырганынан кирсем, тиги киши өлүп жатыптыр.
КЫЛМЫШКА ШЕКТҮҮ КИШИ АБАКТАН КАНТИП ЧЫККАН?
Элдияр Абдибаитов 2010-жылы да адам өлтүрүү фактысы менен кармалып, Өзгөн райондук соту тарабынан 8 жылга эркинен ажыратылган. Ал эми 2011-жылы Чүй облусундагы жатак абактардын бирине которулган. Учурда берилген мөөнөттү абакта эмне себептен толук өтөбөстөн эркиндикте жүргөндүгү такталууда. «Элдияр Абдибаитов берген көрсөтмө менен мурда кармалган шектүү Уланбек Худайбердиевдин көрсөтмөсүндө бир топ дал келбестиктер бар. Бул иштер тергөөнүн жүрүшүндө дагы такталат»,- дейт
Бишкек ШИИББинин басма сөз кызматынын жетекчиси Бакыт Сейитов.
СОТ БҮТКӨН СОҢ БАРДЫГЫ АЙТЫЛАТ
Чоң резонанс жараткан БАКЫТ БУКАЕВДИН өлүмү коомчулукка дагы деле ачыкталбай, сыр боюнча калып жатат дегендер да жок эмес.
– Кылмышка шектүүлөрдү чекесинен колго түшүрүп, тергөө амалдарын жүргүзүп жатабыз. Тергөө бүткөн соң ишти сот карайт. Элге күнөөлүүлөр булар же окуянын себеби мындай болгон деген маалыматтарды соттун чечими менен гана таратууга укугубуз бар. Себеби Бакыт Букаев аты таанымал адам. Анын өзүнө жана жакындарына гана байланыштуу жеке жашоосун коомчулукка жарыялоо шарт эмес. Бул жерде адамдын моралдык укугу тууралуу да кеп болуп жатат,- деген оюн Бишкек ШИИББинин тергөө башкармалыгынын башчысынын орун басары Эрнис Үркүнов билдирди.
Гүлжан Асанкожоева
koom@super.kg