ЖАШ ЫРЧЫНЫ АТЫП КЕТИШИП, БИР КӨЗҮНӨН АЙРЫЛДЫ

Ырчылыкка жаңы гана кадам таштап, «өсөйүн, элиме жакшы ырларды тартуулайын» деген 18 жаштагы ырчы бир көзүнөн ажырап калды. Республикалык «Алтын үн» фестивалынын баш байгесин жеңип алган Темирлан Мукашов 31-декабрдан 1-январга караган түнү сол көзүнө травматикалык тапанчадан ок жеген. Окуянын чоо-жайын иликтеп көрдүк.

«КӨЗҮМДӨН АЙРЫЛГАНЫМА КӨПКӨ ЧЕЙИН ИШЕНЕ АЛБАДЫМ»
Темирлан Мукашов Мураталы Күрөңкеев атындагы музыкалык окуу жайдын 2-курсунун студенти. 27-декабрда «Алтын үн» сынагынын баш байгесин жеңип алып кубанычы коюнуна батпай турган чакта кокусунан бейтааныш адамдардын колунан майып болуп отурат. ТЕМИРЛАН окуяны төмөнкүчө эскерет:
– 31-декабрда достор болуп чогулалы, майрамдайлы деп Байтик баатыр жана Горький көчөлөрүнүн кесилишиндеги «Акман-Ордо» чайканасына бардык. Он чакты бала элек, ырдап, жакшы эле майрамдап жатканбыз. Бир убакта досторумдун жарымы сыртка чыгып, өздөрүнчө ызы-чуу болуп калышыптыр. Ага чейин башка столдо отурган жигиттер досторума тийишип, «биз кыйынбыз» дешип тапанчаларын да көргөзүшкөн экен.
Мен да сыртка чыктым. Бирөөдөн эмне болгонун сурасам, «Сага эмне болду?!» деп келип эле мени бетке муштады да, тизеси менен тээп кирди. Ары жактан экинчиси чуркап келип мени муунта баштады. Качыш керек экенин түшүнүп кафени көздөй бет алганда экинчи кол салган кызыл галстукчаны ок чыгарды. Көзүм караңгылап, өзүмдү жаман сезе баштадым, аңгыча болбой көзүмдөн кан ага берди, көрсө, ошондо эле көзүмдөн ажыраптырмын. Тепкичтен көтөрүлө бергенде шайым ооп, жыгылып калдым. Кафенин ичиндеги досторум мени ооруканага алып жөнөштү. Тиги балдар качып кетишиптир.
Бул 1-январда болжол менен түнкү саат үчтөрдө болду. Таңкы саат алтыда операция жасалды. Өзүм көзүмдөн айрылганымды билгеним менен, көпкө чейин ишене албадым. Соо көзүмдү колум менен жаап, «азыр көрүп калат болушум керек» дей бердим. Тилекке каршы, андай болгон жок. Азыр бир көз менен көрүп жатам, бирок күч келет окшойт, тез эле чарчап калууда. Эки көзгө көнгөн адамга кыйын экен. Досторумдун айтуусуна караганда, ал жерде эки ок атылган. Бирөө эч кимге тийген эмес. Мен буга чейин ал балдарды көргөн эмесмин. Мени аткан кызыл галстукчанды азыр көрсөм тааныйм.

«ЖАКЫН АРАДА ЖАСАЛМА КӨЗ САЛАБЫЗ»
Темирланга операция жасалган Улуттук госпиталдын микрохирургия бөлүмүнүн башчысы БАКТЫГҮЛ МАМЫТОВА буларга токтолду:
– Темирлан бизге таңкы бештерде келип түшкөн. Аны нөөмөттө турган дарыгерибиз Яна Ким кабыл алып, болгон аракетин көргөн. Бирок өкүнүчтүүсү, бейтаптын көзүн сактап кала алган эмес. Сол көзү окуя болгон учурда эле агып түшүп калган. Бактыга жараша, ок сөөккө жеткен эмес. Эгер сөөктү бычыратып кетсе, мындан да оор болмок. Жакын арада жасалма көз салуу боюнча иштеп жатабыз.

«БИР НЕРСЕ БОЛОРУН СЕЗГЕМ, БИРОК...»
Кандай гана окуя болбосун, ар түрдүү версиялар айтылат эмеспи. Бул окуяны айрымдар «Алтын үн» фестивалына байланыштырып, «көрө албагандар кылышты» деп божомолдошууда. Бирок апасы ЧЫНАРА ОСМОНАЛИЕВА мындай ойго кошулбайт.
– Эне бир нерсени алдын ала туят, сезет деген чын. Жүрөгүм элеп-желеп болуп, жаным жай албай жаткан. Мындай карбаластоо окуя болорго үч-төрт күн калганда эле башталган. Бир нерсе болорун сезгем, бирок баламды сактай албадым.
Темирлан эки кыздан кийинки жалгыз уул. Кыздарым турмуш куруп кетишкен. Күйөө балдарым токтоо, ичпеген, чекпеген жакшы балдар. Уулум Темирлан да ыр-чыры жок бала.
Бир жерге тура албай, жүрөгүм опколжуй бергендиктен, «абайлагылачы, көчөгө чыкпагыла, кырсык болуп кетпесин» деп коруп эле жаткам. Жаңы жылды тоскондон кийин баламды кетиргим келген жок. Өзү деле баргысы келбей турган, бирок достору кайра-кайра телефон чала беришти. Ак көңүл балам аларды кыя албай жөнөп калган.
Бизге окуя туурасында дароо эч ким кабарлаган жок. Уулум өзү дагы, достору дагы коркуп мага эч нерсе айтышкан эмес. Саат таңкы алтыларда, операция жасаар алдында гана бизге угузушту. Айрымдардын «Алтын үн» фестивалына байланыштырган божомолдору туура эмес болуп калат го.

«МЕН ТЕМИРЛАНДЫ ЭМЕС, АЛ МЕНИ СООРОТУП ЖАТАТ»
Темирланды бармактайынан багып өстүргөн, азыр да күнү-түнү жанында карап жаткан чоң апасы ЭРКИНГҮЛ БОРМОКОВА:
– Темирланды кичинекей кезинен баккам. 8-классында ырчы болом деп Бишкектеги музыкалык окуу жайга тапшырган. Айылдагы майрамдар Темирлансыз өтчү эмес, аябай жакшы ырдайт. Окуяны уккан айылдагылар тынчсызданып, тынымсыз телефон чалып жатышат. Тагдырга баш ийгенден башка аргабыз жок да. Баламдын башы аман калганына сүйүнүп отурам. Темирландын абалы азыр жакшы. Мени кайгырбасын деп кайра ар кайсыны айтып көңүлүмдү көтөрүп, сооротуп жатат. Кылмышкерлер кармалып өз жазасын алышса, көксөөбүз сууйт эле.

«БИЗ ЭЧ НЕРСЕ КӨРГӨН ЖОКПУЗ»
«Акман-Ордо» чайканасынын кызматкерлери менен жолугуп, болгон окуянын чоо-жайын билүүнү көздөгөн элек. Бирок алардан алгылыктуу деле жооп ала алган жокпуз. Атын атагысы келбеген айым буларды айтты:
– Биз сыртта эмне болгонун көргөн жокпуз. Эс алуучулар чайкананын ичинде жакшы майрамдап жатышкан. Бир убакта бир жигиттин бети-башы кан болуп кирип келгенин көрдүк. Анан чогуу жүргөн достору тез эле ооруканага алып кетишти.

«КЫЛМЫШКА ШЕКТҮҮЛӨРДҮН ӨЗДҮГҮ ТАКТАЛДЫ»
Ал эми окуя тууралуу Бишкек ШИИББинин басма сөз кызматынын жетекчиси БАКЫТ СЕЙИТОВ төмөнкүлөрдү билдирди:
– Окуя 1-январда саат түнкү үчтөр чамасында болгон. Темирлан Мукашов достору менен 31-декабрда саат кечки ондон баштап кафеде отурушуп, Жаңы жылды ошол жерден тосушкан. Эки топтун ортосунда мушташ чыгып, Темирланга травматикалык тапанчадан ок атылган.
Бизге кабар «102» кызматы аркылуу саат таңкы 3:39да келип түшкөн. Учурда КРнын Кылмыш-жаза кодексинин 104-беренеси (ден соолукка, өмүргө коркунуч келтирүү) боюнча кылмыш иши козголуп, иликтөө жүрүп жатат. Кылмышка шектүүлөрдүн өздүгү такталды, бир-эки күндүн ичинде кармалат деп турабыз.

Сүйүн Кулматова
koom@super.kg

 Кыстарылган видео