Жогорку Соттун Конституциялык палатасы ушул жылдын 13-январында бийликтин коррупция менен күрөшүүсү боюнча бардык күч-аракетине тоскоол кыла турган чечимди кабыл алды. Тагыраагы, ал мамлекеттик кызматкерлерге байланыштуу кылмыш ишин прокуратура кызматы гана жүргүзө алат деген чечим чыгаруу менен кылмыш иштерин тергөө жагын башка күч органдарына өткөрүп берүү Баш мыйзамга каршы келерин белгиледи.
Бардыгы паракорлук боюнча айыпталып жаткан Бишкектин Октябрь райондук судьясы Мамасадык Абдыкалыковдун өкүлү катары адвокат Икрамидин Айткуловдун Конституциялык палатага жөнөткөн кайрылуусунан башталган. Адвокат Айткулов Конституциялык палатада кылмыш ишинин Башкы прокуратура тарабынан УКМКга өткөрүп берилишине арызданган жана Конституциялык палата анын талабын канааттандырган.
Жогорку Кеңештин депутаты Өмүрбек Текебаев: «Бул чечимге ылайык, акыркы үч жыл аралыгында Башкы прокуратура Конституцияга каршы иштеген болуп калабы? Бул нерсе укук коргоо түзүмүн баш аламандыкка, кыйроого алып келет»,- деди.
Ширин Турдакунова
politika@super.kg