Президент Алмазбек Атамбаев 1-июль күнү Чүй облусунун Москва районундагы Садовое айылында Өзгөчө кырдаалдар министрлигинин кызматкерлерине 2009-жылы курулуп башталган көп квартиралуу үйдү пайдаланууга тапшырды. 18 квартиралуу үйдүн курулушуна бюджеттен 21,5 миллион сом жумшалган. Мамлекет башчы куткаруучулар үчүн дагы бир үй салууга каражат караштыруу керектигин айтты. "Жакында эле чек арачыларга жаңы квартиралардын ачкычтарын тапшырганбыз. Чек арачыларга үйдү 2007-жылы, мен премьер-министр кезимде баштаган болчубуз. Тилекке каршы, ал үй 7 жыл бою курулуп бүткөн эмес. Быйыл биз күч органдарынын кызматкерлери үчүн көп кабаттуу 15 үйдүн курулушун баштадык. Ар бир адам үчүн үйлүү болуу – эң маанилүү окуялардын бири. Ал адамды эркин жана бактылуу кылат. Убагында мен да үй-бүлөм менен 7-8 жылдай бир батирден экинчиге көчүп-конуп жүргөм",- деди Алмазбек Атамбаев салтанатта.
Ошондой эле мамлекет башчы Кыргызстан менен Орусиянын ортосунда түзүлүп жаткан өнүктүрүү фондунан бөлүнчү акчадан 100 миллион доллар ипотекалык кредит берүүгө жумшаларын айтты.
Элвира Караева,
Наргиза Бекжанова
politika@super.kg