БИР БҮРКҮМ

Үстүбүздөгү жылдын 11-январында токтотулган Баткен районундагы КӨК-ТАШ-АК-САЙ-ТАМДЫК айланма жолунун курулушу 10-июлдан тарта кайра башталат.
2014-жылдын апрель айынан бери республикалык инфекциялык ооруканадан менингитке чалдыккан 257 киши дарыланды, анын ичинен 151и жаш балдар.
Бишкек шаары боюнча 1-сентябрга чейин Комсомол, Пионер жана ГЭС-5 көлмөлөрүндө саат 12:00дөн 20:00гө чейин куткаруучулар тобу нөөмөттө турмай болушту. Быйылкы жылдын башынан 8-июлга чейинки аралыкта өлкө ичинде 34 КИШИ СУУГА ЧӨГҮП көз жумган.
Жалал-Абад облусунун Ала-Бука районуна караштуу Көк-Таш айылы Өзбекстандын электр энергиясынан КӨЗ КАРАНДЫСЫЗ болуп калды. Анткени “Достук” (Бозумчак-2) көмөк чордону иштей баштады.
“Сириянын согуш майдандарында азыркы учурда 80ге ЖАКЫН КЫРГЫЗСТАНДЫК жүрөт, анын ичинен 10у айымдар”,- дейт ИИМдин 10-башкы башкармалыгынын башчысы Рыскулбек Жапаркулов.
Энергетика жана өнөр жай министрлиги 1-июлдан тарта ЫСЫК СУУ менен ЖЫЛЫТУУ тарифтерин 30 пайызга чейин жогорулатты.
Мектеп директорлору менен 5 жылдык ЭМГЕК КЕЛИШИМИН түзүү жана алардын катарынан эки мөөнөттөн ашыкча иштебөөсү боюнча долбоор Билим берүү жана илим министрлиги тарабынан сунушталууда.
Муфтийдин орун басары Замир Ракиевдин айтымында, өлкөдө 2 миңден ашуун мечиттерде жума намазга
200 МИҢДЕЙ адам катышат.
Айбек Осмоналиев Мамлекеттик мүлктү башкаруу боюнча фондунун төрагалыгынан бошотулуп, анын ордуна бул милдетти убактылуу аткаруучу болуп НУРБЕК КАЛМАТОВ дайындалды.
Бажы кызматынын маалыматы боюнча, Кыргызстандын Нефтетрейдерлер ассоциациясы Казакстандагы күйүүчү май жүктөлгөн 500ДӨЙ ВАГОНДУ бажы салыктарын төлөө менен алып чыгып кете алат.
Улуттук статистикалык комитеттин маалыматы боюнча, облустар аралык миграция боюнча 2013-жылы НАРЫН дубанынан чыгып кеткендер көп болгон.
"1-июлдан баштап “МАКМАЛАЛТЫН” комбинаты толугу менен ишин токтотту",- деп Тоо-кен металлургиялык профсоюзунун башчысы Э.Тажибаев айтты.

Эльвира Караева,
Наргиза Бекжанова
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 610, 11-июль-17-июль, 2014-ж