ИСАЕВДИН КЕЗЕКТЕГИ ПИАРЫБЫ?

11-август күнү интернет айдыңында жол кайгуул кызматкерлери 19 жаштагы айдоочу кыз менен чырдашканы тууралуу видео таркап кетти. Видеонун кызуу талкууга алынышына катардагы жол эрежесин бузуу фактысы эмес, көбүрөөк аталган кызматтын башчысы Талантбек Исаевдин жаш кыз менен айтышып, колундагы телефонго окуяны тартып, кимдир бирөөлөргө айтам деп коркутуп, ачуулуу кыйкырып жатканы себепчи болду көрүнөт. Кызуу талкууга алынган видеодо жаңжалга аралашкан Жол кайгуул кызматынын жетекчиси Талантбек Исаев менен айдоочунун шериктеринин ортосунда төмөнкүдөй сөздөр жүргөн:

Т.И.: – Давай, за хулиганство оформляйте, его тоже закрывайте!
Айдоочунун шериги: – За что?
Т.И.: – За ваше хулиганство. Я Рысбека Төлөгөновича завтра вызову, и всё покажу, и Касеину Төлөгөновичу тоже покажу. Эта сестра или кто? Жена твоя? Жена?
Айдоочунун шериги: – Чё вы делаете?
Т.И.: – Она чё делает?! Она чё делает?! Она чё делает?! Чё вы делаете?! Пусть она не хулиганит. Я сейчас начальнику УВД позвоню, чтоб на 15 суток её оформили.
Айдоочунун шериги: – За что?
Т.И.: – За то что она сотрудников УГАИ ГУВД ударила.
Айдоочунун шериги: – Он же матерится, байке...
Т.И.: – Никто не матерился.
Көп өтпөй Бишкек ШИИБинин басма сөз кызматы бул видео тууралуу маалымат таркатты:
– 10-август күнү “Форсаж” рейди жүргүзүлүп жаткан учурда Түштүк магистраль жана Тынчтык проспектилеринин кесилишинде немис номери менен жүргөн Ауди А4 унаасы токтотулган. Унааны башкарып бара жаткан 19 жаштагы кыздын айдоочулук күбөлүгү бар, бирок автоунаанын документтери боюнча суроо жаралып, мындан улам жол кайгуул кызматкерлери унааны айып аянтчасына токтотууну талап кылышкан. Кыз буга каршы болгон. Ал ЖКК жана ШИИБинин жетекчилери турганына карабай уят сөздөрдү сүйлөп, бир кызматкердин фуражкасын жулуп, бир кызматкерди чаап жиберип жана дагы бир жетекчинин жеке буюмдарын бүлдүрүп салган. Аталган факт Ленин РИИБинде катталып, айдоочу айым убактылуу кармоочу жайга киргизилди. Учурда кылмыш ишин козгоо тууралуу суроо чечилип жатат.
Ал эми ЖККнын жетекчиси
Т.Исаев окуя тууралуу жергиликтүү гезиттердин бирине “Бул кыз чындыгында чоң мансаптуу аткаминердин тууганы. Ал адамдын атын атабай эле коёюн" деген комментарийин айтты.
Видеонун башкы каарманы болгон Алина аттуу кыз менен байланышканыбызда "окуя тууралуу айрым ММКлар туура эмес маалыматтарды берип жатат.Ал маалыматтар чындыкка дал келбейт" деп билдирди:
– Мен эч бир кызматкерди уруп же буюмун бүлдүргөн эмесмин. Жанымда келе жаткан унаанын ээси абалды түшүндүрүү үчүн түшүп кетип, башка бир кызматкер менен сүйлөшүп жаткан. Бул маалда биздин унааны токтоткон инспектор келип, машинаны айып аянтчасына алып барып токтотууну талап кылды. Мен унаанын ээсин күтө турууну сурансам, жинденип, мага сөгүнүп, орой сөздөрдү сүйлөп жатып ортодо чыр пайда болду. Бул учурда башка кызматкерлер келип, мени тегеректеп жулкулдатып калышты. Ошондо Жол кайгуул кызматынын жетекчиси Талантбек Исаев чолок шым, футболка, кепкачан келип, уюлдук телефонуна видеого тартып, мага тааныш эмес адамдардын фамилиясын атап, аларга видеону көргөзөм деп баштады. Менин улутум кыргыз эмес. Кимдердин аты-жөнүн атап жатканын да билген жокмун. Мени “мас абалда” дешти. Бирок аны текшерүү үчүн экспертизадан да өткөзүшкөн жок. Чындыгында, мен ичимдик ичкен эмесмин. Андан соң жол кайгуул кызматкерлери менен №3-шаардык милиция бөлүмүнө барып, түшүнүк кат жаздым. Мени 15 күнгө убактылуу кармоочу жайга камоо тууралуу рапорт жазышты, бирок камашкан жок.
Эгер мас абалында болсо эмнеге текшерүүдөн өткөрүлгөн жок? Мындай суроо менен Бишкек ШИИББине кайрылып, “эмне үчүн убагында протокол толтурулбагандыгы жана экспертиза жүргүзүлбөгөндүгү, окуянын чоо-жайы тууралуу иликтөө иштери жүрүп жатат. Иликтөө бүтмөйүнчө башка маалымат бере албайбыз” деген жооп алдык.
Талкууга алгандардын кээ бири буга чейин Назик Чодронова аттуу айым менен болгон окуяны эске алып, айдоочу кызды “Чодронованын бири” деп күнөөлөсө, дагы бири "айып ЖКК кызматкерлеринде" дешүүдө. Ошондой эле Жол кайгуул кызматынын жетекчиси Талантбек Исаевдин кезектеги пиар акциясы дегендер да болду.
Мындай сындар жөн жерден жаралбайт. Кыргызстанда жол кырсыгынан каза тапкандар көп. Бул тармакта пара алуу илдети гүлдөп-өнүккөн. Олуттуу маселелер шыкалып турган маалда кызматтын башчысы Талантбек Исаев унаасынын айнегин караңгылатып алган айдоочуларды кууп кармоо менен алек. "Айнегин караңгылаткан адамдын баары эле кылмышкерби?" деген суроо жаралат. Балким, ал адам жөн гана күнөстүү Кыргызстанда күндөн коргонгусу келеттир? Бул иштери боюнча Талантбек Исаев ИИМ башчысы Абдылда Суранчиевдин да сынына кабылган. “Генерал Исаев автоунаалардын айнектерин караңгылаткандарды кууп кармоо менен эч нерсеге жетишпейт. Караңгылатуу эмне, жол кырсыктарын көбөйтөбү? Андай эмес да? Жогорку ылдамдыкта айдоо, айдоочулар күбөлүктү чын эле окуп, үйрөнүп алдыбы? Маселе мына ушунда. Бандиттерди кармайбыз дешет, ошон үчүн алдыңкы айнектерди караңгылатууга тыюу салып жатышат. Бирок бандит сөзсүз алдыңкы орундукта отурат деген кепилдик барбы? Ал артта деле отура берет да?”- дейт ал гезиттердин бирине берген маегинде.

Ширин Турдакунорва
koom@super.kg

 Кыстарылган видео