АТАСЫ 4 АЙЛЫК БАЛАСЫН ЧААП ӨЛТҮРГӨН

Акыркы учурларда өлкөбүздүн аймагында ар кандай үрөй учурган кылмыш иштери катталууда. Бири келини менен кудагыйын өлтүрсө, дагы биринде атасы мас болуп өз уулун бычактап салган. Төмөндө ушул сыяктуу окуялар тууралуу сөз болмокчу.

КЫЗЫНА БОЛУШКАН ЭНЕСИН КОШУП БЫЧАКТАП САЛГАН
4-августта Чүй облусуна караштуу Кант шаарынын тургуну инисинин келинчегин жана кудагыйын бычактап салган. Кылмыш ишин жасаган соң укук коргоо кызматкерлерине кабарлап коюп өзү качып кеткен. Көп өтпөй кылмышка шектүү деп Кант шаарынын 56 жаштагы тургуну кармалган. Маселе үй-бүлөлүк чыр-чатактан келип чыгып, 31 жаштагы келинине жинденген шектүү аны бычактап, кызына болушкан 54 жаштагы апасына, башкача айтканда, кудагыйына да бычак сайган. Натыйжада эне менен кызы каза тапкан.
Жалал-Абад облусуна караштуу Сузак районунун Таш-Дөбө айылынан өз баласын бычактап өлтүргөн жаран кармалгандыгы тууралуу маалыматты ИИМден билдиришти. Белгилүү болгондой, 4-августта 28 жаштагы жаран өз атасы сайган бычактан алган жаракатынан улам ооруканадан каза тапкан. Ата-баланын ортосунда келип чыккан чыр-чатактын аягы минтип жаш жигиттин өлүмүнө алып келди. Маркумдун атасы кылмышын моюнуна алып, анын үстүнөн киши өлтүрүү беренеси боюнча кылмыш иши козголду.

ЫМЫРКАЙДЫ СООРОТО АЛБАЙ ӨЛТҮРҮП САЛГАН
Чүй облусуна караштуу Ала­мүдүн районундагы Малиновка айылында 4 айлык ымыркай­дын каза тапкандыгы тууралуу маалымат укук коргоо кызматкерлерине кабарланды. Чүй ОИИББ­инин маалымат кызматынын башчысы Нурбек Токтосуновдун берген маалыматына караганда окуя төмөнкүчө болгон. Кылмыш 10-августта катталган. Окуя болгон үйгө барган милиция кызматкерлери үйдүн уктоочу бөлмөсүнөн жуурканга оролгон баланын жансыз денесине күбө болушкан. Сөөк соттук-медициналык экспертизага жиберилген. Эксперттер баланын омуртка сөөктөрү сынып, моюнунун 1-2 сөөктөрүнүн ортосунда ажырым пайда болгонун жана катуу урунуудан улам жүлүнү шишип кеткенин аныкташкан. Тергөө иштеринин жүрүшүндө ымыркайдын өлүмүнө атасы күнөөлүү экени тастыкталды.
10-август күнү аталган айылдын тургуну Икрамжан Купаев менен аялынын ортосунда пикир келишпестик чыгып, уруша кетишкен. Ошол учурда экөө бир шишени бөлө тартып отурушкан болот. Аялына тишин кайраган Икрамжан аны ур-токмокко алып киргенде аялы эптеп бошонуп качып чыгып кетет. Бир нече убакыттан соң уктап жаткан 4 айлык ымыркайы ойгонуп, эмчек сурап ыйлай баштайт. Тынымсыз ыйлаган баласын соорото албай, аракка тойгон ата күч менен ымыркайды шкафка чаап салган. Наристе биротоло үнүн басканда шектүү магдырап уйкуга кетет. Тынчып калган күйөөсүн сырттан байкап турган аялы кирип, баланын кан болуп жатканын көрүп, милицияга кабар берген. Ал эми кылмышка шектүү деп кармалган Икрамжан Купаев “Баланы сооротоюн деп уктоочу бөлмөгө көтөрүп бара жаткам. Мас абалында болгондугумдан чалынып кетип, баламды баса жыгылдым. Сооронуп калганынан уктап калды го деп жаткырып коюп, ортончу уулумдун жанында уктап калыптырмын. Көзүмдү ачсам эле милиция кызматкерлери келип калыптыр” деген шылтоосун айтууда. Ата сөрөйдүн үстүнөн киши өлтүрүү беренеси боюнча кылмыш иши козголуп, убактылуу кармоочу жайга киргизилген. Учурда тергөө иштери жүрүп жатат.

Гүлжан Асанкожоева
koom@super.kg