БИЙКЕЧ ИШ ДЕСЕ ИЧКЕН АШЫН ЖЕРГЕ ТАШТАЙТ

Табияты (стихиясы) – Жер
Колдогон планетасы – Меркурий
Ташы – нефрит, акак таш
Түсү – кочкул көк, ак

«Эгер бир нерсени жасоого туура келсе, анда жакшы жасаш керек» деген эреже бийкечтерге тиешелүү. Тынымсыз иштегенди, так жүргөндү, тазалыкты жактыргандыктан баш аламандыкка чекит коюп, тартип орнотууну жактырышат. Ал эми байкагычтыгы жана логикалык ой жүгүртүүсүнүн күчтүүлүгү бийкечтерди маалыматка бай кылат. Бирок бийкечтерден ойдо жок укмуштуу пландарды жана долбоорлорду күтпөй эле койсо болот. Себеби алардын стихиясы Жер болгондуктан, күнүмдүк тиричиликтеги көзү көрүп, кулагы уккан гана нерселерди кабыл алып, фантазияга басым жасашпайт. Ал эми иш жаатына келсек, бир нерсени жасоодон мурда жети эмес, жетимиш жолу өлчөп кадам шилтейт. Андыктан булар тапшырылган иштин майын чыгарышат. Бул бийкечтердин көк беттигин жана ишке берилгендигин далилдейт. Кээде ушунчалык көпкө чейин ойлонгондуктан ойлору быт-чыт болуп, бир чечимге келе албай мүмкүнчүлүктү өткөрүп жиберип, алакан жайып отуруп калышат.
Мындан сырткары бийкечтердин текебердик сапаты бар. Ошондуктан алар турмушта бирөөгө көз каранды болгусу келбей, өз күчүнө таянып гана оокат кылууну эп көрүшөт. Мындан улам алар сүйүүдөн да көзү тумандабайт жана үй-бүлө күтүүгө өтө ашыгышпайт. Ошондой эле өз кемчиликтерин моюнуна алуу бийкеч үчүн тозоктун иши болсо, башкалардын ишин сынга алуу ага ырахат тартуулайт.

Мыкты сапаттары – иштерман, так, камкор.
Начар сапаты – текебер.

БИЙКЕЧ – ЭРКЕК
Романтиканы жактырган айым бийкеч-эркектин түгөйү болуп калса, анда сызга отургандай эле болот. Себеби бул жылдыз белгисиндеги эркектер булуттан сепил куруп, айды алып келип берем деген сезимдердин ээси эмес. Булар турмушта биринчи орунга материалдык жыргалчылыкты жана ыңгайлуулукту коюшкандыктан, үй-бүлө курган соң жубайынын кем-карчысын толуктап, керектүү нерселерин алып берүүгө дайым даяр. Туугандарына карамдуу. Ал эми балдарынын ызы-чуусуна чыдамы жетпейт. Аларды эркелетип ойнотууга караганда бир нерсени үйрөнүп, билим алуусун каалайт.
Мамиле түзүүдө чынчылдыкты өтө баалашат. Андыктан бийкеч-эркектин жүрөгүн ээлейм деп жагалданып комплимент айтып же өлүмүш болуп көз жашын төккөн айымдын эмгеги талаага кетет.

БИЙКЕЧ – АЯЛ
Бийкеч жылдыз белгисинин алдында туулган аялдар ысык менен муздакты айкалыштырган жандар. Алар мамиле курууда башкы каарман болушат. Эгер түгөйү менен жылдызы келишсе, мамилесин бекем сактайт. Ал эми кол кармашып жүргөн түгөйүнөн көңүлү калса, анда чайналып ортодо отура бербей башка эркекке кетип калууга дайым даяр. Үй-бүлөдө күйөөсүнө салыштырмалуу активдүү болгондуктан бийликтин тизгинин эч кимге карматпайт. Башка эркекке кетип калууга даярдыгы жана бийликти колдон чыгаргысы келбегендиги үчүн бийкеч-аялдар жалтырак-жултуракка эмес, өз алдынча турак жайга ээ болууга ашыгат. Негизинен, бийкеч-айымдардын экинчи турмушу ийгиликтүү болот. Ал эми балдарына дос катары мамиле жасап, кеңешин берет. Бирок алардын чектен ашып эркелешине жол бербей, тартипте кармайт.

БИЙКЕЧ – НАРИСТЕ
Бийкеч-наристелер табигаттан берилген тунук акылга, байкагычтык жана эсине бат түйүп калуу жөндөмүнө ээ болушат. Алар майда нерселерге көбүрөөк көңүл бургандыктан, тарбия берүүдө кыйынчылык жаратпайт. Көздөгөнүнөн кайра тартпаган аракетчилдиги анын окуусунда мыкты окуучулардын катарында болушун шарттайт. Өзү теңдүү балдар менен урушуп-талашпай, тынч жүрүп, жоош болушат. Бийкеч белгисиндеги балдар интеллектуалдык оюндарды ойноого абдан кызыгышат. Ал эми чоңойгондо медицина, химияга кызыгуусу артат. Ошондой эле спортко да жакын болушат.

Кубаныч Сыдыков
kenesh@super.kg