Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

Турсунбай Бакир уулу, Кыргызстандын Малайзиядагы элчиси: «БИР ТОП ЧИНОВНИКТЕРДИН КАРЫЗЫН КЕЧТИМ»

№367 13-19-ноябрь, 2009-ж.


Бейне

Алыскы Малайзия мамлекетиндеги Кыргызстандын толук ыйгарым укуктуу элчиси Турсунбай Бакир уулу бизде конокто. Элчи менен интернет аркылуу учурдагы кызматы, жеке турмушу, келечектеги максаттары туурасында маек курдук.

КЫСКАЧА...

  • 1958-жылы 17-мартта Кара-Суу шаарында туулган.
  • КМУнун тарых факультетин аяктаган.
  • Аялдарына француз атырын, түрдүү кийимдерди белек кылып келет.
  • Англис, орус, украин, фарс, өз­бек, түрк, уйгур, татар тилдерин билет.
  • Өзүнөн улуу эжеси менен агасы чарчап калган. Ошон үчүн аты Турсунбай.
  • Кичинесинде космонавт, “Динамо” (Киев) футбол клубунун оюнчусу, тоолуу айылда орус тили жана адабият мугалими болгусу келчү.
  • Жакшы көргөн тамагы – манна боткосу.
  • Философия илимдеринин кандидаты.
  • Коллекциялаган таш бакаларынын саны жүзгө жакындады.

– Турсунбай мырза, Малайзияга элчи болуп дайындалдыңыз. Эл ичинде “бийлик кайсы бир адамдан убактылуу кутула турууну кааласа, элчи кылып чет өлкөгө жиберет” деген кеп бар. Кулагыңыз чалды беле?
– Мен Жогорку Кеңештин эки жолку депутаты, анан тунгуч Акыйкатчы болгом. Башкаларга карата айтылган мындай сөздөрдү угуп эле жүргөм. Бирок бул сөз мага туура келбейт го. Президенттикке талапкерлигимди коюп жатканда үстөк талап кылбаган инвесторлорду алып келем деп көп айтчумун. Бийлик, балким, ушул сөздөрүмдү эске алгандыр.
– Бул жолу элчи болоруңузду билип туруп, президенттикке ат салышкан жоксузбу?
– Шайлоого катышчу адамдын чөн­төгү калың болушу керек. Мурунку шайлоолордо көп эле топтоп койчу элем. Бул жолкусунда чогулта албадым. Негизи, саясатчыларга оңой эле. Мен талапкермин деп бир мүнөттө жарыялап коёт. Бирок тууган-урукка кыйын экен. Саясатта, айрыкча шайлоо убагында жугунду-ылайды үстүңө чакалап төгөт. Буга өзүң чыдаганың менен, жакындарың чыдабайт. 2005-жылы талапкер болгонумда апамды жоготуп алдым. Баласына айтылган жаман сөздү эне байкуш көтөрө албайт турбайбы. Мени хизбут-тахрирчи деп чыгышты. Андай болсом сакалчандар Баткенге басып киргенде аларды кетирүүгө аракет кылбастан, сүйүнүп үйдө отурбайт белем?! 2007-жылы ЖКга депутат болом дегенде иним штабдын жетекчиси катары иш алпарган. Ал балит оюндарга жүрөгү чыдабай, эки жолу клиникалык өлүмгө дуушар болду. Астанага алып барып жүрөгүн төрт жерден тиктирип келдим. Акаев учурунда да оозумду жабыш үчүн ушул инимди “баңгисоодага тиешеси бар” деп, бир жылга ТИЗОго тыгып салышкан. Ушундай кыйноолордон кийин ажолукка ат салышууга такыр көңүлүм чаппай калды.
– Малайзияга кеткениңизге эки жума болду. Маанайыңыз кандай?
– Маанай абдан жакшы. Кызым Тахмина экөөбүз жайгашып алдык. Бир аз көнүшкөндөн кийин үй-бүлөмдү толук алып келем го. Бир неберемдин кулагы укпайт. Ошону да кийинчерээк ала келип операция жасатсамбы деп турам.
– Жаңы жамаатыңызга көнү­шүп калдыңызбы?
– Чакан жамаатым менен чай үс­түндө таанышып алдым. Бардыгы эле жаш дипломаттар экен. Үчүнчү катчыбыз Азаматтын иштегенине бир жыл, кеңешчи Арсланбекке эки ай болуптур. Эң көп иштеген (2 жыл) бухгалтерибиз Тынара жана анын күйөөсү – айдоочу Бакыт экен.
– “ЭрК” партиясы сиз жетектеп турганда белдүү партиялардан эле. Ошол деңгээл кармалып турарына ишенесизби?
– Партия­­нын учурдагы жетекчисине акыл-насаатымды жакшы эле айттым. Эми деле белдүү партия болуп кала берерине ишеним чоң.
– “Турсунбек Акун экөөнүн мамилеси жаман” деген сөздөрдүн канчалык чындыгы бар?
– Бул адам менин ордума келүү максатында көптөгөн ыплас иштерди жасады. Албетте, ал кызмат мага мураска калган эмес. Бирок таза, ак иштери менен келсе, мен деле сүйүнмөкмүн. Ошондуктан ал киши кеп кылууга да арзыбайт!
– Маегибизди өзүңүзгө гана таандык дүйнөгө бурсак. Сулуулукту баалайсызбы?
– Сулуулукту, кооздукту баалайм. Сулуу кыз көрсөм, эмнеге сүй­лөш­пө­шүм керек?! Сөзсүз эле денелик рахат алуунун кажети жок. Мен сулуу кыздар менен сүйлөшүүдөн рахат алам.
ОшМУда иштегенимде аял мугалимдердин кимиси менен сүйлөшсөм эле чаптап коюшчу. Мамилем жок дейин десем, «тигине, чычалап жатат» дешчүдөй. Унчукпаган үйдөй балээден кутулат болосуң, аргасыздан.
– «Адам баласына сүйүү бир нече жолу келет» дегенге ишенесизби?
– Албетте, ишенем. Мисалы, менин мектептеги биринчи сүйүүм Парпи деген кыз болгон. Ал убагында мени карабай кеткен. Кийин ОшМУда иштеп жүргөнүмдө жолугуп алып “бекер кылыптырмын” дейт. Анда баары кеч болуп калган. Экөөбүз тең үй-бүлөлүү элек. Студент кезде көлдүк аябай сулуу Эркингүл аттуу кызды сүйдүм. Кыз-жигит болуп сүйлөшө баштагандан соң бир жолу аялдамадан жолукмай болдук. Экөөбүз тең айылдан келгендиктен, бир эле көчөнүн аркы жана берки бетинде аялдама болорун билбептирбиз. Ал көчөнүн аркы бетиндеги аялдамада, мен берки бетинде тура бериптирмин. Бири-бирибизге келбей койду деп таарынып үйлөнбөй калганбыз. Биринчи аялым менен ажырашканымда, Эркингүл экөөбүз үйлөнөлү дедик. Бирок ал ооруп каза болуп калды. Өзүм дагы очогубуз бузулганда эки баламдын келечегин, дегеле эртеңки күндү ойлой берип катуу ооруп калдым.
Кичинемден индия же украин кызына үй­лөнүүнү самай бер­чү­мүн. “Жаштын тилегин берет” дегендей, Украинага аспирантурага барып калып, ал жактан үйлөнүп, аялымды Ошко алып келдим. Ошто европалыктарча жашаш кыйын. Ал эрке өскөн жалгыз кыз болчу. Жергиликтүү аялдардын ачуусун келтирип, көчөдө мени колтуктап алчу. Эртең менен чуркачу. Чуркап баратса көрүнгөн эле токтотуп алып уруша берчү. Ошого чыдабай кетип калды. Анан бойдок болуп жүрө бермек белем? Дагы үйлөндүм.
– Балдарыңыз тууралуу айта кетсеңиз...
– Улуу балам Каныбек 28 жашта. Алай районунун прокуратурасында тергөөчү болуп иштейт. Эки баланын атасы. Улуу кызым Зебиниссо 24 жашта. Өзгөчө кырдаал боюнча министрликте иштейт. Алла Таала көп эле сыноолорду ага жаштайынан берип койду. Кызы тубаса майып. Күйөөсү Орусиянын талааларында тентип жүрөт. Кызына же аялына карабайт. 19 жаштагы Карина кызым быйыл турмушка чыкты. Ал соода тармагында иштейт. Искендер уулум 16 жашта. Киевде мектепти аяктап жатат. Тахмина кызым 15 жашта. Азыр менин жанымда. Кенже уулум Кантемир быйыл 10 жашка чыкты. Энесинин эрке баласы.
– Өзүңүздү баймын деп эсептейсизби?
– Ашынган байлыгым жок, бирок баары жетиштүү. Кийингенге кийимибиз, жегенге тамагыбыз бар. Машина айдабайм, бирок жеңеңерге темир тулпар, кызыма велосипед алып бергем.
– Үй жумуштарынан кайсы ишти жакшы жасайсыз?
– Апам өмүр бою үй кожойкеси болгон адам. Атам райондук керек-жарак коомунун башкармасы эле. Эмгек өргүүдө жүргөнүндө колунда иштегендердин бирөөсү ката кетирип, атамдын моюнуна илип коюптур. Атамды күнөөлүү эмесмин дегенине карабай, алты жылга кесип жиберишкен. Ошондо үйдөгү иштерди жасоо менин моюнума түшкөн. Окуудан башка убакытта жыгач уста, шыбоочу-маляр, бетончу болуп 3 жыл иштедим. Бирок электр тогуна азыркыга чейин жолой албайм.
– Бирөө сизге же сиз бирөө­гө карыз эмессизби?
– Мага карыз адамдардын баары азыр чоң саясатта жүрүшөт. Баарын кошкондо 16 500 доллар болот экен. Силердин гезитиңер аркылуу ошол карыздардын баарын кечтим деп айтып коёюн. Сооп иш кылам дешсе, менин атымдан Курман айтка колунда жокторго, жетим-жесирлерге, түрмө, бейтапканаларга таратып беришсин. Менин да кичине карызым бар. Мага карыздар акчаны эртелетип беришкенде, мен да карыздан эрте кутулмак элем.
– Маек соңунда элчилик кызматта туруп, кандай иштерди жасоону пландап жатканыңызды айта кетсеңиз...
– Малайзиянын халал-ин­дустриясын алып келем деген пландар бар. Алар бизге келсе, үстөгү жок акча алып келет. Малайзияга ба­рып билим алган кыргыз жаштары көбөйүп жатпайбы. Малай-кыргыз окуу-жайын Кыргызстанга ачып койсок, кыйла жеңил болот эле. Андан сырткары, президент К.Бакиев жана Тышкы иштер министри К.Сарбаев менен болгон сүйлөшүүлөрдө Малайзиядагы элчилик Таиланд менен Индонезияны бирдикте тейлеш керек деген сөздөр болду. Буюрса, пайда алып келчү көп иштерди жасайын деп турам.
– Рахмат маегиңизге. Ишиңизге ийгилик.

Сүйүн Кулматова
koom@super.kg


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(1)
26.12.2009. 14:13 
Тайпасы:
Кыймылы жок
Комментарийлердин саны:
82
Катталган:
04-06-2009
Соӊку аракети:
21-10-2013 09:37
Жынысы:
Белгисиз
0
Бул инсандын аялдары менен балдарынан баш айланат го.
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: