ТАРАЗА БЕЛГИСИНДЕГИЛЕР ПОПУЛЯРДУУЛУКТУ СҮЙҮШӨТ

Табияты (стихиясы) – Аба
Колдогон планетасы – Чолпон (Венера)
Ташы – Опал, лазурит
Түсү – Сыя көк

Тараза жылдызынын алдында төрөлгөндөр ажарлуу келип, мүнөзү оор басырыктуу, токтоо, достукту баалашат. Болбогон нерселерге таарына беришпейт жана жакындарына жаман айтып, көңүлүн кирдетүүдөн алыс болушат. Билимди баалап, адамдарды түшүнө билишет. Чөйрөсүндөгүлөргө кылыктанып, эркелеп, керек учурда кошомат кыла коюп, ошондой эле колу ачыктыгы, жардамга кол сунгандыгы менен жага алышат. Ошол эле учурда башкалардан мактоону, туруктуу мамилени, сыйды күтүшөт.
Популярдуу болуу жашыруун тилеги болгондуктан, өзүн көптөгөн адамдар курчап жана баалап турушун каалайт. Сыртынан ийгиликтүү, шайыр жана ачык көрүнгөнү менен, чындыгында, андай эмес. Кээ бир учурларда катаал, кара мүртөз адамга айланып чыга келишет. Чырлап, жөнү жок ачууланып, жинденген учурлары да кездешет. Мына ошондой сапаттарынан улам досторунан кол жууп калуу коркунучуна кептелишет.
Таразанын жашоо образы да карама-каршылыктуу: Активдүүлүгү жана чарчабастыгы убак-убагы менен кайдигерлик, өзүн бош коё берүү менен алмашып турат. Максаты жок күн кечирип, эч нерсе жасагысы келбей калат. Болгону жатып алып, кечке китеп окуудан күчүн чыгарышат.
Мүнөзүнүн алмашып турганын билген таразалар жашоого реалдуу карап, туура чечим чыгарууга тырышышат. Бирок кээде өздөрү да байкабай башкалардын таасирине кирип, туура эмес кадамдарды жасап жиберишет. Таразаларга бекем эрк менен ички туюмга ишеним артуу жетишпейт. Бирөөлөргө «жок» дегендин ордуна «макул» деп алып кейип калган учурлары көп болот. Эгер ички үнүн уга билүүгө жетишишсе, анда чоң каталарды алдын ала алышат.

Мыкты сапаттары – тактык, чыдамкайлык, ар бир ишке туура баа берүүчүлүк.
Начар сапаты – чечкинсиздик.

ТАРАЗА – ЭРКЕК
Тараза – эркектер аялдардын жүрөгүн багынтуучулар эмес жана алгачкы көз караштан сүйүп калуучуларга кирбейт. Сезимдерге да өтө берилип кетпейт. Алгачкы кадамды айымдан күтүшөт. Эгер тилеги ишке ашпай калса, анда өзүн четке түртүлгөн катары эсептеп, бакыт кушун башкалардан издөөгө өтөт. Кокус өзүн жактырган айымга туш келсе анда андан ашкан айкөл, камкор, мыкты кеңешчи адам жок. Кыскасы, максатка жана ийгиликке жетүүдө аялдын демилгеси менен колдоосуна муктаж. Кийимдин түрдүүсүн жана жакшысын кийүүгө аракет кылышат.

ТАРАЗА – АЯЛ
Тараза – аял кандай эркектин болсо да көңүлүн таап кете алат. Жолдошунун ийгилигинен бакыт таап, ага мыкты жардамчы болуп берет. Бирок өзүн сүйүктүү жар катары сезе албаса, тетири карап басып кетүүсү да мүмкүн. Андыктан тараза жылдызындагы айымдар алгач сүйө билүүнү жана сезимдерге таянып чечим чыгарууну үйрөнүүсү кажет. Тараза – аялдар кийимдин эң мыкты үлгүлөрүн түзө алышат.

ТАРАЗА – НАРИСТЕ
Сырткы келбети жакшынакай келип, айрымдарынын ууртунда уячасы болот. Табиятынан кызыл-тазылдарга жакын болбогондуктан, өтө ачык эмес түстөгү кийим менен оюнчуктарды алып берүү кажет. Катуу музыканы жана уруш-талашты сүйүшпөйт. Ата-энесинин чатагы абдан оор тийип, ал тургай ооруп калат. Туура эмес иши үчүн урушуп, уруп коюудан да психикасы катуу жапа чегет. Бул бара-бара мүнөзүнүн бат-баттан алмашып турушуна алып келет. Андыктан акырын түшүндүрүп айтып тарбиялоо оң.
Бир нерселерди бат үйрөнгөнү менен, бат чарчап, кылган ишин аягына чыгарышпайт. Ошондуктан көзөмөлдөп, ишти толук бүткөрүүгө үйрөтүү кажет. Спортту сүйө беришпейт. Бийге, сүрөткө жана музыкага ыкташат. Кызыгы математикага да жакын болушат.

КИМДЕР МЕНЕН ТИЛ ТАБЫШАТ?
Мыкты шайкеш келе турган жылдыз белгилер – эгиздер, арстан, суу куяр, жаачы, балык
Тил табышып кетүүгө мүмкүн – текечер, букачар, бийкеч, тараза, кой
Такыр тил табыша албагандар – бөйөн, чаян