ЧАЯНДАР ӨЖӨР ЖАНА КУМАРЛУУ ЖАНДАР

(24-октябрдан -22-ноябрга чейин төрөлгөндөр)
Табияты (стихиясы) – Суу
Колдогон планетасы – Марс
Ташы – аквамарин, лаал
(рубин), коралл
Түсү – кочкул кызыл, сары

КИМДЕР МЕНЕН ТИЛ ТАБЫШАТ?
Мыкты шайкеш келе турган жылдыз белгилер – бөйөн, текечер, балык, букачар.
Тил табышып кетүүгө мүмкүн – жаачы, бийкеч, чаян, эгиздер.
Такыр тил табыша албагандар – суу куяр, тараза, арстан, кой.

ЖУМУШ, КАРЬЕРА
Көп күчтү, эркти жана ойлонуп жасоону талап кылуучу татаал, оор иштерди сүйүшөт. Ички туюмдары жана эс-тутумдары мыкты. Кырдаалды бат аңдап, туңгуюктан жол таап кете алышат. Идеяларга бай, беттегенинен кайтпас өжөрлөр. Андыктан аларга илимий-изилдөө иштери, криминалистика, хирургия жана психология туура келет. Карьерадан бат көтөрүлүп кетүүгө күчүн аяшпайт. Бирок адамдар менен оңой таанышып, аралашып кете алышпайт.
Ден соолук. Чаян жылдызындагылар аз оорушат, бирок бир сыркоолошсо катуу оорушат. Көбүнчөсү мурун (көпчүлүк учурда канайт), тамак, жүрөк, арка-бел, бут оорулары менен жабыркашат.
Үй-жай. «Үйүм – чебим, үй-бүлөм – сыймыгым» дегенди туу туткан чаяндардын үйү ээсинин өзгөчөлүгүн белгилеп, курулушу болобу, ички-сырткы жасалгасы болобу, башкалардыкынан бөлүнүп турат.
Эс алуу, хобби. Спортту сүйүшөт. Суу жээгинде эс алууну жана жамгыр алдында басып жүргөндү баалашат. Тынч, эл жок (же эл аз) жерде отуруп алып ойлонууну, китеп окууну жактырышат.

ЧАЯН – ЭРКЕК
Достукка бекем, шериктерин оор кырдаалда ташташпайт. Акча табууну жана аны көбөйтүү жолдорун билишет. Калпты бат эле сезип коюшат. Өздөрүнө талапты катуу коюшкандыктан, башкалардан да ошону талап кылышат. Ушул себептүү булардан каардуу жана ырайымсыз жетекчилер чыгат. Бирок өзүн-өзү сындап, өзүн ичтен жей бермей адаттары, анан сараңдыгы бар.
Сүйүүгө келсек, кызганчаак жана шекчил жандар. Сезимдерин элден жашырышат. Эл алдында өздөрүн орой, жубайына көңүл бурбаган, аны менен акылдашып иш кылбаган эркек катары алып жүрүшөт. Бирок үйдө алардан ашкан сүйүктүү, ыкластуу күйөө жок.

ЧАЯН – АЯЛ
Булар кылыгы жана сымбаты менен эркектерди магнит сыяктуу тартып турган айымдар. Өз алдынчалыкты сүйүшөт жана эрктери күчтүү. Өтө кумарлуу экендигине карабай никедеги туруктуулукту баалашат. Ушул себептүү өздөрүнө татыктуу эркектерди издешет. Күйөөсүнөн көптү талап кылышат, ошого жараша өздөрү да жоопкерчиликтүү жандар. Кекчил болушкандыктан ылайыгын келтирип туруп чагып алышат. Абдан ачуусу келгенде жанар тоо атылгандай болот.

МЫКТЫ САПАТТАРЫ – максатка умтулуучулук, токтоолук, чыдамдуулук, чечкиндүүлүк жана жоопкерчиликтүүлүк.

НАЧАР САПАТТАРЫ – Кызганчаактык, өзүн-өзү билемдик, ырайымсыздык, кекчилдик.

ЧАЯН – НАРИСТЕ
Кичинесинде агрессивдүү келишип, согуш оюндарына басым жасап, курал оюнчуктар менен ойношот. Алардын мындай оюндарын акыл оюндарына алмаштырып, боорукерликке тарбиялоо кажет. Болбосо ырайымсыз болуп чоңоюп калышы мүмкүн.
Сезимтал жана лидерлер. Бир нерсени максат кылып алса, ага жетмейинче жандары тынчыбайт. Аларды айнытуу да кыйын. Андыктан максат-тилегин сезип-билип, кызыктуу жана пайдалуу жакка буруп туруу оң. Сырдуу көрүнүштөргө жана мистикага жакын болушат.

Канымжан Усупбекова
kenesh@super.kg