2015-жылдын 1-январынан баштап кыргызстандыктар Орусияга мурдагыдай эле ID-card же чет өлкөгө чыгуучу паспорттору менен кирип-чыга алышат. Мындайча айтканда, Орусияга кирип-чыгуу тартиби өзгөрүүсүз калат. Бул тууралуу 25-декабрда Кыргызстандын аталган өлкөдөгү элчилиги билдирди. Жашы жете элек жарандар туулгандыгы тууралуу күбөлүк жана өлкө жарандыгы тууралуу атайын маалым кат менен чек арадан өтө алышат.
Эскерте кетсек, кыргызстандыктар, анын ичинде 16 жашка чейинки балдар да 2015-жылдын 1-январынан баштап Орусиянын аймагына кирүүдө чет өлкөгө чыгуучу паспортторун көрсөтүүгө милдеттүү болору маалымдалган.
Орусиянын Федералдык миграция кызматынын башчысы Константин Ромодановскийдин айтымында, Кыргызстандан башка КМШ өлкөлөрүнүн жарандары 2015-жылдан тартып чет өлкөгө чыгуучу паспорттор менен гана Орусияга кирип чыгышат. Анын ичинде Тажикстан менен Өзбекстан да бар. «Бир гана Кыргызстан үчүн мөөнөт кийинкиге калтырылды, анткени бул өлкө Евразиялык экономикалык союзга кирүү боюнча иштер жүрүп жатат»,- деди Ромодановский.
Мирлан Өмүралиев
politika@super.kg