Алмазбек Атамбаев: «ТАСМАЛАР ЭЛГЕ ҮМҮТ ТАРТУУЛАШЫ КЕРЕК»

26-январь күнү мамлекет башчы Алмазбек Атамбаев «Зарыл ишиӊ болбосо, Зардалыда эмне бар?» фильминин авторлорун кабыл алды. Режиссёр Абдулалим Мамадалиев, идеянын автору Молдосеит Мамбетакунов жана режиссёр-монтаждоочу Ракыя Шершеновага Баткен облусунун Баткен районундагы шарты катаал алыскы Зардалы айылынын тургундарынын жашоо-шартын чагылдырган тасма жараткандыгы үчүн президент ыраазычылык билдирди.
«Бул туулуп-өскөн айылды, мекенди сүйүү тууралуу жакшы фильм. Алыскы, тоолуу, чек арага канатташ айылда жашаган кыргызстандыктардын эмгекчилдиги жана кайратмандыгы жөнүндө. Тасма жылуу маанайга жана жакшылыкка үндөп, көрөрмандарга дем берип турат. Кыргызстанда тартылган кинофильмдер жаратмандыкка, билим берүүгө чакырып, руханий, адеп-ахлактык баалуулуктарды өнүктүрүп, элге үмүт тартуулоого тийиш»,- деди Алмазбек Атамбаев.
Мамлекет башчы Зардалы айылынын жашоочуларынын көйгөйлөрүн чечүүнү көзөмөлгө алуу, анын ичинде айылдын статусун аныктоо боюнча тиешелүү органдарга тапшырма берди. Ошону менен бирге президенттик фонддон Зардалы айылынын мектебин электр энергиясын иштеп чыгуучу жабдуу, компьютерлер, окуу куралдары менен камсыз кылуу үчүн көмөк көрсөтүлөрү айтылды.
2013-жылы биздин гезит да кароосуз калып кеткен Зардалы кыштагы тууралуу кеӊири макала жарыялаган. Кары кишилер шарты канчалык катаал болбосун, ата-бабасы жашап өткөн жерди таштап кете алышпасын билдиришкен эле. Кыштакты район менен Данги деп аталган тоо боорундагы бир таман чыйыр жол байланыштырып турат. Тургундар эгинин орок менен оруп, буудайын суу тегирменден тарттырып, таштан салынган үйлөрдө турушат. Айыл тургундары тамашалай «шаардыктар эски заманды сагынышса, Зардалыга келип кетсин» дешет.

Эльвира Караева,
Наргиза Бекжанова
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (5)
Kroxa
2015-02-02 22:01:31
Шумдуктуудай го таштан салынган уйлордо жашаса,таш тегирменге ун тартышса, таш заманы го
0
Kroxa
2015-02-02 22:03:39
Зарыл ишин болбосо зардалыга эмнени издеп барса болот эски заманды коруу учунбу??
0
EdikoKG
2015-02-04 10:05:58
Афганистан го)))
0
Nurmatova
2015-02-05 15:02:58
Кино тартуучуларга ийгилик!
Кызыктуу кино тартылса керек :) Коргум келди/
0
orun
2015-02-07 15:43:13
Зардалы-керемет, кооз жер! Барып турбасам ата-бабам байырлаган мекенимди сагынып кетем!
0
№ 639, 30-январь-5-февраль, 2015-ж
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА