АЙДООЧУ МАИЧИНИН ОГУНАН КАЗА ТАПТЫ

11-июнь түнү Чүй облусуна караштуу Беловодск айыл аймагынан Жол кайгуул кызматынын кызматкери 23 жаштагы жигитти атып салды. «Адамды ит аткандай атып салат деген эмне тамтык? «Карга карганын көзүн чукубайт» кылып ишти жаап салбай, укук коргоо органдары акыйкат чечим чыгарышын күтөбүз» дейт маркумдун туугандары.

«КАЛЫСТЫК БОЛБОСО ӨЗҮМ ӨЛТҮРӨМ»
Маркум Тилек Шабаев жерге берилген. Уулунан айрылып буурчактап аккан көз жашын тыя албаган атаны кайдигер карап туруу мүмкүн эмес. Маркумга куран түшүргөн соң, атасы Шурубек Шабаев «балама ушинтип алакан жайып куран окуп калам деп үч уктасам түшүмө кирген эмес» деп окуя тууралуу айтып берди.
– Уулум Тилек 1992-жылы туулган. Апасынын каза болгонуна жыл да айлана элек. "Апамдын ашын бергенден кийин үйлөнсөмбү?" деп жүргөн эле. Тилек Москва райондук мамлекеттик каттоо кызматында иштечү.
11-июнь күнү эртең менен жумушка кеткен. Мен аны дайыма эртең менен "жумушка бар" деп ойготчумун. Кечиккенине кабатыр деле болгон жокмун. Анткени ал жумуштары бүтпөй калса кечке чейин калып иштей берчү. Түн кирип калганда улуу балама кесиптештери телефон чалып, "иниң автокырсыкка кабылды" дешиптир. Ызы-чуу түшүп ооруканага бардык. Балам өзүнө келет деген үмүтүм эң акыркы болуп өчтү. Жандандыруу бөлүмүнүн врачтары аны сактай албай калышканын угузушту.
Күбөлөрдүн айтымында, уулум өзүнүн Ниссан Альмера үлгүсүндөгү унаасына кесиптештерин салып, жумуштан кийин эс алууга барышыптыр. Кечки саат 21:30дар чамасында аларды үйлөрүнө жеткирүүгө бара жаткан экен. Ошол маалда Жол кайгуул кызматкерлери кызматтык эмес, жеке менчик унаасы менен кууп келип, уулумду токтотууга аракет жасашыптыр. Айласы жок токтогон уулумду алардын бири эч кандай эскертүү бербей эле атып салыптыр. Айдоочу отурган тараптан, оң жактан келип аткан экен, ок Тилектин колун тешип өтүп, боор, ашказанын жойлоп барып кабыргага такалып калыптыр. Ушул алган жаракатынын айынан ичине кан толуп, кан басымы түшүп, эсине келбей каза болду. Тилекти аткан Вахиджан Салимбаев деген МАИ кызматкери тергөөдө берген көрсөтмөсүндө «Унаанын айдоочусу тосконубузга жана жол чырактын кызыл жарыгы күйгөнүнө карабай жогорку ылдамдыкта айдап өттү. Биз артынан кубалап айдасак, ылдамдыгын ого бетер жогорулата берди. Айдоочуну токтотуу үчүн биринчи асманга ок аттым. «Токто, атам!» деп эскерттим. Шабаевдин көрсөткөн каршылыгынан жыгылып бара жатып тапанчамдан дагы бир ок атылып кетти» деп көрсөтмө бериптир. Ушул кантип болсун? Ишти дагы «карга карганын көзүн чукубайт» дегендей, эптеп-септеп чампалап жаап салбасын деп Асыл-Баш айылынын эли, туугандары, кесиптештери баары биригип прокуратуранын алдына чогулдук. Мага баламды аткан Салимбаевди көрсөтүштү. «Баламды эмнеге аттың, айтчы?!» десем, «Кечирип коюңуз, байкабастыктан кырсык болуп атып алдым» деди. Ушинтип эле кызмат абалынан пайдаланып, адамды итче көрбөй ата берген болчу беле?
Демократиялуу өлкөдө эч качан бейчеки адам өмүрү кыйылбашы керек болчу. Баламдын өлүмү мени мындай ишенимден тайдырды. Эгер менин баламды аткан кызматкерди жеңил жаза менен бошотуп жиберсе, анын өмүрүн өзүм кыюудан кайра тартпайм!

«ТИЛЕК ИЧИМДИК ИЧКЕН ЭМЕС»
Окуя болгон убакта маркумдун жанында чогуу болгон кесиптештеринин бири КЕРИМ АКМАТОВ окуяны төмөнкүчө сүрөттөп берди.
– Тилек мага инимдей эле болуп калган. Ал улуулардын айтканын эки кылчу эмес. Ошол күнү Тилектен башка дагы 3 кесиптешим болуп тамактанып, ичимдик ичкенибиз да чындык. Бирок Тилек унаа башкарып жүргөндүктөн ичкен эмес. Кечинде ал баарыбызды жеткирип коёюн деген. Бир маалда ал «күзгүдөн карасам бизди жанатан бери эле бир унаа аңдып келе жаткандай болуп жатат» деп калды. Ылдамдыгын жогорулатты, бирок тигил унаа артыбыздан калган жок. «Качайынбы, эмне кылайын?» деп бизден сураганынан биз да эмне кылышыбызды билбей, «токтобой эле кой» дедик. Кандай унаа, ичинде кимдер бар, балким, карасанатайлык менен бизди бир нерсе кылып, унаабызды тартып алалы деген немелерби деп оюбузга ар нерсе келди, корктук. Бир маалда катарлаш келип калган унаанын ичинде МАИнин формасын кийген киши бар экенин көрдүк. Ошондо гана бизди кубалап келе жаткан унаада МАИ кызматкерлери бар экенин билип, Тилек унаасын токтотту. Бирок көз ачып жумгуча ичинен бирөө түшүп келип Тилек отурган жактын терезесинен аны атып таштады. Сынган айнектин майда бөлүкчөлөрү бизге чачырап кетти. Тилек тырмалап жатып эшикти ачып, жерге кулап түштү.
Баарыбыз дендароо болуп эле туруп калдык, унаадагы кыздар кыйкырып ыйлай башташты. 15-20 мүнөт аралыгында МАИ кызматкерлери өздөрүнүн унаасына Тилекти салып, ооруканага алып кетишти. «Тез жардам» чакырабыз дегенибизге алар көнгөн жок. Жарым сааттан ашык убакыттан кийин алардын кызматтык унаасы келип, бизди прокуратурага алып жөнөштү. Менчик унаалары менен эмнеге антип кубалашат? Эгер патрулдагы унаа болсо, биз деле Тилекке качпа демекпиз да.

«ЖОЛ КАЙГУУЛ КЫЗМАТКЕРИ 2 АЙГА КАМАККА АЛЫНДЫ»
Учурда Тилек Шабаевди атып өлтүргөн Москва РИИБинин Жол кайгуул кызматынын кызматкери 2 айга камакка алынган. Бул тууралуу ИИМдин Жол кайгуул кызматынын басма сөз кызматынын инспектору ТИЛЕК ОТОРОВ билдирди:
– Бул ишти Чүй облусунун Москва райондук прокуратурасы иликтеп жатат. Тийиштүү экспертизалар дайындалган. Маркум Шабаев кызыл жарыктан өтүп кеткенби же ичимдик ичкенби мунун баары тергөө иштеринин жыйынтыгында билинет. Ал эми биздин кызматкерге келсек, анын айтымында, Тилек Шабаев салонуна ичимдик ичкен адамдарды салып алып, Жол кайгуул кызматкерлеринин тосконуна токтобой, башкаларга коркунуч жараткан жогорку ылдамдыкта айдап бара жаткан.
Ооба, орган кызматкерлеринин укук жана милдеттеринде көрсөтүлгөн алгач асманга ок атуу же унааны токтотуу аракетинде дөңгөлөккө атуу сыяктуу ыкмалар Жол кайгуул кызматкери тарабынан аткарылган эмес. Анын үстүнөн прокуратура тарабынан Кылмыш жана жаза кодексинин 305-беренеси (кызматтык ыйгарым укуктардан аша чабуу) боюнча кылмыш иши козголуп, ал камакка алынган. Учурда тергөө иштери жүрүп жатат.

Гүлжан Асанкожоева
koom@super.kg

 Кыстарылган видео