Орусияда дагы бир кыргыз кызы өз мекендештери тарабынан сабалды. Бул тууралуу видео интернет баракчаларына тарады. Видеого «патриоттор» кыргыз кызын өзбек улутундагы жигит менен баратканда кармап алып, ур-тепкиге алышканы тартылган. Алар кызды суракка алып, аты-жөнүн, туулган жылын толук айттырышат. Андан соӊ өзбек баланын да аты-жөнүн айттырып, суракка алганы жазылган. Кыз Бишкек шаарынын четиндеги Күн-Туу айылынан, өзбек жигит Өзбекстандан болорун айткан. Анда өзбек улутундагы жигит жумуштан чыгып, кыргыз кыздын үйүнө батир көрүүгө баратканын жана анын жолдошун тааный турганын айткан.
Эске салсак, аз убакыт мурун эле баткендик кыз «патриоттор» тарабынан сабалганы тартылган видео таркаган эле. Ал кыздын ким экендиги такталып, видеону интернетке жарыялаган «патриоттордун» бир нечеси кармалганын Кыргыз Республикасынын Орусиядагы элчилигинен 18-июлда кабарлашкан. Өздөрүн «патриот» деп эсептеген бул тайпанын Екатеринбургда 15ке жакын мүчөсү бар экени белгилүү болгон. Ал эми жогорудагы окуя Санкт-Петербургда болгон. «Патриоттор» Орусиянын бир эле шаарында эмес, көп аймактарында «өнөр» көрсөтүп жатышат деп жыйынтык чыгарууга болот. Кыязы, Кыргызстандын укук коргоо органдарынын алсыздыгы, мындай мыйзамсыз иштерге чекит коюуга көӊүлү жоктугу да «патриотторго» кошумча шыкак бергендей.
Мирлан Өмүралиев
politika@super.kg