БИР БҮРКҮМ

Кытайда 3-сентябрда Кытай-Япония согушунун жана фашизмге каршы ЭКИНЧИ ДҮЙНӨЛҮК СОГУШТУН аякташына 70 жыл толгону белгиленди. Салтанаттуу парадга президент Алмазбек Атамбаев жана Кыргызстандын Улуттук гвардиясынын 74 аскери катышты.
ЖОГОРКУ КЕӊЕШКЕ 2-сентябрь күнү 35 депутат келди. Кийин алардын катары 52ге жетти. Мыйзамга ылайык, кворум чогулбагандыктан жыйын кийинки күнгө жылдырылды. 3-сентябрда Жогорку Кеӊешке 30 гана депутат келгени маалым болду.
Таш-Көмүр шаарында аз кубаттуулуктагы МУНАЙДЫ КАЙРА ИШТЕТҮҮЧҮ завод ишке берилди. Ишкана жылына 50 миӊ тонна продукция даярдайт. Заводдон АИ-92 бензини жана дизель майынан тышкары гудрон, битум жана крекинг-мазут өндүрүлөт.
Жогорку Сот депутат ХАЖИМУРАТ КОРКМАЗОВДУ тергөө учурунда камакка алуу боюнча Октябрь райондук сотунун чечимин күчүндө калтырды. Буга чейин Бишкек шаардык соту Коркмазовду үй камагына чыгарган болчу.
Жогорку Кеӊештин азыркы курамындагы 120 депутаттын 92си ар кайсы партиялардын катарында кайрадан ШАЙЛООГО аттанышты.
Кыргыз-тажик чек арасындагы «Кара-Мык» тозотунда 23-августта кызмат өтөп жаткан жеринен ДАЙЫНСЫЗ ЖОГОЛГОН жоокер дале табыла элек. Бир айдан кийин жоокердин кызмат мөөнөтү аяктамак.
СИРИЯДАГЫ СОГУШТА жараланып, Түркияда дарыланган 1995-жылы туулган Жалал-Абаддын тургуну Кыргызстанга келди. Ал бир өпкөсүнөн ажырап майып болуп калган. Бул тууралуу УКМК билдирет.
Тажикстандын президенти ЭМОМАЛИ РАХМОН өзүнүн 37 жаштагы кызын бийик даражалуу «Шараф» ордени менен сыйлады. Президенттин кызы Озода Рахмон учурда тышкы иштер министринин биринчи орун басары.
Парламенттик шайлоого талапкер болуп атталгандардын ичинен 234 адам КЫЛМЫШ ИШТЕРИНДЕ катыштыгы бар. Ички иштер министрлигинин билдиришинче, алардын 53ү боюнча сот чечими жок, 15и атайын каттоодо турат, 3 талапкер издөөдө жүрөт.
Депутаттыктан кетүү тууралуу өз каалоосу менен арыз жазган Абдулатип Режавалиевдин ордуна БШК АСЫЛБЕК АРАПБАЕВГЕ мандат тапшырды.
КЫРГЫЗ-КЫТАЙ чек арасындагы Торугарт автожолу жана Эркеч-Там автожолу өткөрүү бекеттери 3-сентябрдан 6-сентябрга чейин жабык болот. Чек аранын жабылышы Кытайда Экинчи дүйнөлүк согуштун аякташына 70 жыл толгонун белгилөөгө байланыштуу.

Мирлан Өмүралиев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 670, 4-сентябрь-10-сентябрь, 2015-ж