МАЛАЙЗИЯНЫН ПОДИУМУН БАГЫНДЫРГАН КЫРГЫЗ ЖИГИТИ

Чет мамлекетте ийгиликтерди багындырган мекендештерибиз арбын. Айрымдары илим тармагында өзүн көрсөтсө, кээ бирлеринин спорт, бизнес жаатында жетишкендиктерин көрүп көӊүл көтөрүлөт. Чет жерде ийгиликке жетип жүргөн жаш модель Жоомарт менен болгон маекти бул жактан окуӊуз.

Толук аты-жөнү – Жоомарт Токтосунов
Туулган жылы, күнү – 1995-жыл, 17-май
Бою –190 сантиметр
Салмагы – 78 килограмм
Туулган жери – Ош облусунун Отуз-Адыр айылы
Билими – Малайзиядагы Лимкоквинг университетинин студенти
Үй-бүлөлүк абалы – Бойдок
Учурда – Малайзияда модель болуп иштейт

– Малайзиянын подиумун багындырганга чейинки кадамдарыӊа токтолсоӊ...
– 5 же 6 жашымда болсо керек, ата-энем мени чоӊ энеме таштап, Ош облусунун Отуз-Адыр айылынан Бишкекке көчүп келишкен. Бир жылдан кийин «балабыз борбордо билим алсын» дешип, Бишкектин четиндеги Төмөнкү Ала-Арча конушундагы мектепке беришти. Ата-энем ишкерлик менен алектенишет. Төрт бир тууганбыз. Мектепти аяктагандан кийин туугандарымдын кеӊеши менен Малайзиянын маалыматтык технологиялар боюнча университетине тапшырдым. Англис тилин жакшы өздөштүргөндөн кийин Лимкоквинг университетине которулдум. Кесибим программист.
Бул жакка келгенден кийин эки жыл эрке студент болуп ата-энемдин акчасына жашап жүрдүм. Анан алардан кайра-кайра акча сурай бербейин деп дүкөнгө сатуучу болуп ишке киргем. Бир күнү адаттагыдай кардарларды тейлеп жатсам бир кыз келип «модель болгуӊуз келбейби?» деп сураганда алгач күлкүм келген. Ал өзүн тааныштырып «модель болсоӊуз, сизге акча төлөп беребиз» деп мени ынандырды. Ошентип кокусунан келген кардар кыз менин модель болушума түрткү болду.
– Дароо эле подиумга чыгып кетпесеӊ керек?
– Моделдерди окуткан мектептерге барып, өз алдымча күзгүнүн алдында басып далай ирет машыктым.
– Ал жакта моделдерге болгон талаптар кандай?
– Боюӊдун узундугу 185 сантиметрден 195 сантиметрге чейин болушу зарыл. Албетте, дене-мүчөӊ келбеттүү жана жүзүӊ жагымдуу болушу керек.
– Алгачкы гонорарыӊ эсиӊдеби?
– «Stylo» мода агенттигинин көргөзмөсүнө чыгып 1000 доллар алгам. Азыр ата-энемден акча албайм, тапкан каражатым өзүмдү каржылаганга жетет.
– Атактуу кайсы бренддер менен иштешесиӊ?
– Индонезиянын Maura Clothes, Кытайдын Meterbonswe, Кореянын Brothaboy Aus, Beyond Closet, Малайзиянын Ezuwan Ismail, Benua Feat, Altimet Bon Zainal, Fairuz Ramdan өӊдүү бренддери менен иштешем. Алардын кийимин кийип подиумга чыкканым үчүн бир көргөзмөдө 600 доллардан 1000 долларга чейинки гонорар алам.
– Сен дайым келишимдүү болуп турушуӊ керек эмеспи, спорт менен машыгып, мода кууп кийинесиӊби?
– Агенттерим (буйрутма берүүчүлөр менен келишим түзүүчүлөр) айтмакчы, менин жүзүм дайым сатыкка даяр болуп турушу керек (күлүп). Кыргызстанда бокс, кикбокс, күрөш менен машыкчумун. Азыр дене-мүчөмдү бир калыпта кармап туруш үчүн машыгуу залына барып турам.
Шопоголикмин, моданын артынан кууп кийинем, бул мага жагат.
– Моделдик кесиптен тышкары эмне менен алектенесиӊ?
– Бир жылдан ашык убакыттан бери модель болуп иштеп келатам. Келечекте деле сүйүктүү кесибим менен иштейм деп ойлойм. Учурда кошумча дүкөндө сатуучу болуп иштейм.
– Эми жеке жашоого келсек, жандап жүргөн сүйүктүүӊ барбы?
– Учурда сүйлөшкөн кызым жок. Болочоктогу жубайымдын акылдуу болушун каалайм. Кыйын учурларда акыл айтып, жөлөк болуп турган жан шеригиӊ болгонго эмне жетсин? Жандап жүргөн түгөйүм гана болбостон, ал менин досум, кеӊешчим болушу керек.
– Сулуу айымдарга капчыктуу мырзалар ашык болушат эмеспи. Сенин келишимдүү дене-мүчөӊө ашыккан кыздар да көп болсо керек?
– Мага суктанган кыздар көп эле (күлүп). Мода көргөзмөлөрү, фотосессия ушул өӊдүү иштер бүткөндөн кийин мени менен сүрөткө түшүп, жагымдуу сөздөрүн айтып кетишкен кыздар болот.
– Ата-энеӊ сенин модель болуп иштөөӊө кандай карашат?
– Алар менин модель болушума каршы эмес, менин ар бир ийгилигим үчүн сыймыктанышат.
– Алдыда аткарам деген кандай максаттарыӊ бар?
– Окуумду ийгиликтүү аяктап, Малайзияда иштеп, тажрыйба топтоону пландап жүрөм. Келечекте бул жактан алган тажрыйбамды мекениме барып бөлүшүп, бир тармакты өркүндөтүү менин башкы максатым.

Султан Төрөбеков
star@super.kg