АЛИШЕР САИПОВДУН ӨЛҮМҮНӨ ШЕКТҮҮ КИШИ ТАЖИКСТАНДАН КАРМАЛДЫ

Кыргыз-тажик күч органдарынын тыгыз иштешүүсүнүн натыйжасында «журналист Алишер Саиповдун өлүмүнө тиешеси бар» деп шектелген Фарух Шарахматуллаев Тажикстанда кармалды.

Өлкө башчысы Курманбек Бакиев 20-январда Орусиянын биринчи вице-премьер-министри Игорь Шуваловду кабыл алды.

Өкмөт үйүндөгү жолугушуу учурунда Игорь Шувалов Орусия КМШга төрагалыгы учурунда уюмду бекемдөө үчүн бардык мүмкүнчүлүктөрдү пайдаланууга аракет кыларын белгиледи. Ошондой эле жолугушууда эки тараптуу жана КМШ алкагында кызматташууга байланыштуу маселелер талкууланды. “Борбор Азия Орусия үчүн өзгөчө аймак болуп саналат. КМШнын өнүгүүсү бул аймакка байланыштуу болот. Кыргызстан 2008-жылы КМШ төрагалыгын ийгиликтүү өткөрдү. Орусия дагы төрагалыгы учурунда шериктештиктин натыйжалуу иштешине өз салымын кошот”,­- деди Игорь Шувалов­.

Окуя 17-январда Жалал-Абад облусунун Ноокен районундагы Моомбеков айылында болгон. Кыргыз аймагына өтүп келген өзбек жоокерлери кыргыз чек арачыларына ок атышкан.

Натыйжада бутуна эки ок тийип жарадар болгон кыргыз жоокерин өзбектер өз аймагына алып кетишкен. Чек ара тилкесинде турган 20га жакын өзбек жарандары да кыргыз чек арачыларын таш менен урушкан. Чек ара кызматынын маалыматына караганда, окуянын чоо-жайын териштирүү жана кыргыз чек арачысын кайтарып алуу боюнча атайын топ иштеп жатат. Ал эми өзбек чек ара кызматы жарадар болгон кыргыз жоокери Нурбек Орункуловдун Анжияндагы ооруканада жатканын, абалы дурус экендигин маалымдашты.
Эскерте кетсек, 2009-жылдын 7-июнунда да өзбек чек арачылары кыргыз жараны Улукбек Жорокановду атып салып, өз аймагына алып кирип кетишкен. Ал жакта каза болгон кыргыз жаранынын сөөгү
3 күн дегенде араң Кыргызстанга кайтарылып берилген.

Президент Курманбек Бакиевдин жардыгы менен Ташбоо Жумагулов Кыргызстандын Түркиядагы толук ыйгарым укуктуу элчиси болуп дайындалды.

Ташбоо Жумагулов буга чейин Мамлекеттик тил боюнча улуттук комиссияны жетектеп келген. Өлкө башчысынын башкаруу системасын жаңылоо программасына ылайык, Мамлекеттик тил комиссиясы жоюлуп, анын милдеттери Маданият жана мамлекеттик тил боюнча агенттикке берилген эле.

Адвокат Азимбек Бекназаров Исмаил Исаковго карата Бишкек аскердик гарнизондук сотунун чечимин жокко чыгаруу өтүнүчү менен жолдогон аппеляциялык арызын Республикалык аскердик сотуна 19-январда тапшырды.

Адвокат ошондой эле Исмаил Исаков менен жолугуп чыкканын билдирип, абактагы экс-генерал кыргыз элине, саясий үзөңгүлөштөрүнө жана өзүнүн пикирлештерине карата кайрылуу жасаганын кабарлады. Кайрылууда Исмаил Исаков өз талапкерлерине ыраазычылык билдирип, бирок ачкачылык кармап ден соолукка зыян келтирбестен, акцияны токтотуусун өтүнгөнү айтылат.
Эске салып өтсөк, мурдагы Коргоо министри жана Коопсуздук кеңешинин мурунку катчысы И.Исаков “Коргоо министрлигине тиешелүү 2 бөлмөлүү батирди офицер уулуна берип койгон” деген айып менен 11-январда 8 жылга кесилип, генерал-лейтенанттык чининен ажыратылган.

Орусиянын Челябинск шаарында “Мигранттардын укугун коргоо борбору” ачылды.

Аталган борбор Эмгек, калкты ишке орноштуруу жана миграция министрлиги, Кыргызстан аялдар конгресси, “Сорос” фонду тарабынан уюшулду. Борбордун кызматкерлери аталган шаарда жашамакчы. Алар Орусияда иштеп жүргөн кыргыз мигранттарынын укуктарын коргоп, керектүү учурда аларга юридикалык жардам беришет. Учурда борборго жабдуулар жана акча каражаты бөлүнүп берилди.

Мындай чечимди 20-январда ЖКнын “Ак жол” фракциясы Ысык-Көлдөгү Казакстандын төрт пансионаты жайгашкан жер тилкесин казактарга ижарага берүү маселесин караган соң кабыл алды.

Мамлекеттик мүлк министри Турсун Турдумамбетов жерди ижарага берүү боюнча кыргыз-казак өкмөтү ортосундагы келишим тууралуу депутаттарга маалымат берди. Башында эле белгилүү болгондой, казак тарапка жер 49 жылга берилет. Мурда коңшулар жер салыгын жана башка салыктарды төлөп келишсе, эми ижара акысын да төлөшөт. Казактар 1 гектар жерге жылына 24 миң сом төлөшөт. Ижарага баш-аягы 58,8 гектар жер берилмекчи.

Өзбекстан 1992-жылы Ысык-Көлдөн 15 жылга ижарага берилген “Алтын Кум”, “Рохат”, “Дилорам” жана “Ташсельмаш” пансионаттарын менчикке алуу талабын коюп жаткандыгы тууралуу маалымат тарады.

Эгемендүүлүктүн алгачкы жылдарында Мамлекеттик мүлк агенттигин жетектеп турган Эсенгул Өмүралиевдин айтымында, Ысык-Көлдөгү 4 пансионат Өзбекстанга 15 жылга ижарага берилген. Алар: “Алтын Кум”, “Рохат”, “Дилорам” жана “Ташсельмаш” пансионаттары. Ижаранын мөөнөтү бүтүп, эс алуу жайлары кайрадан Кыргызстандын менчигине өтөрдө өзбек туугандар пансионаттарды менчигине жана алар турган жерди 49 жылга ижарага берүү талабын коюп жатышкан имиш. 2008-жылы казак элине 4 пансионатты бердик эле. Эми өзбектерге «хоп» дейбизби же «жок» дейбизби, бул иш Жогорку Кеңештин колунда.

19-январда “жогорку окуу жайлардагы аскердик факультеттер жана кафедралар жоюлду” деп билдирди Коргоо министринин биринчи орун басары Марат Кенжесариев.

Анын айтымында, аскер кафедраларынын жоюлушу бүтүрүүчүлөрдүн саны армиянын керектөөсүнөн бир кыйла көп экендиги менен байланыштуу. “Мындай иш президент Курманбек Бакиевдин Куралдуу күчтөрдү реформалоо боюнча концепциясына ылайык жүргүзүлүүдө. Эми студенттер ЖОЖдорду бүтүргөндөн кийин аскердик билет алыш үчүн 12 миң сом төлөп, аскердик бөлүктөрдө 1 ай окушмакчы. Ал эми офицер болуу үчүн 24 миң сом төлөп, эки ай окуусу керек”,- деп кошумчалады ал.

Украинада 17-январда болуп өткөн президенттик шайлоонун жыйынтыгында 18 талапкердин ичинен көп добуш топтогон Ю.Тимошенко жана В.Янукович экинчи турга чыгышты.

17-январда Украинада президенттик шайлоо болуп өттү. Расмий бийлик шайлоодо одоно мыйзам бузуулар болбогонун айтса, талапкерлер мындай пикирди колдошкон жок. Шайлоонун жыйынтыгында Региондор партиясынын лидери Виктор Янукович жалпы добуштун 34,7 пайызын ээлеп, ал эми учурдагы өкмөт башчы Юлия Тимошенко 27,2 пайыз добуш алып, экинчи турга чыгышты. Президенттик ат салышуунун экинчи туру февраль айынын жетисинде өтмөкчү.

Гаити мамлекетинде күчү 5-7 баллга жеткен жер титирөө болгондугу тууралуу маалымат дүйнө элин дүрбөлөңгө салды. Анткени зилзаланын курмандыктарынын саны 2 миллионго жетиши мүмкүндүгү тууралуу маалыматтар бар.

13-январь күнү болгон жер титирөө Гаити мамлекетин болуп көрбөгөндөй кыйроого дуушар кылды. Кырсыктан Гаитинин борбору Порт-о-Пренс толугу менен кыйрап, 9 миллионго чукул калк жашаган бул мамлекетте канча адам жабыр тарткандыгын бүгүнкү күнгө чейин так аныктоо мүмкүн болбой жатат. Расмий маалыматтарга таянсак, каза болгондордун саны 200 миңден ашты. Бирок набыт болгон жарандардын саны 2 миллиондон ашып түшүшү мүмкүн. Табият кырсыгынан өлкөнүн ак сарайы да кыйроого учураган.

Айбек Кочкоров, Амантур Султанкулов
politika@super.kg