БИШКЕКТЕ МИЛИЦИЯ КЫЗМАТКЕРИН АТЫП КЕТИШТИ. Маркумдун атасы: «УУЛУМДУ КАЛБЫР КЫЛЫП САЛЫШЫПТЫР»

19-ноябрда Бишкек шаарынын 8-кичирайонунда милиция кызматкери белгисиз жарандар тарабынан атып өлтүрүлдү. Маркум болгону 26 жашта болгон. Аймактык милиция кызматкерин атып өлтүрүүгө эмне себеп болду, окуя тууралуу иликтөө төмөндө.

«ШЕКТҮҮЛӨР ТАБЫЛА ЭЛЕК»
Маркум Актилек Абдубалиев кызмат кылган Бишкек шаардык Октябрь РИИБинин башчысынын орун басары Канатбек Досов 18-ноябрь күнү «Ууру» аттуу операция башталып, аймактык тескөөчүлөргө тапшырма берилгенин айтат.
– Бишкек шаарынын 8-кичирайонунун жашоочулары бир нече ирет бизге кайрылып, «2 велосипед ар кайсы үйдүн алдында, ар башка подъездде туруп калып жатат. Бирок алардын ээлерин көрбөйбүз, текшерип бергиле» дешкен.
19-ноябрда Актилек Абдубалиев өзүнө бөлүнгөн аймакты кыдырып жүрсө, 38-үйдүн жанынан велосипед тээп алган, рюкзак асынган 2 жаш жигит чыгып калат. Бирөөнү кармап, ордунан жылбай туруусун буйруп, кесиптешине телефон чалып чакырат. Бул учурда экинчиси келип тапанча менен 5-6 ирет атып жиберген. Ал окуя болгон жерден каза болду. Кылмышка шектүүлөр ошол жерден из жашырып кетишкен.
Ошол эле күнү окуя боюнча ыкчам топ шектүү делген жарандарга таандык 2 велосипедди шаардын 7-кичирайонунан табышты. Бул боюнча «укук коргоо кызматкеринин өмүрүнө кол салуу» беренеси боюнча кылмыш иши козголуп, кылмышкерлерди издөө иштери жүрүп жатат. Эгер көргөн-билгендер шектүүлөрдүн кайда экендиги тууралуу маалымат беришсе, ИИМ 1 миллион сом сыйлык ыйгарарын жарыялады. Анонимдүүлүккө кепилдик берилет.
ИИМдин басма сөз кызматынан билдиришкендей, маркумдун үй-бүлөсүнө кесиптештери тарабынан жалпы 800 миӊ сомдой жардам көрсөтүлгөн. Ошондой эле президенттин фондунан 100 миӊ сом каражат бөлүндү.

«БАЛАМДЫ ҮЙЛӨНТӨЙҮН ДЕП ЖАТКАМ»
Актилек Абдубалиевдин атасы Асан Исабаев «уулумду дасыккан кылмышкерлер эле аткан» деген пикирде.
– Актилек балдарымдын эӊ улуусу болчу. 21-ноябрда акыркы сапарга узаттым. Ким эле уулун жерге берип калам деп ойлосун? Тескерисинче, качан келинчек алып келип кубантат деп күтүп жүргөм. Болбосо жыл жаӊырганда дароо үйлөнтүп салууну ойлонуп жатканбыз. Актилек 1989-жылы туулган. Кызмат жолун 2012-жылы Ош ОИИБинде баштап, Бишкекке которулганына 7 ай болгон. Ишине так, мээнеткеч, бизге кол кабыш кылам деп жаны тынчу эмес. Жалал-Абадга, үйгө май айында келип кеткен. Акыркы жолу көргөнүбүз ошол болду.
Баламды Макаров тапанчасы менен калбыр кылып аткылап салышыптыр. Жерге жыгылганда өлүү-тирүүсүн текшерип, башка дагы эки ирет атышыптыр, акмактар. Булар профессионал кылмышкерлер болгон деп ойлойм. Өздөрү шектүү немелер болсо, курал алып жүрүшсө, анан эмдигиче колго түшө элек болушса, демек, коркунучтуу эле кылмышкерлер да. Алар башка жарандарга зыян келтирбейт деп эч ким кепилдик бербейт.
Бала 40ка чыкса да, ата-эне үчүн бала бойдон калат. Мен наристемден айрылдым. Он гүлүнүн бири ачыла элек, турмуштун ширесин тата элек болчу. Ал таптаза боюнча бизди таштап кетти. Артында иниси, карындашы жана апасы болуп сыздап кала бердик.

«МУУЗДАП, ӨРТТӨП КӨМҮП САЛГАН УЧУРЛАР БОЛОТ»
ИИМдин басма сөз кызматынын кызматкери Эрнис Осмонбаев «милиция кызматкерлеринин өмүрүнүн ар бир мүнөтү кылдын кырында турат. Бирок бул көрүнүштү эч ким этибарга албайт жана баалай бербейт» дейт.
– Коомдогу коопсуздук, тынчтык, тартипти милиция кызматкерлери жөнгө салып турат. Бирок алардын эмгегин баалай билип, ылайыгы келсе жардам бере койгон адамдар өтө аз. Кайсыл бир себептерден улам милицияга болгон элдин ишеними солгундап кетти. Бирок милициясыз коомдо ири башаламандык жараларын баары эле этибарга ала бербейт.
Иш учурунда көз жумган кызматкерлердин дээрлик бардыгы кылмышкерлер тарабынан каза табышат. Кесиптештерибизди ырайымсыздык менен өлтүргөн фактылар кагаздан мурун жадыбызда сакталуу. Милицияга тиш кайрап калган кылмышкерлер аларды атып, бычактап, башын жанчып, мууздап, тирүүлөй өрттөп өзгөчө мыкаачылык менен өлтүрүп, көмүп да кеткендери бар. Өздөрү укук коргоо кызматында эмгектенишкени менен, өздөрүнүн укуктары корголбой калган жагдайлар четтен чыгат.

Гүлжан Асанкожоева
koom@super.kg

 Кыстарылган видео