БИР БҮРКҮМ

«КАРАКОЛ» ТОО-ЛЫЖА БАЗАСЫ КМШ мамлекеттериндеги мыкты 5 кышкы курорттун катарын толуктады. Бул рейтингди travel.ru туристтик кызматы жана Forbes.ru журналы биргеликте аныктаган.
Каржы министрлиги 228 миӊ сомго 2 ПЛАНШЕТ жана 284 миӊ сомго 10 кресло сатып алуу аракетин токтотту. Мындай маалымат Мамлекеттик сатып алуулар порталына жарыяланды.
Нарын шаары боюнча 105 адам КУРГАК УЧУК илдети менен расмий каттоодо болсо, анын ичинен 21и быйыл жаӊы аныкталгандар.
НИКЕНИ КАТТОО аземин Бишкектеги Бакыт өргөөсүндө өткөрүүнүн баасы 1732 сом деп бекитилди.
Өзгөн районунда ЖАӉЫ ЖЫЛДЫК БАЛАТЫ орнотулбайт. Ага коротулуучу каражат жер титирөөдөн жабыркагандарга жумшалмакчы.
«Манас» аэропортунда Түркиядан учуп келген МЫЙЗАМДАГЫ УУРУ, Сакал каймана аты бар Улан Токтосунов кармалып, СИЗОго камакка алынды.
Улуттук статистика комитетинин маалыматына ылайык, 1990-жылы өлкөдө 73 795 АБОРТ катталса, 2000-жылы 21 675, 2014-жылы 24 456 аборт жасалган.
Кыргызстандан СИРИЯГА согушка катышуу үчүн 72 өспүрүм кеткен.
Кыргызстандык УЮШКАН КЫЛМЫШТУУ ТОПТУН 6 өкүлү Бириккен Араб Эмираттарында акча алмаштыруучу жайды тоноп, 190 миӊ доллар алып кетишкен деп шектелип кармалышты.
Буга чейин үзгүлтүккө учураган Бишкек-Жалал-Абад-Бишкек АВИАКАТТАМЫ 28-декабрдан тарта жаӊыланат.
Депутат Дастан Бекешев Жогорку Кеӊеште Транспорт жана коммуникация министрлигинин жана Өзгөчө кырдаалдар министрлигинин кызматкерлери компьютер менен иштөөдөгү зыяндуулук үчүн айлыгына КОШУМЧА АКЫ алып жатканын сынга алды.
Билим берүү министрлигинин маалыматына ылайык, окуучулардын КЫШКЫ КАНИКУЛУ 25 күн болот.
23 –декабрда Түркия президенти РЕЖЕП ТАЙИП ЭРДОГАНДЫН уулу Билал Эрдоган Бишкекте 2016-жылдын сентябрында өтүүчү Экинчи Дүйнөлүк көчмөндөр оюндарынын презентациясына келип катышты. Билал Эрдоган Дүйнөлүк этно оюндар конфедерациясынын президенти.

Мирлан Өмүралиев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 686, 25-декабрь-31-декабрь, 2015-ж