ДААРАТКАНАГА ТАШТАЛГАН ЫМЫРКАЙДЫ ЭНЕСИНЕ КАЙТАРЫШТЫ

Өткөн аптада Жалал-Абад облусунун Токтогул районундагы Токтогул шаарында үрөй учурган окуя катталды. Тагыраак айтканда, аталган шаардагы Токтогул көчөсүндө жайгашкан көп кабаттуу үйлөрдүн биринин жалпы дааратканасына «күкүк эне» жаӊы төрөлгөн ымыркайын таштап салган.

«ЖЕРГИЛИКТҮҮ ТУРГУНДАР БИЛДИРИШТИ»
Биз жогорудагы окуя тууралуу маалымат алуу үчүн алгач Токтогул райондук Өзгөчө кырдаалдар министрлигинин №97-өрт куткаруу бөлүмүнүн жетекчисинин орун басары Шайлоо Раев менен байланышып, төмөнкүдөй маалымат алдык:
– Жергиликтүү тургундар бул тууралуу 27-январда Өзгөчө кырдаалдар министрлигинин 112 кызматына телефон аркылуу маалымдашкан. Окуя болгон жерге биздин кызматкерлер барышып, жергиликтүү тургундардын көмөгү менен ымыркайды куткарып, «Тез жардам» кызматынын дарыгерлерине тапшырып бердик. Ошондой эле Токтогул РИИБинин кызматкерлери да барып, өздөрүнө тиешелүү иштерин аткарышты.

«БАЛАНЫН ҮНҮН УГУП КОРКУП КЕТТИМ»
Андан соӊ окуяга алгачкылардан болуп күбө болгон 21 жаштагы Майрам Эргешованын оозунан окуянын чоо-жайын уктук:
– Ошол күнү биздин үйгө коноктор келишкен. Кечинде конок кыздар жана сиӊдилерим менен кичинекей балдарды ойноткону сыртка чыкканбыз. Эшикте кар жаап жаткан. Болжол менен кечки саат 9:30дар чамасында биз жашаган көп кабаттуу үйдүн сыртта жайгашкан жалпы дааратканасына бардым. Даараткананын ичине киргенде эле бир үн угулду. Ичи караӊгы болчу, коркуп кеттим. Алгач мышыкпы деп ойлосом мышыктын үнүнө окшобойт, башкача угулду. Жакшылап тыӊшасам баланын үнү экен. Эшикке чыксам Мамыр деген коӊшу байке бир жактан келип машинасын токтотуп жаткан экен. Ага айтсам, ал чуркап келип көрдү да, мага «Тез жардамга» чал» деди. Мен «Тез жардамга» жана куткаруу кызматына телефон чалып окуя тууралуу кабарладым. Алар көп узабай келип калышты. Милиция кызматкерлерине да чалганбыз, алар башында албай коюшкан. Акыры кечигип келишти.
Даараткананын тешиги кичинекей жана темирден экен. Куткаруучулар түшөйүн дешсе, батпай коюшту. Темирди жыгач кесүүчү араа менен кесүүгө аракет кылышты, бирок болгон жок. Анан Асанкул Жапар уулу деген 25 жаштагы арык бир коӊшубуз даараткананын ичине түшүп ымыркайды алып чыкты.
Баланын жашай турган күнү бар экен. Аны куткарып калганыма сүйүнүп отурам. Баланы бизге жакын жерде жашаган Айпери деген кыз таштап кеткенин айтып жатышат. Айперини сыртынан таанычумун, апасы менен батирде турат. Буга чейин да күйөөгө тийбей төрөп алган, ал баласы 1 жаштан ашып калды.

«ЫМЫРКАЙДЫ ТӨРӨГӨН АЯЛ ЖАШЫРЫНЫП ЖАТКАН ЖЕРИНЕН КАРМАЛДЫ»
Жалал-Абад ОИИБинин басма сөз кызматынын кызматкери Мыктыбек Турдубеков окуя тууралуу төмөнкүлөрдү билдирди:
– Токтогул РИИБинин милиция кызматкерлери тарабынан ыкчам иликтөө иш-аракеттери жүргүзүлүп, наристени төрөп, таштап кеткен аялдын ким экендиги аныкталды. Ал Токтогул шаарындагы көп кабаттуу үйлөрдүн биринде жашырынып жаткан жеринен колго түштү. Кармалган учурда шектүүнүн абалы начар болгондуктан «Тез жардам» чакырылып, Токтогул аймактык ооруканасына жеткирилген. Ал 1992-жылы туулган Токтогул районунун тургуну. Мурда соттолгон эмес, билими орто, эч жерде иштебейт. Турмушка чыгып ажырашкан экен. Алгач «дааратканага барган учурда толгоом келип төрөп салдым» деп көрсөтмө берген, бирок иликтөө учурунда баласын атайылап таштаганы белгилүү болду. Анын таштап кеткен ымыркайдан тышкары 1 жаштагы баласы бар экендиги аныкталды. Наристенин салмагы 2 килограмм 535 грамм, бою 47 сантиметр болуп төрөлгөн. Учурда абалы канааттандырарлык. Ага Марс деген ысым коюлуп, күбөлүк берилгенин дарыгерлер айтышты. Токтогул РИИБинин тергөө бөлүмү тарабынан Кылмыш-жаза кодексинин «жаӊы төрөлгөн баланын өмүрүнө кол салуу» беренеси менен кылмыш иши козголуп, тергөө амалдары жүрүүдө.

«ЫМЫРКАЙ КОМИССИЯНЫН ЧЕЧИМИ МЕНЕН АПАСЫНДА КАЛАТ»
Учурда бул окуяга байланыштуу коомчулукта «ымыркайды таштаган энени энелик укуктан ажыратуу керек» деген пикирлер басымдуу. Биз Эмгек жана социалдык өнүктүрүү министрлигинин Үй-бүлөнү жана балдарды коргоо башкармалыгынын жетекчиси Жаӊыл Жумабаевага кайрылганыбызда, ал буларга токтолду:
– Ымыркайдын энеси дарылануу үчүн төрөт үйүнө жаткырылган жана ал баласын 3-4 күндөн бери эмизип жатат. Баланын абалы жакшы болгондуктан дарыгерлер аны үйгө алып чыгууга болорун билдиришкен. Жогорудагы окуя боюнча атайын комиссия түзүлүп, алар баланы энесинде калтыруу чечимин чыгарышты. Бирок эне-бала ар дайым социалдык кызматкерлердин көзөмөлүндө болот. Биз ымыркай балдар үйүндө эмес, өз энесинин жанында болуусун каалайбыз. Бул окуяда кылмыш иши барбы же жокпу аны тергөөчү тергеп, сот чечимин чыгарат. Эгерде сот энесин күнөөлүү деп таап, камакка алса, анда биз баланы туугандарына калтыруунун аракетин кылабыз.
Чынында, эне менен бала бири-биринен ажырабастан, бирге жашаганы оӊ. Бирок эне болуу үчүн баланы төрөп эле коюу жетиштүү эмес. Ага мээримин төгүп, ак сүтү менен тарбиясын берген аялзаты гана «эне» деген ыйык сөзгө татыктуу. Ал эми өз канынан жаралган баласына ажал тилеп дааратканага таштап кеткен «күкүк эне» оӊолобу же мындан да үрөй учурган кадамдарга барабы, айтыш оор...

Асхат Субанбекев
koom@super.kg