«ПАТРИОТТОРДУН» ЖОРУГУН ДҮЙНӨЛҮК БАСЫЛМАЛАР ТАЛКУУЛАЙ БАШТАШТЫ

15-февралда Орусияда өздөрүн "патриот" деп эсептегендер эки кыргыз кызын "башка улуттун жигиттери менен көңүл ачып жүрөсүңөр" деп кармап, сөгүп-булкуп cуракка алып, видеону интернетке таратып жиберишкени тууралуу жазганбыз. ИИМдин Москвадагы өкүлчүлүгү бул окуя боюнча 3 жигит кармалып, Москва полициясына өткөрүлүп берилгенин маалымдады. «Патриоттордун» көрсөтмө берген маалынан видео тартып таратышты.
Кыздардын бири: "Ал кафеден чыгып таксиге баратсак балдардын бири "Чоң кыз, жакшынакай эле кыз экенсиң. Кел, мен видеону өчүрөм, сен бизди мейманканага алып барып тейлейсиң, 50 миң рубль бересиң" деп айтты. Мен алар менен мейманканага барып жатышым керек экен",- деп көрсөтмө берген.
Кармалган балдардын бири сурак учурунда: "Эми мындай иш кылбайм. Бүткүл кыргыз элинин алдында кечирим сурайм",- деп жооп берген. Экинчиси кыргыз жигиттерин мындай ишке барбоого чакырды. Маалым болгондой, кармалгандардын бири короо шыпыргыч, экөө жүк ташуучу болуп иштечү.
ИИМ тараткан тасмада жабырлануучу кыздын жүзү ачык, кылмышка шектүүлөрдүн жүздөрү жаап салынган. Эмнеге деген суроо келип чыгат. Псевдопатриоттор кыздардын жүзүн ачык тартышып, ал эле эмес, атын, фамилиясын, атасынын, энесинин атын, айылынан бери айттырып дүйнөлүк желеге жарыялап жатышпайбы?
Мындан мурун да 20 жаштагы өз мекендешин зордуктап, өзүн "патриот" атаган дагы бир кыргызстандыктын кармалганы маалым болгон эле. Ал иштер кандай жылып жатат? Бул боюнча ИИМдин Москвадагы өкүлү Аскат Алиевге кайрылдык: «Кыздардын арызы каралып жатат. Бардыгы иликтенет. Мындан мурун 20 жаштагы кызды зордуктап, өзүн "патриот" атаган бала боюнча тергөө бүтүп, сотко өткөрүлгөн. Жакынкы күндө сот процесси башталат. Кыздарды ур-тепкиге алган балдарды издөө иштери тынбай эле жүрүп жатат. Жай айында Екатеринбургда сабалган баткендик кыз боюнча да эки бала кармалган. Башкача айтканда, тиги кыз балдарды тааныган, кийин кайра "алар эмес болчу" деп көрсөтмө берди. Кыздын психикалык жактан жабыркаганынан улам ал иш токтоп турат»,- дейт.
Дүйнөлүк ММКларда аталган окуя талкууга алынып баштады. "Eurasianet" басылмасы "Кыргызстан: Өздөрүн абийирдин коргоочусу атагандардын аракеттери жазасыз калууда" деген макала жарыялады. Анда аталган маселенин күнгөй-тескейи иликтенет. Ошондой эле жыйынтыктоочу сөздө: «ИИМдин Москвадагы өкүлчүлүгүнүн башчысы Аскат Алиевдин Facebook баракчасына чыгарган билдирүүсү мындай иштер менен күрөшүүгө кыргыз бийлигинин даярдыгы боюнча суроо жаратты. Алиев "патриоттордун" аракетин сындоо менен бирге "кыргыз аялдарынын заманбап жашоо стилине" өкүнөрүн билдирди",- деп жазды.

Мирлан Өмүралиев
politika@super.kg