БИР БҮРКҮМ

ҮЛПӨТ ТОЙДО унаадан белине чейин чыгып алгандарга жана мыйзамсыз автожарышты уюштургандарга 3-5 миң сомдук айып салынат. Ошондой эле «автошылуундук" беренеси боюнча иш козголот. Бул тууралуу Жол-кайгуул кызматынан билдиришти.
«Жыл сайын өлкөдө 165 миңдин тегерегинде ЫМЫРКАЙ төрөлөт, анын ичинен 30 миңи никесиз жарыкка келгендер. 12 миңге чукул жаш балдарды жалгыз бой энелер төрөшөт»,- дейт Мамлекеттик каттоо кызматынын өкүлү Гүлжамал Алиева.
Бишкекте БАК-ДАРАКТАРДЫН 70 пайызы авариялык коркунучту жаратат. 2014-жылы дарактардын тең жарымы гана сугарылып турган. Бул тууралуу «Зеленстрой» муниципалдык ишканасынын башчысы Анвар Атантаев айтты.
Түркиянын Стамбул шаарында башкы консул болуп иштеп келген РЕНАТ ТУЛЕБЕРДИЕВ президенттин жана өкмөттүн иш башкармалыгынын биринчи орун басары болуп дайындалды.
Коргоо иштери боюнча мамкомитет Кыргыз мамлекеттик медициналык академиясынан тышкары бардык ЖОЖдордогу АСКЕРДИК КАФЕДРАЛАРДЫ жоюуну сунуштап жатат. Тиешелүү мыйзам долбоору Жогорку Кеңеште каттоого алынды. 2011-жылы бир катар аскердик кафедралар кыскартылган, бирок кафедраларда кызмат өтөгөн жигиттердин саны азайган эмес.
МАЙРАМДАРГА КАРАТА 7-март жана 6-май эс алуу болуп, ал эми 5-март жана 2-май иш күндөрү болот. Бул график 5 күндүк тартипте иштегендерге тиешелүү.
«Кыргызстан Казакстандан 169 доллар турган жогору экспорттук салыктан улам күйүүчү май сатып ала албайт»,- деди Кыргызстандагы Нефтетрейдерлер ассоциациясынын аткаруучу директору Улан Кулов.
Айыл чарба жана мелиорация министри Турдуназир Бекбоевдин айтымында, быйыл жай мезгили кургакчыл болот.
Өлкөдөгү мектептерге 870тен ашуун мугалим жетишпейт. Башталгыч класстардын эже-агайлары, орус тили, физика, математика жана информатика сабактарын берүүчү мугалимдер тартыш. Бул тууралуу билим берүү жана илим министри Эльвира Сариева айтты.
Куралдуу күчтөр башкы штабынын маалыматы боюнча, азыркы тапта ата-энеси түрдүү мамлекеттик кызматта иштеген 100дөй ЖООКЕР аскер кызматын өтөп жатат. Алардын арасында президент Алмазбек Атамбаевдин, экс-мэр Кубанычбек Кулматовдун жана экс-депутат Камчыбек Ташиевдин уулу бар.

Мирлан Өмүралиев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 696, 4-март-10-март, 2016-ж