БИР БҮРКҮМ

1-июнда Мамлекеттик каттоо кызматынын алдындагы "Инфоком" мамлекеттик ишканасы жаңы УНАА НОМЕРЛЕРИН бере баштады.
2015-жылы Кыргызстанда 1179 ЭГИЗ жана 15 үч эм балдар төрөлгөн. Бул боюнча Мамлекеттик статистикалык комитет маалымдайт.
Бишкек шаарынын Октябрь районунун акиминин милдетин аткаруучу болуп НУРБЕК КУРМАНБЕКОВ дайындалды.
Кыргызстанда 13 жаштан 18 жашка чейинки ар бир сегизинчи бала ТАМЕКИ ЧЕГИП көргөн же чегет. Бул тууралуу Бүткүл дүйнөлүк саламаттыкты сактоо уюмунун өкүлү Ярно Хабихт маалымат жыйында билдирди.
Кыргызстандан СИРИЯДАГЫ согушка ата-энеси менен кошулуп 100дөн ашуун бала кеткен. Бул тууралуу Ички иштер министрлиги кабарлады.
"The Walk Free Foundation" укук коргоо уюмунун маалыматына ылайык, Орусияда 1,5 миллион адам КУЛЧУЛУКТА жүрөт. Алардын көбү Кыргызстан, Тажикстан, Өзбекстан, Түндүк Корея жана Украинанын жарандары.
АДАМКУЛ ЖУНУСОВ Евразия экономикалык комиссиясынын энергетика жана инфраструктура боюнча министри болуп дайындалды. Ал 2016-жылдын апрель айына чейин Кыргыз Республикасынын Бажы кызматын башкарып келген.
КЫТАЙДА ОКУУГА 5 бюджеттик орунга конкурс жарыяланат. Конкурс 20-июнда Ош шаарында өтөт. Аталган сынакты "Патриот KG" коомдук бирикмеси жана "Феникс" билим берүү борбору Кыргызстандын Кытайдагы элчилигинин колдоосу менен ишке ашырууда.
Быйыл Орусияга кыргыз жеринен барган ЭМГЕК МИГРАНТТАРЫНЫН саны 41 пайызга азайган. Мындай көрүнүш рубль өз наркын жоготуп койгонуна байланыштуу экенин орусиялык басылмалар жазып чыгышты.
ЭЛДАР АБАКИРОВ экономика министринин орун басары болуп дайындалды. Ал 2015-жылкы парламенттик шайлоодо КСДПдан депутаттыкка талапкер болуп чыккан.
Акыркы 4 жыл ичинде Кыргызстанда 577 836 жаранга АЙДООЧУЛУК КҮБӨЛҮК берилген. Бул тууралуу Мамлекеттик монополияга каршы жөнгө салуу мамлекеттик агенттигинин башчысынын орун басары Кеңешбай Тайлаков билдирди.
2010-жылдан тарта Кытайда кармалган кыргызстандыктардын үчөө ӨЛҮМ ЖАЗАСЫНА тартылган. Алардын экөө адам өлтүргөн деген айып менен, бири баңгизатына байланыштуу кылмыш иштери менен күнөөлүү деп табылган.

Мирлан Өмүралиев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 709, 03-июнь-09-июнь, 2016-ж