ЖИГИТТЕР, ЧАПКЫЛА!

Бойдоктор парады

Ай чырайы келишкен, оймок ооз, кымча бел, каш-кирпиги төгүлгөн кыздары сулуу кыргыздын... Ошонун сыңары бийчи десеңиз бийчи, ырчы десеңиз ырчы, айтор, жигиттер издеген бийкечтерди тизмелеп чыктык. Бойдок жигиттер барсыңарбы? Анда чапкыла!

АЙПЕРИ КАЛЫКОВА мөмө-жемиштерди укмуш жакшы көрөт

Туулган жери – Жалал-Абад шаары
Жашы – 18де

“Айпери ырчы жигит Акбар менен сүйлөшөт экен” деген имиштерге көңүл бурбай койсоңуз болот. Анткени биз тактап көргөнбүз. Алар жөн гана сахналаш ага-карындаштар. Бешенеңизге Айперини жазып койсо анда сыр, майдан куру калдым дей бериңиз. Башкача айтканда, Айка сырды, майды анча жактыра бербейт. Жер үйдө жашагандыктан, бардык иштин майын чыгара жасайт. Кыс­касы, Кубик Калыковдун күйөө баласы болуш оңой эмес.

НУРЗАДА ЖОЛДОШОВА
өзбек ырчысы Шахзодага окшош

Туулган жери – Аксы району Кош-Дөбө айылы
Жашы – 23тө

Ди-джей, ырчы, телеалпаруучу Нурзада идеалындагы мырзаны таба элек. Андыктан ак боз атчан жигиттер кыпкызыл гүлүңүз менен даяр туруңуз. Буйрук болуп үйлөнүп калсаңыз, Нурзада күн сайын өз колу менен түрдүү тамактарды жасап берип кубантат. Кийимдин түрүн алам деп чыр да салбайт, болгону, сапаттуусун тандайт. Бирок кыргыздын салты деп калыңына тогуздап мал берип, көпкө түшүп каласыз. Кыскасы, Нурзада кайын журтун сыйлап, абысындары менен урушпай, үй-бүлөлүк мыйзамга баш ийген ийкемдүү келин болот.

РОЗА ИБРАИМОВАнын көшөгөсү, шырдагы даяр

Туулган жери – Кочкор району Оро-Башы айылы
Жашы – 22де

«СуперТV» телеканалынын, «Браво» телеберүүсүнүн көркүн ачкан телеалпаруучу Роза сулууга ашык болгондор үчүн керектүү маалымат: Розаны жигиттердин жерлиги кызыктырбайт. Бойлуу, интеллектуалдык деңгээли жогору, кыргыздын жайдары жигитинин жубайы болууга даяр. Ал үчүн сиз Розага өзүн белек кылыңыз. Өзүн десек түшүнбөй калып жүрбөңүз. Жыпар жыттуу роза гүлүн. Бирок кафеге чакырып, лагман алып бере көрбөңүз. Себеби Роза лагманды чойгонду да, чуурутуп жегенди да жактыра бербейт. Баса, чоң энеси уз болгондуктан, улуттук колориттеги себи дапдаяр. Ди-джейдин сүйүктүү жолдошу болуп калсаңыз, “что за бардак?” дегенин укпайын десеңиз, тыкан болуңуз.

БЕГИМАЙ ЭСЕНГУЛОВА бир үйдүн жалгыз кызы

Туулган жери – Бишкек шаары
Жашы – 18де

Апасы Бегимайды бардык жумушка бышырган. Ак жуумалынан келген, бою узун, тамашакөй жигиттер бул бийкечтин табитиндегилер. Материалдык байлыгын айтсак, Бишкекте бир бөлмөлүү үйү бар. Кыскасы, Бегимайга бактыңыз буюруп калса, үйүңүздөн конок үзүлбөйт. Анткени ырчы кыз салаттын түрлөрүн жасап, конок күткөндү жактырат. Жерлиги таластык. Билесиңер, Таласта калыңды канча сураарын? Ошондуктан көз арткан жигиттер, капчыгыңарды кампайтып, калыңды камдай берсеңер болот.

НАЗИК ИСРАИЛОВАга ичкен жигиттер жакпайт

Туулган жери – Нарын шаары
Жашы – Жашыруун

Чимириле бийлеген Назикти байлык-бийлик кызыктырбайт. Эң негизгиси, чечкиндүү, сөзүнө турган, аялзатын сыйлай билген чыныгы мырза болсо болду. Назиктин болочок кайненесине жыргал. Анткени бийчи кыздын “кайненем менен бат тил табышып, курбуга айлантып алам” деген ою бар. Анан да кымбат үлпөт көйнөк алам деп башыңызды оорутпайсыз. Назиктин жеке үйлөнүү-үлпөт салону бар экени эсиңизден чыкпасын. Кыскасы, мырзалар, чамдагыла, Назиктин колун сурагандар көп.

САЙКАЛ САДЫБАКАСОВАны сүйгөндөр алты жыл чыдагыла

Туулган жери – Ош шаары
Жашы – 17де

Алты жыл чыдагыла деген себебим “Кыз-Бурактын” кыздары 23кө чыкканда гана жигит менен сүйлөшүшөт. Андыктан азырынча Сайкал жөнүндө маалымат топтоп, жакындан болбосо да, алыстан көз салып жүргөнгө эмнеге болбосун? Ал үчүн Сайкалга Сникерс алып берип, достошуп көңүлүн алганыңыз оң. Ал эми той жөнүндө Сайкалга угуза көрбөгүлө. Биринчиден, жогорудагы мыйзамды бузасыз. Экинчиден, өзүнөн улуу, турмушка чыга элек эжекелери бар. Бул сулуунун үнүнө гана эмес, өзүнө арбалган кытай улутундагы күйөрман бар экенин укканыбыз бар. “Алты жыл күтүү кыйын” деп Кытайга алдырып жибербегиле, жигиттер.

“Кыргыздын уучу куру эмес” дегендей, сулуу, бойдок, аты белгилүү кыздарыбыз көп. Биздин тизмеге илинбей калган бийкечтер да, жолдошу болсом деп кыялданган жигиттер да таарынбасын. Анткени «Бойдоктор парады» дагы уланат.

Бурул Исмаилова
star@super.kg
Сүрөттөр «Супер-Инфонун» архивинен алынды.