ӨКМӨТТҮН ТҮЗҮМҮ ӨЗГӨРДҮ

Өкмөт башчы Сооронбай Жээнбеков өкмөттүн түзүмүн өзгөртүү боюнча демилге көтөрүп, Жогорку Кеңеш аны колдоп берди. Жаңы түзүм кошумча чыгымдарга алып келбеси айтылды. Өкмөттүн түзүмү төмөндөгүдөй болуп өзгөрдү:
– Геология жана минералдык ресурстар боюнча мамлекеттик агенттиктин базасында Мамлекеттик өнөр жай, энергетика жана жер казынасын пайдалануу комитетин түзүү;
– Мамлекеттик байланыш агенттиги жана өкмөткө караштуу Электрондук башкаруу борборунун базасында Мамлекеттик маалыматтык технологиялар жана байланыш комитетин түзүү;
Ошондой эле Айыл чарба жана мелиорация министрлиги – Айыл чарба, тамак-аш өнөр жайы жана мелиорация министрлиги, ал эми Транспорт жана коммуникация министрлиги – Транспорт жана жолдор министрлиги болуп кайрадан түзүлгөнү жатат.
Мындан тышкары депутаттардын сунушу менен коопсуздук маселелери боюнча вице-премьер-министр кызматы түзүлмөкчү.
23-июнда президент Алмазбек Атамбаев транспорт жана коммуникация министри Замирбек Айдаров жана Айыл чарба жана мелиорация министрлигин жетектеген Турдуназир Бекбоевди кызматтарынан бошотуп, аларды Жогорку Кеңештин колдоосуна алынгыча жаңы түзүлгөн министрликтердин жетекчилеринин милдетин аткаруучу кылып дайындады.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 712, 24-июнь-30-июнь, 2016-ж