ЫРЧЫНЫН ЖОЛДОШУ 15 ЖЫЛДАН БЕРИ ТӨШӨКТӨ

Акылбек Акматалиев мындан 15 жыл мурун кырсыктап, омурткаларынан жаракат алган. Учурда 53 жашта. Кырсыктан улам белинен ылдыйкы бөлүгү шал болуп, 2 буту баспай калган. Келинчеги Замира Тайлакова жолдошун жонуна көтөрүп, турмуштун арабасын жалгыз өзү сүйрөйт. Жубайлардын бири-бирине болгон сыйы, махабаты, аруу сезимдери эрксизден көзгө жаш алдырып, тагдырын сиздерге жарыялоого түрткү берди.

"ОМУРТКАМ СЫНЫП, ЖҮЛҮНДҮ КЫСЫП КАЛЫПТЫР"

– Үй-бүлөмдү багайын деп Бишкек шаарындагы азыркы Жусуп Баласагын атындагы Улуттук университетке жумушка кирдим. Кесибим боюнча электрикмин. Мен кырсыктаган 2002-жылы кызыбыз 1 жарым жашта болчу. Досторумдун бири университеттин жер төлөсүнө машыгуучу зал ачып, ичи ным тарта бергендиктен шамалдап туруучу жабдык коюп бер деген. Аны орнотуп, кирип-чыккандарды көзөмөлдөп турчумун. Ошол күнү түштөнүү учуру болчу. №9-жатаканада үй-бүлөм менен жашачумун. Замира кызымды көтөрүп, терезеден тамактанууга чакырып калды. Мен залды дагы бир карап коёюн деп жер төлөгө кирип кеттим. Ошол жерден тепкичти жаза басып алып эле кыр аркам менен цементтин кырына бир тийдим. Каалга дагы брондолгон, салмактуу болчу. Катуу жабылып, ичинен бекип калды. Мен болсо кыймылдай албай жатып калдым. Турайын десем белим сыздап ооруйт. Алымдын келишинче кыйкыра бердим. 3 сааттай жатып калган экенмин, акыры студенттер үнүмдү угуп калып, жардамга келип алып чыгышты. Досторум да келип, дароо ооруканага жеткизишти. Операция жасоого уруксатты жакын туугандар бериш керек экен, бирок алар Ноокаттан келгиче кеч болуп кетет деп, досторум уруксат кагазына кол коюп беришиптир.
Ошентип аман калдым, бирок жарым жан. 11-омурткам талкаланып, сыныктары жүлүндү кысып калган экен. Кызыма кошуп Замирам мени да баладай кылып багат. Ошол кезде үйдө иштеген эч ким жок, болгон каражаттын баары дары-дармекке кетип аябай кыйналдык. Досторум ар дайым кол кабыш кылып турушту деңизчи, бирок алардан деле тилемчидей болуп кечке сурай албайсың. Жашаган жерибиз болсо университеттин жатаканасы. Жардам беребиз деп анда-санда кишилер көрүп келип калышчу. Бир күнү жаныбыздагы ашкананын ашпозчусу келди. "Колуман келген жардамым болсун, капа болбоңуз. Нан менен камсыз кылып турайын" деди. Макул деп ошого да сүйүндүк. Күндө кечинде ашканага келип-кеткен кардарлардан калган нандарды алып келип жүрдү. Бул биз үчүн эң сонун тамак да. Ал болбосо жанагы төрт бурчтук тоок шорпону даамына чыгаруучу татымалды кайнак сууга салып, нан малып кызым үчөөбүз ичип жатып алган күндөр да болгон.

"КОЛУМА КӨТӨРҮП БАГАМ ДЕГЕН АНТТЫ БУЗДУМ"

– Замира мен үчүн жаштыгын аябай, талантын курмандыкка чалганын эстеген сайын каңырыгым түтөп кетет. Ал мага турмушка чыкканга чейин легендарлуу "Кыз-Бурак" тобунун солисти болчу. Топтун 10-курамына азыркы Гүлнара Калдарова, Айжамал Кабылова, Кенже Дүйшеевалар менен бирге келген. Мен кырсыктаганда баарын жыйыштырып койду. Бир күнү мен катуу ооруп калып, "Тез жардам" менен ооруканага алып келишти. Кыштын күнү болчу. Даярданып келбегендиктен мени керебетке жаткырып, үстүндөгү жемпирин чечип жаап коюп, кызыбызга чуркап үйгө кетиптир. Эртеси колуна тийген керектүүлөрдү алып палатага келди. Ошондо кебетесин көрүп алып, дүйнө мага тар болуп кетти. Үстүндө күзгү жука күрмө. Анысынын да сыдырмасы бузулуп, боору жабылбай калган. Ичинен кылдыраган жука бирдемени кийип алыптыр. Бутунда да кончу кыска жазгы өтүк. Башы "нан сурап", ичине кар кирип, муз болуп тоңуп калган экен. Ыйлап жибердим, "Замира! Эмнеге өзүңдү карабайсың? Билесиңби, сенин кыйналып жатканыңды карап туруш мага кандай оор?!" Айтор, айтарга сөз таппай калдым.
Мен Замирага үйлөнүп жатканда "өмүр бою колума көтөрүп жүрүп өтөм" деп ант бергем. Тагдыр кастарын тиксе кыялыңдын баарын бырын-чырынын чыгарып, астын-үстү кылып коёт тура. Ошондо мен кызыма татыктуу ата, жубайыма камкор жолдош боло албаганыма катуу сыздадым, өкүндүм.

"ДОСТОРУМА ЫРААЗЫМЫН"

– Жашоо өтө берет экен. Көз ачып-жумганча эле окуу жайдын жатаканасында 11 жылыбызды өткөрүп коюптурбуз. 2012-жыл болчу. Бир досум телефон чалып, "Чыгыш-5 кичи районуна келе калчы" деди. Жагдайымды деги билет, мынча эмне шашылыш болду экен деп туугандардын биринин машинасын айдатып бардым. Ошол жерде досторум 9 кабаттуу үйдүн алдында турушкан экен. "Акыл, мына бул үйдөн сага батир алдык. Кирип көрүп чык, сеники" дешти. Оозума сөз келбей калды. Көзүмөн буурчактап жаш агып жатыптыр. Өгөйлөгөн тагдыр ошол күнү мени башыман сылап эркелетип жаткандай болду. Досторума эмне деген сөз арнаарымды билбей калдым. Ал кубанычты мен сүрөттөп айтып бере албайт болчумун. Ошондон бери мына ушул үйдөбүз. Тагдыр мени бутуман алса дагы жакшы дос, мыкты жубай, татынакай кызыман бак айтыптыр. Кызым быйыл 9-классты бүттү.

"ЖОЛДОШУМ – МЕНИН ПРОДЮСЕРИМ"

Акылбек мырзанын жубайы Замира Тайлакованы да маекке тарттык. Жолдошун жонуна көтөрүп баккан Замира айым "аялдар ит жандуу келебиз" деп тамашалады:
– Баары эле ушул суроону беришет: "Пенделик кылып жаштыгым бекер кетип, талантым тепселип калды деп басып кетүүоюңузга келген жокпу?"- дешип. Бир да жолу антип ойлогон эмесмин. Биздин ортобуздагы сый, тунук сезимдер андай ойго орун бербейт болчу. Мен ушул кезге чейин үмүт менен жашап келдим. Ар бир жаңы жылды тоскон сайын "эмки жылы жаңы жылды бутуна туруп тосот" деп күтчүмүн. Жылда эле ушул күтүү. Акылбектин ушинтип жатканын көргөн сайын, тескерисинче, чыйралдым.
Ал дем-күч бергендей мени эч ким колдобойт. Жолдошум мага продюсер десем жаңылышпайм. Өзүмө караганда Акылбек көбүрөөк киришип түртмөлөп, тойлорго чыгарып, "ырларды жаздыр" деп дем берип турат. Негизги кирешебиз Акылбектин 5000 сомго жетпеген жөлөк пулу жана менин тойлордо ырдап тапкан акчам.
Табарсыктан сыртка түтүк менен заара чыгып турат. "Ичегилери чубалган кишидей жаман көрүнөм" деп калат. Ошондуктан күндүз эшикке чыгып сейилдебейт. Тамакты дагы аз жейт, салмагы 60 килограмм. Арабасы деле бар. Аны туугандардыкына, тойго же зарыл ишке барарда гана колдонот.

""Замира мен үчүн жаштыгын аябай, талантын курмандыкка чалды. Ошентсе дагы мен анын таланты жолдо калбасын деп болушунча сахнага чыгуусуна шарт түзөм".

"Манастын 1000 жылдык мааракесинде өнөр адамдары менен бирге. Солдон оңго мен, Ибрагим Жунусов, ортодо жетекчибиз Гүлшайыр Садыбакасова, алдында отурган Айжамал Кабылова жана башкалар".

"2015-жылы "Кош жылдыз" теледолбооруна катышкам".

Гүлжан Асанкожоева
koom@super.kg

 Кыстарылган видео 
Ырчынын 15 жылдан бери төшөктө жаткан жолдошу...
"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (26)
Pes1500
2016-07-12 10:45:11
Замира эже бар болунуз,Аля уйдун куту деген ушулда.
0
Azura
2016-07-12 10:59:35
Соз жок, аралаш эмоциялар!
+1
nurka_85
2016-07-12 12:14:50
Баардык айтылган каалоо тилектер кабыл болсун. Ылайым дартынызга дабаа табылсын.
+3
ema70
2016-07-12 16:48:35
Келинчегинизге аллахым сабыр бериптир сабырдын тубу сары алтын бар болунуздар
+1
Aytur
2016-07-13 09:39:12
Келинчегине жана досторуна Алла ыраазы болсун! Озуно шыпаа берсин жараткан
+2
tabyshmak
2016-07-13 11:16:15
Токтоно албай ыйладым. Жалган жашоодо адамдардын тарта турган башка туйшуктору да сан жеткис. Андыктан, Жараткан адамзатына ден-соолуктун бекемин берсе экен. Эжеге рахмат! Бар болунуз эже. Мындай оор, татаал туйшукко аганын бир тууганы деле чыдамак эмес. Бар болунуздар! Мындан ары уй-булонуздорду жакшылык гана ыроолосун. Омийин...
+4
Fekus
2016-07-13 14:02:50
Азаматсыз! Туболук жары учун талантын садага чабуу ар бир адамдын колунан келе бербейт! Сиз бактылуу болууга милдеттуусуз, эжеке! "Суйкум элес" ырын дагы мыкты ырдапсыз! Талантынызга таазим! Сизден дагы жаны чыгармаларды кутобуз!
+3
ApSaLaM_KaRyBeK_UuLu
2016-07-13 21:17:57
Аллахым баарыныздардан ыраазы болсун. Аамиин
+2
shakeSultan
2016-07-14 01:20:14
Кудайым сиздерге жакшылык ыроолосун! Эмне дееримди да билбей калдым. Байке басып кетиңиз, Замире эже сизге терең ыраазычылык!
+1
mela
2016-07-14 20:15:48
иииии Жаман ыйлатты го....Мен тоюма ушул эжени чакырам....
0
Helena92
2016-07-15 01:26:19
Бул да болсо,кудайдын сиздерге берген сыноосу.Менин да козумо жаш келди.Досундун дос экенин,ишин тушкондо билесин дейт го.Эн бир асыл инсандарыныз бар экен,кудайым буюрса жакшы кундорунуз алдыда.
+1
gutler
2016-07-15 17:07:57
Тусу ийгиден тунулбо дегендей Акылбекда,келинчегида ыймандуу Аллах суйгон адамдар экен. Акылбекда дээринен жакшы Адам болгондуктан досторуда жакшы адамдар экен. Аллах шыпаасын берип сакайып кет. Жалгыз кызынардын жакшылыгын гана коргуло ылыйым.
+1
marzi88
2016-07-16 12:19:53
Ото окунучтуу, бирок аял заты ушунчалык чыдамкай, темирдей бекем жана ото умуткорбуз. jumka0505оюна кошулам, эгер эркек болсо ошондо эле таштап басып кетмек, бул да факт. Жаратканым эки дуйно бакыт жана ден соолук берсин. Сакайып кетиниз, а эжеге сабыр жана сабыр, азаматсыз
+1
adiko11
2016-07-16 15:46:58
Жакшы аял ошондой болот жакшысында жар кылып карыганда кар кылып таштап кеткен аялдар да жок эмес.Менин атам да авария болгон поезд сузуп кеткен 8жыл жаты Апам байкуш карады быйыл аманат жанын алып Кети алахым эки ай болот жаткан адамды караш жаман кыйын экен башыбыздан отту эжеге кудайым куч кубат ден соолук берсин канча баксаныз ошончо ырахаты болот алдыда кызыныздын да бактын берсин алахым
+1
Leili
2017-03-08 02:45:59
менин иним Азамат менен ырдаптыр ийгилик силерге Азаматсыздар кудай колдосун
0
№ 714, 8-июль-14-июль, 2016-ж
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА
Суперстан